A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Bible Zirtîrna Dik Tak Chu Eng Nge Ni?

 BUNG 15

Pathian Pawm Tlâk Biakna

Pathian Pawm Tlâk Biakna
  • Sakhua zawng zawng hian Pathian a tilâwm em?

  • Sakhaw dik chu engtin nge kan hriat theih ang?

  • Tûn laia Pathian betu dik takte chu tute nge ni?

PATHIAN Jehova chuan min ngaihsak êm êm a, a kaihhruaina duhawm tak chu hlâwkpui tûrin min duh a ni. Biak dân tûr dik taka Pathian kan biak chuan kan hlim ang a, harsatna tam tak kan pumpelh ang. Tin, a malsâwmna leh a ṭanpuina kan dawng bawk ang. (Isaia 48:17) Amaherawhchu, Pathian chungchânga thudik zirtîra inchhâl sakhaw tam tak an awm a. Chutichung pawhin, Pathian nihna leh kan laka a thil beisei chungchânga an thu zirtîr chu a inang lo hlawm hle.

2 Pathian biak dân tûr kawng dik chu engtin nge i hriat theih ang? Sakhua zawng zawngte zirtîrna zir a, i khaikhin kual chiam a ngai lo. Bible-in biakna dik chungchâng a zirtîrna dik tak chauh chu i zir a ngai a ni. Entîr nân: Ram tam takah chuan pawisa lem a tam êm êm a. Chutiang pawisa lemte thlang chhuak a, paih chhuah hna thawk tûra tih ni ta la, engtin nge i tih ang? Pawisa lem lan dân zawng zawng hriat i tum ang em? Tum lo vang. Pawisa dik tak lan dân chiang taka zir chu a ṭha zâwk ngei ang. Pawisa dik tak lan dân i hriat chian hnu chuan, a lem chu awlsam takin i hre thei mai dâwn a ni. Chutiang bawkin, sakhaw dik hriat theih dân kan zir chuan a dik lo chu kan hre thei mai dâwn a ni.

3 Jehova chu a pawm tlâka kan biak a pawimawh êm êm a  ni. Mi tam tak chuan sakhua zawng zawngin Pathian a tihlâwm an ring a, mahse Bible chuan chutiangin a zirtîr lo. Kristiana inchhâl ringawt mai pawh chu a tâwk lo a ni. Isua chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titute erawh chu an lût ang,” tiin a sawi. Chuvângin, Pathian pawm tlâk ni tûr chuan Pathian thil min phûtte kan zir a, kan tih a ngai a ni. Isua chuan Pathian duhzâwng ti lotute chu, “Thil sual tite u,” tiin a ko va. (Matthaia 7:21-23) Pawisa lem ang maiin, sakhaw dik lo chuan hlutna rêng a nei lo. A hlauhawm zâwk a ni.

4 Pathian Jehova chuan khawvêla mi zawng zawng hnênah chatuana nun theihna hun remchâng a pe ṭheuh va. Amaherawhchu, Paradis-a chatuana nun nei thei tûr chuan Pathian chu ṭha taka biain, a pawm theih tûrzâwnga kan nun a ngai a ni. Mahse, mi tam takin chutianga an ti duh lo chu a lungchhiatthlâk hle. Chuvângin, Isua chuan: “Kawngka zîmah chuan lût rawh u; boralnaa kalna kawngka chu a zau va, a kawng pawh a zau bawk a, chu mi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” tiin a sawi a ni. (Matthaia 7:13, 14) Ni e, sakhaw dik chuan chatuana nunna a thlen a. Sakhaw dik lo erawh chuan boralna a thlen thung a ni. Jehova chuan mihring tumah hi an boral a duh lo va, chuvângin, hmun tina mite hnênah a chanchin zir theihna hun remchâng a pe ṭheuh a ni. (2 Petera 3:9) Pathian kan biak dân chu kan tân nunna emaw, thihna emaw a ni tih a chiang hle.

