A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

“Pathian Hmangaihnaah Chuan Invawng Ṭha Rawh”

 THU BELHNA

Hnawh Chhuahte Cheibâwl Dân Tûr

Hnawh Chhuahte Cheibâwl Dân Tûr

Kan chhûngte, a nih loh leh kan ṭhian ṭha tak pakhatin a thil sual tih a inchhîr loh avânga kohhran aṭanga hnawh chhuah a nih aia tawrh hrehawm zâwk thil dang a awm meuh lo vang. Chumi chungchânga Bible kaihhruaina kan chhân lêt dân chuan Pathian kan hmangaihna leh a ruahmanna chunga kan rinawmna a nasat dân chu a târ lang a ni. * Zawhna ṭhenkhat lo chhuakte hi han ngaihtuah teh.

Engtin nge hnawh chhuah tâwktu chu kan cheibâwl ang? Bible chuan: “Tupawh, unau hming pu siin, inngaih hmang mi emaw, mi duhâm emaw, milem be mi emaw, hauh hmang mi emaw, zu ruih hmang mi emaw, hlêpru mi emaw ni sela, pâwl lo tûrin . . . mi chutiang hnênah chuan ei pawh ei lo tûrin,” min hrilh a. (1 Korinth 5:11) ‘Krista zirtîrna thua awm reng lote’ chungchângah chuan: “In inah thlentîr suh ula, ṭawngkam ṭha pawhin thlah suh u; ṭawngkam ṭhaa thlahtu chu a thiltihsualah chuan a tel ve si a,” tiin kan chhiar bawk. (2 Johana 9-11) Hnawh chhuahte chu thlarau lam leh tisa lam thilah kan kâwm lo. Vênnainsâng (English) September 15, 1981, phêk 25-na chuan: “Tuemaw hnêna ‘Chibai’ han tih mai pawh hi inbiak ṭanna rahbi hmasa a ni thei a, inṭhianna inṭanna pawh a ni hial thei bawk. Hnawh chhuahte nêna inbiakna leh inṭhianna thlen thei chutiang rahbi hmasa chu kan rap duh dâwn em ni?” tiin a sawi a ni.

Inbiak loh hulhual chu a ṭûl tak zet em? A chhan tam tak avângin a ṭûl a ni. A pakhatnaah, chu chu Pathian leh a Thu chunga kan rinawmna a nih vâng a ni. A awlsam hunah chauh ni lovin, a harsat hle hunah pawh Jehova thu chu kan zâwm a. Pathian kan hmangaihna chuan ani chu a dikin, hmangaihna a ngah a, a dânte chu kan tâna ṭha ber tûr a ni tih hriain a thupêk zawng zawng zâwm tûrin min chêttîr a ni. (Isaia 48:17; 1 Johana 5:3) A pahnihnaah, inlamlêt duh lo thil tisualtu lak ata inlâk hranna chuan thlarau lam leh nungchang lama bawlhhlawhna lakah keimahni leh kohhran pum chu a vênghim a,  kohhran hming chhiatna tûr lakah pawh a vênghim a ni. (1 Korinth 5:6, 7) A pathumnaah, Bible thu bulte kan vawn ngheh tlatna chuan hnawh chhuah chungah pawh hlâwkna a thlen hial thei a ni. Judicial committee thu tlûkna siam kan thlâwpna chuan upate ṭanpui tumna tûn thlenga hnâwltu hnawh chhuah tâwktu thinlung chu a khawih thei a. A hmangaih takte nêna inkawmna nuam leh hlu tak a neih theih tawh lohna chuan amah chu a ‘inhriat chhuahtîrin,’ a thil sual tih pawizia hria a, Jehova hnêna kîr leh tûrin hma a lâktîr thei bawk.—Luka 15:17.

Chhûngte chu hnawh chhuah ni ta se, engtin nge ni ang? Chutiang hunah chuan, chhûngkaw inzawmna nghet tak chu fiahna lian tak a ni thei. Engtin nge hnawh chhuah tâwk chhûngte chu kan cheibâwl ang? Dinhmun tawh theih ang zawng zawngte chu kan sawi sêng vek lo vang a; mahse, a bulpui dinhmun pahnih lo ngaihtuah bîk ta ila.

Dinhmun ṭhenkhatah chuan, hnawh chhuah tâwk kan chhûngte chu chhûngkaw zînga mi angin in khatah an la khawsa pawh a ni thei. Hnawh chhuah a nihna chuan chhûngkaw inzawmna a tihtâwp loh avângin, nî tina chhûngkaw thiltihah chuan a la tel zawm zêl mai thei. Mahse, ani chuan a thiltih hmangin a chhûngkuaa ringtute nêna thlarau lama an inzawmna chu a tichat tawh a. Chuvângin, a chhûngkuaa a rinawmte chuan thlarau lama inkawmhona an neihpui thei tawh lo a ni. Entîr nân, hnawh chhuah chu ina awm a nih chuan, chhûngkuaa Pathian biakna neih hunah a tel ve lo vang. Mahse, hnawh chhuah chu kum tling lo a nih chuan, nu leh pate chuan zirtîr leh thunun tûrin mawhphurhna an la nei reng a. Chuvângin, hmangaihna ngah tak nu leh pate chuan an fa chu Bible an zirpui mai thei a ni. *Thufingte 6:20-22; 29:17.

Dinhmun dangah chuan, hnawh chhuah tâwk kan chhûngte chu chhûngkaw zînga khawsa lo, in khata chênpui loh pawh a ni thei a. Chhûngkaw thil engemawa inbiak a ngaih châng pawh awm thei mah se, a tlêm thei ang bera biak pawh tûr a ni. Kristian chhûngkaw zînga a rinawmte chuan an chênpui loh chhûngkhat hnawh chhuahte nêna inkawm theih nân chhuanlam  tûr an zawng lo. Jehova leh a inawpna pâwl chunga an rinawmna chuan Bible-a hnawh chhuahte chungchânga kaihhruaina chu zâwm tlat tûrin a chêttîr zâwk ang. An rinawmna chu thil sualtitu tâna ṭha ber tûr an ngaihtuah vâng a ni a, chu chuan ani chu thununna a dawn hlâwkpui tûrin a ṭanpui thei a ni. *Hebrai 12:11.

^ par. 1 Hemi chungchânga Bible thu bulte hi mahni thua kohhran chhuahsante chungah pawh ang khat veka hman tûr a ni.

^ par. 2 Khawsakpui kum tling lo hnawh chhuahte chungchâng tam lehzual hriat nân, Vênnainsâng October 1, 2001, phêk 15-17 leh November 15, 1988, (English) phêk 20-na chu en rawh.

^ par. 3 Chhûngkaw zînga mi hnawh chhuahte cheibâwl dân tûr chungchâng tam lehzual hriat nân, Vênnainsâng April 15, 1988, (English) phêk 26-31, September 15, 1981, (English) phêk 26-31, leh Kan Lalram Rawngbâwlna, August 2002, phêk 3-4 chu en rawh.