A chhûng thu-ah lût rawh

Secondary menu-ah lût rawh

Jehova Thuhretute

Mizo

Thutak Hriat I Duh Em?

Thutak Hriat I Duh Em?

ENG chungchânga thutak maw? Mihringte zawhna siam tawh azawnga pawimawh berte zînga ṭhenkhat chungchânga thutak mawle. Hêng a hnuaia zawhnate hi i ngaihtuah tawh ngei a rinawm:

  • Pathianin min ngaihsak tak zet em

  • Indona leh hrehawm tawrhna a tâwp ngai ang em?

  • Kan thih hian khawi lam nge kan pan?

  • Mitthite tân beisei tûr engemaw tal a awm em?

  • Pathian ngaihthlâksak ni tûrin engtin nge ka ṭawngṭai theih ang?

  • Engnge hlimna dik tak ka neih theih ang?

Hêng zawhnate chhânna hi khawiah nge i zawn hmuh ang? Mite i han zawh kual chuan, a chhânna chi hrang hrang i dawng ngei ang. Sakhaw hruaitute pawh zâwt mah la, ngaih dân inang lo tak tak an hrilh ang che. Tin, chutiang zawhnate chhângtu nia inchhâl sakhaw lam lehkhabu tam tak a awm a. Mahse, chûng lehkhabute chu a inkalh fo va. Ṭhenkhat chu rei lo te chhûng hman tlâk angin lang ve ṭhîn mah se, a hnu lawkah a hman tlâk leh lo va; siam ṭhat emaw, thlâk danglam emaw a ni ṭhîn.

Amaherawhchu, chhânna rin tlâk tak petu lehkhabu pakhat a awm a. Chu chu thutak inziahna lehkhabu a ni. Isua Krista chuan Pathian hnêna a ṭawngṭainaah: “I thu chu thutak a ni,” tia sawiin, chu lehkhabu chu a sawi lang a. (Johana 17:17) Chu chu tûn laia Pathian Lehkhabu Thianghlim tia kan hriat hi a ni. Chu lehkhabu chuan a chunga zawhnate hi fiah tak leh dik takin a chhâng a, chûngte chu a phêk leh lamahte i hmu thei ang.

 Pathianin Min Ngaihsak Tak Zet Em?

ZAWHNA A LO CHHUAH CHHAN: Nunrâwnna leh rorêl dik lohnaa khat khawvêlah kan awm a. Sakhaw tam takte chuan hrehawm kan tawrhte hi Pathian duhzâwng niin a zirtîr a ni.

BIBLE ZIRTIR DAN CHU: Pathian chuan thil ṭha lo a thlentîr ngai lo. Joba 34:10 chuan: “Pathian chuan thil suaksual tiin Engkimtitheia chuan thil dik lo chu a ti teuh lo vang,” tiin a sawi. Pathianin mihringte tân thiltum duhawm tak a nei a. Chuvâng chuan a ni, Isua’n: “Kan Pa vâna mi . . . i ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûra min zirtîr ni. (Matthaia 6:9, 10) Pathian chuan min ngaihsak êm êm a; chuvângin a thiltum hlen nân nasa takin a inhmang a ni.—Johana 3:16.

Genesis 1:26-28; Jakoba 1:13; leh 1 Petera 5:6, 7 en bawk rawh.

Indona leh Hrehawm Tawrhna A Tâwp Ngai Ang Em?

ZAWHNA A LO CHHUAH CHHAN: Indona chuan mi chhiarsên lohte nunna chu a la chhunzawm zêl a. Kan vai hian hrehawm kan tuar ṭheuh a ni.

BIBLE ZIRTIR DAN CHU: Pathian chuan lei pum puia remna a thlentîr hun tûr chu a lo sawi lâwk tawh a. A Ram, vân lam sawrkârna hnuaiah mite chuan ‘indo dân an zir tawh’ lo vang. Chu ai mahin, an “khandaihte chu leilehna hmâwr zumahte an chher” tawh zâwk ang. (Isaia 2:4) Pathianin rorêl dik lohna leh hrehawm tawrhna zawng zawng chu a titâwp vek dâwn a ni. Bible chuan: “[Pathian chuan] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; [tûn laia rorêl dik lohna leh hrehawm tawrhna te pawh tiamin] thil hmasate chu a ral ta,” tih min tiam a ni.—Thu Puan 21:3, 4.