SAKHAW DIK HRIAT THEIH DAN

5 Engtin nge ‘nunna kawng’ chu hmuh theih a nih? Isua chuan sakhaw dik chu a vuantute nunah hmuh theih a nih tûr thu a sawi: “Thing ṭha apiang a rah ṭha ṭhîn a . . .  Chuvângin anmahni chu an rahah in hre mai ang,” tiin. (Matthaia 7:17, 20) Kawng danga sawi chuan, sakhaw dik vuantute chu an thurin leh nungchang aṭangin a hriat theih ang. Mi ṭha famkim lo niin thil tihsualte nei ve ṭhîn mah se, betu dikte chuan a huhovin Pathian duhzâwng tih an tum ṭâng ṭâng a ni. Tûnah chuan sakhaw dik betute hriat theih dân kawng paruk chu ilo en ang u.

6 Pathian chhiahhlawhte chuan an zirtîrnaah Bible an ṭanchhan. Bible ngei chuan: “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân,” tiin a sawi a ni. (2 Timothea 3:16, 17) Tirhkoh Paula chuan a Kristian unaute hnênah: “Pathian thu kan hnên ata in hriat, in pawm lai khân, mihring thu pawmin in pawm lo va, Pathian thu pawmin in pawm zâwk avâng khân,” tiin a ziak a. (1 Thessalonika 2:13) Chuvângin, sakhaw dik thurin leh thiltihte chu mihring thlîr dân emaw, chîn dân emawah a innghat lo. Pathian thâwk khum a Thu, Bible a ṭanchhan zâwk a ni.

7 Isua Krista chuan Pathian Thu ṭanchhana zirtîrin, entawn tûr ṭha tak a siam a. A Pa vâna mi hnêna a ṭawngṭainaah ani chuan: “I thu chu thutak a ni,” tiin a sawi. (Johana 17:17) Isua chuan Pathian Thu a ring tlat a, a thu zirtîr apiang chu Pathian Lehkha Thu nên a inmil thlap a ni. Ani chuan Bible chângte la chhuakin: “Tih ziak a ni,” a ti fo ṭhîn. (Matthaia 4:4, 7, 10) Chutiang bawkin, tûn laia Pathian mite pawhin an ngaih dân an zirtîr ngai lo va. Bible hi Pathian Thu a nih ring tlatin, an zirtîrnaah Pathian Thu an ṭanchhan tlat a ni.

8 Sakhaw dik vuantute chuan Jehova chauh an bia a, a hming an puang chhuak. Isua chuan: “Lalpa i Pathian [“Jehova,” NW] chibai bûk la, ama rawng chauh bâwl rawh,” tiin  a sawi. (Matthaia 4:10) Chuvângin, Pathian chhiahhlawhte chuan Jehova chauh an bia a. Chutah chuan mite hnêna Pathian dik hming leh a miziate hriattîr a tel a ni. Sâm 83:18 chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a sawi. Isua’n a ṭawngṭainaah: “Nangin khawvêl zînga chhuak mite kei mi pêk hnênah khân i hming ka tilang ta,” tia sawiin, Pathian hming hre tûra mi dangte ṭanpuina kawngah entawn tûr min hnutchhiah a. (Johana 17:6) Chutiang bawkin, tûn laiah pawh betu dikte chuan mite chu Pathian hming te, a thiltum te, leh a miziate an zirtîr a ni.

