A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Governing Body Hnên Aṭanga Lehkha Thawn

Governing Body Hnên Aṭanga Lehkha Thawn

Rinnaa unau duh tak:

I hriat tawh angin, Bible hi mite chanchin ziahna lehkhabu a ni a. An zînga tam tak chu kan harsatna tawh ang tâwk mi rinawm a hmei a pate an ni a. “Kan neih ang rilru veizâwng nei” an ni. (Jakoba 5:17, New World Translation) Ṭhenkhat chu buaina leh lungkhamnain a tlâk buak a. Mi dangte chu an chhûngkuaa mite leh rinnaa an unaute avânga rilru natna nasa tak neite an ni. Tin, mi tam takte chu an thil sual tih tawhte avânga mahni inthiam lohna neite an ni bawk.

Chutiang mite chuan Jehova an kalsan ṭhak em? Kalsan ṭhak lo ve. Mi tam takte chu: “Berâm bo angin ka vâk bo va; i chhiahhlawh hi zawng ang che; i thupêkte chu ka theihnghilh ngai si lo,” tia ṭawngṭai fakna hla phuahtu ang an ni. (Sâm 119:176) Chutianga inngaih châng i nei em?

Jehova chuan berâm huang ata vâk bo amah betute chu a theihnghilh ngai lo. Anni chu a zawng chhuak zâwk mah a—chu chu rinnaa an unaute hmangin a ni fo ṭhîn. Entîr nân, Jehova’n sum leh pai lama harsatna, hmangaih takte sûnna, leh hrisêlna ṭhat lohna ang chi chhiatna tam tak tâwktu a chhiahhlawh Joba a ṭanpui dân hi han ngaihtuah teh. Joba chuan amah ṭanpuitu tûra lo kal a ṭhiante sawi ṭawngkam na tak takte pawh a tuar a. Rei lo te chhûng chu a ngaihtuahna pêng mah se, Jehova chu a hnuchhawn ngai lo. (Joba 1:22; 2:10) Engtin nge Jehova chuan Joba chu ding ngîl leh tûra a ṭanpui?

Jehova’n Joba a ṭanpui dân kawng khat chu rinnaa a unau Elihua hmangin a ni. Joba’n a ngaihmawh thilte a sawi lai chuan, Elihua chuan a ngaithla a, thu sawi lo thei lo niin a inhria a. Eng nge a sawi ang? Joba chu a sawisêl dâwn nge ni a, inthiam lohna neihtîrna leh tihzahna hmangin a fuih zâwk dâwn? Elihua chu Joba aia chungnung zâwkah a indah em? Indah lo ve! Pathian thlarauva chêttîra awmin, Elihua chuan: “Pathian lam thuah chuan nangmah ang bawk ka ni a, hluma siam ve bawk ka ni,” a ti a. A hnuah: “Kei hi mi hlau suh la, ka nawr lutuk lo vang che,” tiin a thlamuan a ni. (Joba 33:6, 7) Joba phurrit belhchhah aiin, Elihua chuan Joba mamawh zilhna leh fuihna thute chu hmangaihna nên a pe zâwk a ni.

Chutiang kawng chuan he brochure hi kan buatsaih a ni tih hria ang che. A hmasain kan ngaithla a, tawlh bo tawh lo kîr lehte dinhmun leh thusawite chu ngun takin kan ngaihtuah a ni. (Thufingte 18:13) Tichuan, Pathian Jehova’n hun kal tawha an dinhmun anga ding a chhiahhlawhte a ṭanpui dân Bible thuziakte chu ṭawngṭaina nên ngun takin kan bih chiang a. A tâwpah chuan, chûng Bible thuziakte leh tûn laia thiltawnte chu zawm khâwmin he brochure hi kan tichhuak ta a ni. He lehkhabu hi bih chiang tûrin kan sâwm che a. Kan hmangaih tak zet che tih hi theihnghilh suh ang che.

Jehova Thuhretute Governing Body