A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 ZIRLAI 3

Chanchin Ṭha Chu Pathian Min Pêk A Ni Tak Zet Em?

Chanchin Ṭha Chu Pathian Min Pêk A Ni Tak Zet Em?

1. Bible Ziaktu hi tu nge ni?

Leia chatuana nunna chungchâng chanchin ṭha chu Bible-ah a chuang a. (Sâm 37:29) Bible hi lehkhabutê 66 infinkhâwm a ni a. Pathian chuan mi rinawm 40 vêl chu Bible ziak tûrin a hmang a ni. A bu hmasa pangate chu kum 3,500 kaltaa Mosia ziah a ni a. A bu hnuhnûng ber chu kum 1,900 chuang kaltaa tirhkoh Johana ziah a ni thung. Bible ziaktute chuan tu ngaih dân nge an ziah chhuah? Pathian chuan Bible ziaktute chu a thlarau thianghlim hmangin a be pawp a. (2 Samuela 23:⁠2) Anni chuan mahni ngaihtuahna ni lovin, Pathian ngaihtuahna an ziak chhuak a ni. Chuvângin, Jehova chu Bible Ziaktu a ni.—2 Timothea 3:16; 2 Petera 1:​20, 21 chhiar rawh.

2. Engtin nge Bible hi a dik tih kan chian theih?

Bible chuan nakina thil lo thleng tûrte chu kimchang tak leh dik taka a hrilh lâwk avângin, Pathian min pêk a ni tih kan hre thei a. Mihring tumahin chutiang chuan an hrilh lâwk ve thei lo. (Josua 23:14) Pathian Engkimtitheia chauhvin mihringte nakin hun tûr chu a hmu lâwk dik thei a ni.—Isaia 42:9; 46:10 chhiar rawh.

Pathian min pêk lehkhabu chu a danglam bîk kan beisei a, a danglam rêng bawk a ni. Bible bu pum tlûklehdingâwn tam tak chu ṭawng chi hrang a za têla sem chhuah a ni a. Hmân laia ziak mah ni se, Bible chu finfiah tawh science lam thilte nên a inrem a. A ziaktu mi 40-te thuziak chu an inkalh lo bawk. Chu bâkah, Bible chu Pathian min hmangaihzia finfiahna a ni a, chu chuan tûn thlengin mite nun chu a ṭha zâwnga thlâk tûrin thiltihtheihna a la nei reng bawk. Hêng thilte hian mi maktaduai tam takte chu Bible hi Pathian Thu a ni tih a rin nghehtîr a ni.—1 Thessalonika 2:13 chhiar rawh.

 3. Bible-ah eng thute nge chuang?

Bible-a chuang thu pawimawhte zînga pakhat chu Pathianin mihringte tân thiltum duhawm tak a nei tih chanchin ṭha hi a ni a. Bible chuan mihringte chanchin inṭan tirh khân, lei paradis-a mihringte chên theihna chanvo hloh a nih dân leh a tâwpa lei hi paradis-a chantîr leh a nih dân tûr a hrilhfiah a ni.—Thu Puan 21:​4, 5 chhiar rawh.

Pathian Thu-ah chuan dânte, thu bulte, leh thurâwnte a chuang a. Chûng bâkah, Pathian mizia târ langtu A mite a dâwr dân chanchin pawh a chuang bawk a ni. Chuvângin, Bible chuan Pathian hre tûrin a ṭanpui thei che a. Pathian ṭhian i nih theih dân tûr a târ lang bawk a ni.—Sâm 19:​7, 11; Jakoba 2:23; 4:8 chhiar rawh.

4. Engtin nge Bible i hriat thiam theih ang?

Isua tih dân i zui chuan, he brochure hian Bible hre thiam tûrin a ṭanpui ang che. Isua chuan Bible chângte la chhuak zêlin, mite’n “Pathian Lehkha Thu [an] hriat nân” a awmzia a hrilhfiah ṭhîn a ni.—Luka 24:​27, 45 chhiar rawh.

Pathian min pêk chanchin ṭha tluka thil duhawm chu a awm meuh lo. Chuti chung chuan, ṭhenkhat chuan an ngaihsak lo va, mi dangte chuan an lung nih loh phah hial a ni. Mahse, lunghnual mai suh. I chatuan nun beiseina chu Pathian i hriatnaah a innghat si a.—Johana 17:3 chhiar rawh.