‘Atîr ata an siamtu khân hmeichhia leh mipaah a siam.’—Matthaia 19:4

Pathian Jehova * chuan inneihna hmasa ber chu a ruahman a. Bible chuan hmeichhe hmasa ber a siam hnuah “Adama hnênah a hruai” tih min hrilh a ni. A hlim êm avângin, Adama chuan: “Hei zet chu ka ruh ang ruh neia, ka tisa ang tisa nei ngei chu a ni,” tiin a sawi. (Genesis 2:22, 23) Tûnah pawh, Jehova’n nupate chu hlim tûrin a la duh reng a ni.

Nupui pasal i han neih hian, thil engkim kal tluang vek tûrin i beisei mai thei a. Mahse, a nihna takah chuan, nupa inhmangaih takte pawhin harsatna ṭhenkhat an nei dâwn a ni. (1 Korinth 7:28) He brochure-ah hian Bible thu bulte a chuang a, chûng chu in nunpui phawt chuan, inneihna hlimawm leh chhûngkaw hlim tak in nei thei ang.—Sâm 19:8-11.

 1 JEHOVA PEK I CHANVO CHU PAWM RAWH

BIBLE SAWI DAN CHUAN: Pasal chu chhûngkaw lû a ni.—Ephesi 5:23.

Pasal i nih chuan, Pathian Jehova chuan i nupui duat taka enkawl tûrin a beisei che a. (1 Petera 3:7) I nupui chu i kawppui âwm mi ni tûra a siam a nih avângin zahawm tak leh hmangaih taka dâwr tûrin a duh che a ni. (Genesis 2:18) Mahni ṭhatna tûr aia i nupui ṭhatna tûr dah pawimawh zâwk thei tûr khawpin i nupui i hmangaih tûr a ni bawk.—Ephesi 5:25-29.

Nupui i nih chuan, Pathian Jehova chuan i pasal zah hle tûr leh a chanvo hlen thei tûra ṭanpui tûrin a beisei che a. (1 Korinth 11:3; Ephesi 5:33) A thu tlûkna siam chu thlâwpin, ani chu thinlung zawng zawngin thawhpui ang che. (Kolossa 3:18) Chutianga i tih hian, i pasal leh Jehova mitah i duhawm hle dâwn a ni.—1 Petera 3:1-6.

I TIH THEIH CHU:

  • I kawppui hnênah chuan nupui pasal ṭha zâwk i nih theih dân tûr zâwt rawh. A thusawi chu ngun taka ngaithlain, hmasâwn tûra i tih theih âwmte chu ti ang che

  • Dawhtheihna nei rawh. In pahnih tân intihlâwm tawn dân hriat nân hun a ngai ve ve dâwn a ni

2 I KAWPPUI RILRU VEIZAWNG NGAIHSAK RAWH

BIBLE SAWI DAN CHUAN: I kawppui ṭhatna tûr i zawn a ngai a. (Philippi 2:3, 4) Pathian Jehova chuan ‘mi zawng zawng chunga zaidam’ min phût tih hriain, ani chu thil hlu tak angin cheibâwl ang che. (2 Timothea 2:24) “Khandaih chhun anga na taka mi chhun thu sawi an awm a, mi fing lei erawh chu damna a ni.” Chuvângin, i ṭawngkam hman tûr chu uluk takin thlang rawh. (Thufingte 12:18) Jehova thlarau chuan ngilnei tak leh hmangaihna nei taka thusawi tûrin a ṭanpui ang che.—Galatia 5:22, 23; Kolossa 4:6.

I TIH THEIH CHU:

  • I kawppui nêna thu pawimawh takte in sawiho hmain, rilru fîm leh inhawng tak nei tûrin ṭawngṭai rawh

  • I thusawi tûr leh i sawi dân tûr chu ngun takin ngaihtuah rawh

 3 PAWL KHAT ANGIN NGAIHTUAH RAWH

BIBLE SAWI DAN CHUAN: Nupui pasal i neih hian, i kawppui nên “tisa pum khat” in lo ni a. (Matthaia 19:5) Mahse, mi pahnih in la nih avângin ngaih dân inang lo tak in nei thei a ni. Chuvângin, ngaihtuahna leh rilru put hmanga inpumkhat dân in zir a ngai a ni. (Philippi 2:2) Thu tlûkna siam hunah inpumkhatna neih a pawimawh hle. Bible chuan “mi râwn ṭhin hi a finthlâk” tih a sawi. (Thufingte 13:10, C.L. Re-edited) Thu tlûkna pawimawh tak takte in siam hunah, Bible thu bulte chuan kaihruai che u rawh se.—Thufingte 8:32, 33.

I TIH THEIH CHU:

  • I kawppui chu thu thar leh i ngaih dân mai hrilh lovin, i rilru veizâwng pawh hrilh tel ang che

  • Thil ti tûra intiamna i neih hmain, i kawppui râwn ṭhîn rawh

^ par. 4 Jehova tih chu Bible-a lang Pathian hming a ni.