Setana chuan dawi hmang tûrin a duh che a. Mi tam tak chuan hlauhawm laka vênghim tûrin an thlahtute emaw, thlaraute emaw hnênah inthawina an hlân thîn a. Chutianga an tih chhan chu thlarau khawvêla thiltitheite an hlauh vâng a ni. Dawi zungbun emaw, ngûn emaw an bun a. Dawi thiltihtheihna nei “damdawite” chu an inhnawih emaw, an in emaw bawk ṭhîn. Ṭhenkhat chuan an inah emaw, an tualah emaw humhim theihna neia an ngaih thilte chu an thukru a. Mi dangte chuan an sûmdawnnaah te, school exam-naah te, a nih loh leh nula tlangvâl inrîmnaah te hlawhtlinna a thlen theih an rin avângin, dawi “damdawi” chu an hmang bawk.

Setana laka inhumhimna ṭha ber chu ṭhian atâna Jehova neih hi a ni. Pathian Jehova leh a vântirhkohte chuan Setana leh a ramhuaihote aiin thil an tithei zâwk daih a. (Jakoba 2:​19; Thu Puan 12:⁠9) Jehova chuan a ṭhiante​—⁠a chunga rinawm nghette tâna a chakna lantîr chu a châk êm êm a ni.​—⁠2 Chronicles 16:⁠9.

Pathian Thu chuan: “Dawi te in hmangin aien te in chîng tûr a ni hek lo,” a ti. Chutiang chîn dân chuan mi chu Diabol-Setana thununna hnuaia a dah nghâl theih avângin, Jehova chuan dawi leh dawi thiamna chu a dem a ni.​—⁠Leviticus 19:⁠26.