Sâm 37:10, 11; 46:9; leh Mika 4:1-4 en bawk rawh.

Kan Thih Hian Khawi Lam Nge Kan Pan?

ZAWHNA A LO CHHUAH CHHAN: Khawvêla sakhua zawng zawng deuhthaw hian mi a thih hnuah amaha la nung chhunzawm zêl thil engemaw awm angin a zirtîr a. Ṭhenkhat chuan mitthi tawhte’n a la nungdamte chu an tihnat theih an ring a, Pathianin mi sualte chu hremhmun meidîla chatuana a nghaisak an ring bawk a ni.

BIBLE ZIRTIR DAN CHU: Mitthite chuan thil an hre thei lo va, an hmu thei lo va, an ṭawng thei lo va, engmah an ngaihtuah thei tawh hek lo. Thuhriltu 9:5 chuan: “Mitthi erawh chuan engmah an hre lo,” a ti. Chuvângin, mi nungdamte chu an tina thei lo va, an ṭanpui thei bawk hek lo.—Sâm 146:3, 4.

Genesis 3:19; leh Thuhriltu 9:6, 10 en bawk rawh.

 Mitthite Tân Beisei Tûr Engemaw Tal A Awm Em?

ZAWHNA A LO CHHUAH CHHAN: Nun kan duh a, kan hmangaihte nêna hlim taka awm chu kan duh a ni. Kan hmangaih tak thi tate hmuh leh kan châk ngawih ngawih pawh hi thil pângngai tak a ni bawk.

BIBLE ZIRTIR DAN CHU: Mitthite zînga a tam zâwkte chu an lo tho leh ang. Isua chuan: “Thlâna awm zawng zawngin a aw an hria ang a, an chhuak vek ang,” tih min tiam a. (Johana 5:28, 29) Atîra Pathian thiltum angin, lo tho lehte chuan paradis-a nun theihna hun remchâng an nei ang. (Isaia 65:21-25) He thutiam lo thleng tûrah hian thuâwih mihringte tân hrisêlna ṭha famkim leh chatuana nunna a tel a ni. Bible chuan: “Mi felte chuan ram hi an luah ang a, a chhûngah hian kumkhuain an awm ang,” tiin a sawi a ni.—Sâm 37:29.

Joba 14:14, 15; Luka 7:11-17; leh Tirhkohte 24:15 en bawk rawh.

Pathian Ngaihthlâksak Ni Tûrin Engtin Nge Ka Ṭawngṭai Theih Ang?

ZAWHNA A LO CHHUAH CHHAN: Sakhaw vawn nei tawh phawtte chu an ṭawngṭai ṭhîn a. Mahse, mi tam takte chuan an ṭawngṭaina chu chhânsak ni lovin an hria a ni.

BIBLE ZIRTIR DAN CHU: Isua chuan kan ṭawngṭai hian thu ngai chham nawn mai mai lo tûrin min zirtîr a. Ani chuan: “In ṭawngṭaiin . . . sawi nawn mai mai suh u,” a ti. (Matthaia 6:7) Pathianin kan ṭawngṭaina min ngaihthlâksak kan duh chuan, a pawm theih tûrzâwngin kan ṭawngṭai tûr a ni a. Chutianga ti tûr chuan, Pathian duhzâwng kan hriat a, chu mi mila kan ṭawngṭai chu a ngai a ni. Johana thawn khat 5:14 chuan heti hian a hrilhfiah a ni: “Engpawh [Pathian] duhzâwng anga kan dîl chuan anin min ngaihthlâksak ṭhin,” tiin.

Sâm 65:2; Johana 14:6; 16:23, 24; leh 1 Johana 3:22 en bawk rawh.