9 Pathian mite chuan mahni hmasial lo hmangaihna dik an inlantîr tawn. Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti. (Johana 13:35) Kristian hmasate chuan chutiang inhmangaih tawnna chu an nei a. Bible thu bula innghat hmangaihna chuan hnam inan lohna te, dinhmun inan lohna te, leh hnam inthlîar hranna te tihbuaia awm lovin, mite chu ṭhen hran theih rual loh inunauna nghet tak a neihtîr a ni. (Kolossa 3:14) Sakhaw dik lova awmte chuan chutiang inhmangaihna chu an nei lo. Chu chu engtin nge kan hriat theih? Hnam leh chi inan loh avâng mai maite’n an inthat a ni. Kristian dikte chuan an Kristian unaute emaw, mi dangte emaw thah nân hriamhrei an chelek ve ngai lo. Bible chuan: “He miah hian Pathian fate leh diabola fate a hriat a ni; tupawh felna ti lo chu Pathiana chhuak a ni lo, a unau hmangaih lova pawh chu Pathiana chhuak a ni hek lo. . . . Kan inhmangaih tawn ṭheuh tûr a ni, tih hi; Kaina, mi sual laka mi, mahni unau thattu ang khân awm lovin,” tiin a sawi a ni.—1 Johana 3:10-12; 4:20, 21.

10 Hmangaihna dikah chuan mi dangte thah loh mai aia tam a tel ngei mai. Kristian dikte chuan an hun te, tha leh zung te, leh sum leh paite chu infuih tawn nân leh inṭanpui  tawn nân mahni hmasial lo takin an hmang a ni. (Hebrai 10:24, 25) Mangan hunah an inṭanpui tawn a, rinawm takin an incheibâwl tawn bawk. Dik takin, ‘mi zawng zawng chunga thil ṭha’ ti tûra Bible fuihna chu an nunpui a ni.—Galatia 6:10.

11 Kristian dikte chuan Isua Krista chu chhandamna atâna Pathian mi hman a ni tih an pawm. Bible chuan: “Mi dang tuma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” tiin a sawi a. (Tirhkohte 4:12) Bung 5-naa kan lo hmuh tawh angin, Isua chuan a nun chu mihring thu âwihte tlan nân a pe a ni. (Matthaia 20:28) Chu bâkah, Isua chu lei pumpui chunga rorêl tûr, vân lam Lalrama Lalber atâna Pathian ruat a ni bawk. Tin, Pathian chuan chatuana nunna neih kan duh chuan, Isua thu âwih tûr leh a zirtîrnate nunpui tûrin min phût a ni. Chuvângin Bible chuan: “Tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang,” tiin a sawi a ni.—Johana 3:36.

12 Betu dikte chu he khawvêla mi hi an ni lo. Rom lal Pilata hmaa hruai a nih khân, Isua chuan: “Ka ram chu he khawvêla mi hi a ni lo,” a ti a. (Johana 18:36) Khawi ramah pawh chêng se, Isua hnungzuitu dik takte chu Isua vân lam Lalram khua leh tuite an ni a, he khawvêl politics lamah an tualdâwih tlat a ni. Politics avânga buainaahte an tel ve lo. Mahse, Jehova betute chuan mahni duh thlannaa politics pâwl zâwmtu te, inthlannaa ding te, a nih loh leh vote thlâk tute chu chutianga ti lo tûrin an dang lo. Politics thilah tualdâwih mah se, Pathian betu dik takte chuan ram dân chu an zâwm tlat a ni. Engvângin nge? Bible-in anni chu ‘an chunga rorêltute thu thua awm’ tûra thu a pêk vâng a ni. (Rom 13:1) Mahse, Pathian thupêk leh politics inkaihhruaina a inkalh  hunah, betu dikte chuan: “Mihring thu aiin Pathian thu kan zâwm zâwk tûr a ni,” titu tirhkohte entawn tûr siam chu an zui a ni.—Tirhkohte 5:29; Marka 12:17.

13 Isua hnungzuitu dikte chuan mihringte beisei tûr awmchhun chu Pathian Ram chauh a nih thu an puang chhuak. Isua chuan: “He ram chanchin ṭha hi hnam zawng zawng  hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi lâwk a. (Matthaia 24:14) Isua hnungzuitu dikte chuan mite chu an harsatnate sukiang tûra mihring sawrkar ni lovin, Pathian vân lam Lalram chauh rinchhan zâwk tûrin an fuih a ni. (Sâm 146:3) