United States

Gilead School, Patterson, New York

Panama

Theocratic zirna hi hun rei tak ata tawhin Jehova Thuhretute chhinchhiahna a lo ni a. Hunbi kima Lalram thu hrilhtute’n ‘an rawngbâwlna an hlen’ theih nân special school-te buatsaihsak a ni.—2 Timothea 4:5.

Pioneer Rawngbâwlna School. Miin regular pioneer kum khat a thawh tlin hnuah, tualchhûng Kingdom Hall-a ni ruk awh school-ah a tel ṭhîn a. School-in a tum chu pioneer-te Jehova hnaihtîr lehzual te, rawngbâwlna pêng chi hrang hranga thiamtîr lehzual te, leh rinawm taka rawngbâwltîr zêlte a ni.

Chanchin Ṭha Hriltute Tâna School. He thla hnih awh school hi an in leh lo kalsan a, a ṭûlna hmuna rawngbâwl thei tûr thiltawn nei pioneer-te zirtîrna tûra ruahman a ni a. Anni chuan leia Chanchin Ṭha Hriltu ropui ber, Isua Krista chu entawnin, “Kei heta hi ka awm, mi tîr ta che,” an ti a ni. (Isaia 6:8, 9; Johana 7:29) In aṭanga hmun hla taka insawn tûr chuan nun dân tluangtlam zâwka nun pawh a ngai mai thei a. Hnam dân te, sik leh sa te, leh chawte pawh a lo ei ṭhinte lakah chuan a danglam hle thei bawk a. Ṭawng thar zirte pawh a ngai hial thei a ni. He school hian kum 23 aṭanga 65 inkâr nupui pasal la nei lo unaute leh nupa tuakte chu an rawngbâwlnaa an mamawh thlarau lam miziate nei tûra a ṭanpui bâkah, Jehova leh a inawpna pâwl tâna mi ṭangkai an nih lehzual theihna tûra neih ngai thiamnate nei tûrin a ṭanpui a ni.

Gilead School. Hebrai ṭawng chuan “Gilead” tih chu “Hriattîrna Tian Khâwm” tihna a ni a. Kum 1943-a Gilead school din a nih aṭang khân, zir chhuak mi 8,000 chuangte chu “kâwlkil thlenga” thu hril tûrin missionary-a tirh chhuah an ni a, an rawngbâwlnaah chuan an hlawhtling hle a ni. (Tirhkohte 13:47) Gilead chhuakte Peru an va thlen chuan, kohhran pakhat mah a la awm lo va. Tûnah chuan 1,000 chuang a awm tawh a ni. Kan missionary-te’n Japan rama rawng an bâwl tirh chuan, Thuhretu sâwm pawh an tling lo va. Mahse, tûnah chuan 2,00,000 chuang an awm tawh a ni. Thla nga chhûng awh Gilead school zirlaiah chuan Pathian Thu, Bible chipchiar taka zirna a tel a. Khawvêl pum huap rawngbâwlna tingelnghet tûr leh tichak tûrin, he nasa taka inzirna school-ah hian special pioneer-te leh missionary-te bâkah, branch office-a thawkte leh bial kantute chu sâwm an ni.

  • Pioneer Rawngbâwlna School-in a tum chu eng nge ni?

  • Chanchin Ṭha Hriltute Tâna School chu tute tân nge?