Engtin Nge Hlimna Dik Tak Ka Neih Theih Ang?

ZAWHNA A LO CHHUAH CHHAN: Mi tam takte chuan hausakna, hmingthanna, a nih loh leh hmêlṭhatnain hlimna a pêk an ring a. Chuvângin, chutiang thil chu an ûm a; mahse, hlimna an hmu chuang lo.

BIBLE ZIRTIR DAN CHU: Isua chuan: “Rilrua retheite [“mahni thlarau lam mamawh ngaihven mite,” New World Translation] chu an eng a thâwl e,” tia sawiin hlimna thurûk chu a sawi lang a. (Matthaia 5:3) Hlimna dik tak chu kan mamawh ber—Pathian leh kan tâna a thiltum chungchâng thlarau lam thutaka kan rilṭâmna—phuhru tûra hma kan lâk chauhvin kan hmu thei ang. Chu thutak chu Bible-ah kan hmu a ni. Chu thutak hriatna chuan thil pawimawh tak tak leh thil pawimawh tak tak lote hre hrang tûrin min ṭanpui thei a. Kan duhthlanna leh thiltihte Bible thutak inkaihhruaitîrna chuan nun awmze nei zâwk min neihtîr a ni.—Luka 11:28.

Thufingte 3:5, 6, 13-18; leh 1 Timothea 6:9, 10 en bawk rawh.

 Hei hi Bible-in atîra kan siam zawhna parukte tawi fel taka a chhân dân chu a ni a. Hei aia tam hriat belh i duh em? “Mahni thlarau lam mamawh ngaihven mite” zînga mi i nih chuan hriat belh i duh ngei ang. ‘Pathianin min ngaihsak a nih si chuan, engah nge hun rei tak chhûng suahsualna leh hrehawm tawrhna awm a phal? Engtin nge ka chhûngkaw nun chu ka tih ṭhat lehzual theih ang?’ tih ang chi zawhna dangte i ngaihtuah pawh a ni thei. Bible chuan hêng zawhnate chhânna kimchang tak leh lungawithlâk tak a pêk bâkah, zawhna dang tam tak pawh a chhâng bawk a ni.

Amaherawhchu, mi tam takte chuan Bible aṭanga chhânna zawn chhuah chu an hreh a. Bible chu lehkhabu chhah tak leh a chânga hriatthiam harsa tak niin an ngai a ni. Bible aṭanga a chhânnate zawng hmu tûra ṭanpuina dawn chu i duh em? Jehova Thuhretute chuan nangmah ṭanpui thei tûr che hmanrua pahnih an nei a ni.

A pakhatna chu, Bible Zirtîrna Dik Tak Chu Eng Nge Ni? tih lehkhabu a ni a; chu chu hun nei thei lote’n Bible-in zawhna pawimawhte fiah taka a chhân dân an bih chian theih nâna buatsaih a ni. A pahnihna chu a thlâwna in lama Bible zirpuina neih a ni a. Bible zirpui tûra tling Jehova Thuhretute zînga mi pakhat chuan i inah emaw, hmun remchâng dangah emaw chawlhkâr tin rei lo tê tê Bible chungchâng a sawipui thei ang che. Chutiang atân chuan man chawi a ngai lo. Khawvêl pum puia mi maktaduai têlte chuan hetiang ruahmanna hi an hlâwkpui hle a. Mi tam takte chuan: “Thutak ka hmu ta e!” tiin thutâwp phûrawm tak an siam ṭhîn a ni.

Hei aia ro hlu zâwk hmuh tûr a awm thei lo. Bible thutak chuan puithuna âtthlâk te, sakhaw thurin tam tak avânga angaihna hriat lohna te, leh chûng avânga pâwngpaw hlauhna te ata min chhuah zalên a. Beiseina te, thiltum te, leh hlimna te min pe a ni. Isua chuan: “Thutak in hria ang a, thutak chuan bâwih a bân ang che u,” tiin a sawi si a.—Johana 8:32.