Pathian ṭhian i nih duh chuan, Pathian pawm sakhuana i vawn a ngai a. “Pathian chibai bûktu taktakte” chuan “thutak” nêna inmilin Pathian an be dâwn tih Isua’n a sawi a. (Johana 4:​23, 24, NW) Pathian biak dân dik kawng khat chauh a awm a ni. (Ephesi 4:​4-6) Sakhaw dik chuan chatuana nunnaah mi a hruai a, sakhaw dik lo erawh chuan boralnaah a hruai thung a ni.​—⁠Matthaia 7:​13, 14.

Sakhaw dik chu a vuantute thiltih aṭangin i hre thei a. Jehova chu a ṭhat avângin, amah chibai bûktute chu mi ṭha an ni tûr a ni a. Sêrthlum kûng ṭha chuan sêrthlum ṭha a rah chhuak angin, sakhaw dik chuan mi ṭha a rah chhuak ṭhîn.​—⁠Matthaia 7:​15-20.

Jehova ṭhiante chuan Bible zahna thûk tak an nei a. Bible hi Pathian hnêna mi a ni tih an hria a. Bible thu sawite hmangin an nun an kaihruai a, an buainate an chingfel a; tin, Pathian chungchâng an zir bawk a ni. (2 Timothea 3:16) An thu hril anga nun chu an tum a ni.

 Jehova ṭhiante chu hmangaihna an inlantîr tawn a ni. Isua chuan mite a hmangaihna chu Pathian chungchâng zirtîrna leh dam lote tihdamna hmangin a lantîr a. Sakhaw dik vuantute pawhin mi dangte hmangaihna chu an lantîr a ni. Isua ang bawkin, retheite leh hnam dangte chu an hmusit lo. Isua chuan a zirtîrte chu hmangaihna an inlantîr tawnna aṭanga hriat a nih tûrzia a sawi a ni.​—⁠Johana 13:35.

Pathian ṭhiante chuan Pathian hming, Jehova an chawimawi a. Tuemawin i hming a hman duh loh tlat chuan, chu mi chu i ṭhian hnai a ni thei ang em? Ni thei lo vang! Ṭhian kan neih hian a hming kan hmang a, mi dang hnênah a chungchâng thu ṭhate kan sawi ṭhîn. Chutiang bawkin, Pathian ṭhian ni duhte chuan a hming an hmangin, a chungchâng mi hnênah an sawi tûr a ni. Jehova’n chutianga ti tûrin min duh si a.​—⁠Matthaia 6:9; Rom 10:​13, 14.

Isua ang bawkin, Pathian ṭhiante chuan Pathian Ram chanchin mite an zirtîr a. Pathian Ram chu he lei paradis-a chantîrtu tûr vân sawrkâr a ni a. Pathian ṭhiante chuan chu Pathian Ram chanchin ṭha chu mi dangte an hrilh a ni.​—⁠Matthaia 24:14.

Jehova Thuhretute chuan Pathian ṭhian nih an tum a. Bible zahna leh inhmangaih tawnna an nei a ni. Pathian hming an hmangin, Pathian Ram chanchin mite an zirtîr bawk. Jehova Thuhretute chuan tûn lai khawvêla sakhaw dik chu an vuan a ni.