Tûn laia thil sual thleng mêkte hian Paradis a hnaih tawhzia a târ lang a ni. Bible chuan Paradis lo thlen hma lawkin hun râpthlâk tak kan tawn tûr thu a sawi a. Chutiang hunah chuan kan awm mêk tawh a ni! Hetah hian Bible sawi thil lo thleng tûrte zînga ṭhenkhat târ lan a ni:

Indopui. “Hnam hrang leh hnam hrang an indo vang a, ram hrang leh ram hrang an indo vang.” (Matthaia 24:⁠7) He hrilh lâwkna hi a lo thleng dik a ni. Kum 1914 aṭangin khawvêl indopui pahnih leh indona tênau tam tak a thleng tawh a. Chûngah chuan mi maktaduai têl an thi a ni.

Natna darh zau tak. “Hmun hrang hrangah . . . hrite a leng . . . ang.” (Luka 21:11) Chu chu a lo thleng dik em? Dik e. Cancer te, lung natna te, âwmna pui te, sikserh te, AIDS te, leh natna dang te chuan mi maktaduai tam takte nun a la tawh a ni.

Ei leh bâr tlâkchhamna. Khawvêl pumah hian ei leh bâr khamkhawp nei lo an awm a. Kum tin mi maktaduai têlte chu ṭâm avângin an thi a ni. Hei hi Paradis lo thlen hnaih tawhzia târ langtu chhinchhiahna dang a ni a. Bible chuan: “Ṭâmte a tla ang,” a ti.​—⁠Marka 13:⁠8.

 Lîrnghîng. “Hmun hrang hrangah . . . lîrte a nghîng ang.” (Matthaia 24:⁠7) Hei pawh hi kan hunah a lo thleng dik a ni. Kum 1914 aṭangin, mi maktaduai khat aia tam chu lîrnghîng avângin an thi tawh a ni.

Mi suaksualte. Mite chu “tangka ngainatu te,” leh “mahni inhmangaihtu te,” an ni ang a. “Pathian hmangaih aia mahni lâwmna mai hmangaih zâwktu te” an ni ang. Naupangte pawhin ‘nu leh pa thu an âwih lo’ vang. (2 Timothea 3:​1-5) Tûn laiah hetiang mi hi an tam hle tih i pawm dâwn lâwm ni? Chutiang mite chuan Pathian zahna chhe tê mah an nei lo va, Pathian chanchin zirtute chu an tibuai ṭhîn a ni.

Dân bawhchhiatna. ‘Sual a la pung dâwn’ bawk a ni. (Matthaia 24:12) Kum engemaw zât kaltate aiin dân bawhchhiatna hi nasat takin a pung tih i pawm ngei ang. Hmun tina mite chu rawk te, bum te, tihnat te an ni ang tih hlau rêng rêngin an awm a ni.

Hêng zawng zawng hian Pathian Ram a hnai tawh tih a târ lang a ni. Bible chuan: Chûng chu a lo thleng in hmuh hun chuan Pathian ram a lo hnai tawh tih hria ang che u,” a ti a. (Luka 21:31) Pathian Ram chu eng nge ni? Chu chu he lei paradis-a chantîrtu tûr, Pathian vân lam sawrkâr a ni. Pathian Ramin mihring sawrkârte a rawn thlâkthleng ang.​—⁠Daniela 2:⁠44.