A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

“Pathian Hmangaihnaah Chuan Invawng Ṭha Rawh”

 THU BELHNA

Sumdâwnna Thila Buainate Chinfel Dân

Sumdâwnna Thila Buainate Chinfel Dân

Tirhkoh Paula chuan 1 Korinth 6:1-8-a chhinchhiah angin, ringtu pahnih inkâra thu buai neih chungchâng a sawi a. Korinth khuaa Kristian ṭhenkhat chuan ‘mi fel lote hmaa an in thlen ngam’ avânga pawi a tih thu a târ lang a ni. (Châng 1) Paula chuan inrem lohnate chu sawrkâr court thlen lo va, kohhran chhûnga chinfel a ngaih zâwk chhan ṭha tak a sawi a. Thlarauva thâwk khum he fuihna hi pêk a nih chhan ṭhenkhat lo ngaihtuah ila, tichuan he fuihnain a huam tel kher loh dinhmun ṭhenkhat pawh i lo en bawk ang u.

Kristian unau pakhat nêna kan inkârah sumdâwnna thila buaina a chhuah chuan kan duh dân ang ni lovin, Jehova duh dân angin chinfel kan tum hmasa tûr a ni. (Thufingte 14:12) Isua târ lan angin, inrem lohnate chu buaina lian tham tak a tlin hmaa chinfel thuai chu a ṭha ber a. (Matthaia 5:23-26) Mahse, lungchhiatthlâk takin Kristian ṭhenkhat chuan inhnial an hrât hle a, an buainate chu sawrkâr court-ah an thlen hial a ni. Paula chuan: “Hei hi in fel zawh zân lohna pakhat chu a ni pang mai, thupawi in neih tawn ṭhin hi,” tiin a sawi. Engvângin nge? A chhan ber chu, chutianga tihna chuan kohhran leh kan Pathian biak hming ṭha a tihchhiat vâng a ni a. Chuvângin, Paula zawhna siam: “Engati nge dik lo taka tihna chu in tuar zâwk loh?” tih chu rilruah kan vawng tlat a ni.—Châng 7.

Paula chuan Pathianin buaina tam takte chinfel dân ṭha tak kohhran hnênah a pe tih a sawi a. Upate chu Bible thutak hriaa finna nei Kristian mipate an ni a, anni chuan “tûn dam chhûng khawsak thute” chungchângah chuan “unaute kâra thu titlu thei” an nih thu Paula chuan a sawi. (Châng 3-5) Isua chuan inrêlna leh inbumna ang chi thil sual pawi tak avânga buaina chinfel dân tûr chhâwng thum chu a târ lang: a hmasain, buaina neite inkâr chauhva chinfel tum tûr a ni; a dawtah, rahbi hmasa a hlawhtlin loh chuan, hriatpuitu pakhat emaw, pahnih emaw a hnênah hruai tûr a ni; a tâwpah, chutianga tih hnu pawha a hlawhtlin loh chuan,  kohhran aiawhtu upate hnêna thlen tûr a ni, tiin.—Matthaia 18:15-17.

Kristian upate chu ukil emaw, sumdâwng mi emaw an nih kher a ngai lo va, chutiang mite anga thurâwn an pêk lah a ngai hek lo. Anni chuan unaute inkâra sumdâwnnaa buaina chinfel dân tûr an hrilh lo vang. Chu ai chuan, buainaa telte chu Bible thute nunpui a, inrem taka chingfel tûrin ṭanpui an tum zâwk a ni. Upate chuan buaina chinfel harsa deuhvahte chuan bial kantu emaw, Jehova Thuhretute branch office emaw râwn chu an duh mai thei. Mahse, Paula zilhnain a sawi tel loh dinhmunte pawh a awm bawk a. Chûng zînga ṭhenkhat chu eng nge ni?

Dinhmun ṭhenkhatah chuan, court-a thu buai thlen chu mahni hma sial lo leh inrem taka thil chinfel theih dân mâwlmang ber leh dânin a phût anga thil ṭûl a ni thei a. Entîr nân, court-a inkhin chu dân ang taka inṭhenna hmuh nân te, fate awmpui phalna neih nân te, inṭhen hnua châwmna dawn nân te, insurance sum hmuh nân te, sumdâwnna tlâkchhiatnaa sum hmuh leh nân te, thu ro chhiaha tel ro hmuh nântea kawng awmchhun a ni thei. Chu bâkah, unaupa pakhat chuan mahni invênhim nân dân ang taka court-a thu buai theh luh ve chu ṭûl a ti pawh a ni thei bawk. *

Buaina duh vânga tih a nih loh chuan, chutianga court-a inkhinna chuan Pathian thâwk khum Paula zilhna chu an bawh chhe lo pawh a ni thei. * Chuti chung pawhin, Kristian thil ngaih pawimawh ber tûr chu Jehova hming tihthianghlim leh kohhrana remna leh inpumkhatna awmtîr hi a ni tûr a ni. Krista hnungzuitute hriat hran theihna ber chu hmangaihna a ni a, “hmangaihnain . . . mahni hma a sial lo” a ni.—1 Korinth 13:4, 5; Johana 13:34, 35.

^ par. 2 Thleng khât viau mah se, Kristian pakhat chuan a Kristian unau dang chungah sual pawi tak—pâwngsual, kutthlâkna, tualthahna, a nih loh leh rûkrûkna lian tham tak ang chite—chu a ti pawh a ni thei a. Chutiang thilah chuan, court-a inkhinna emaw, dân bawhchhetu hremna emaw pawh thlen thei mah se, thuneitute hnêna thu buai thlen chu Kristian tâna thil tih chi loh a ni chuang lo.

^ par. 3 Hriat chian lehzual nân, Vênnainsâng, March 15, 1997, (English) phêk 17-22, leh October 15, 1991, (English) phêk 25-28-na chu en rawh.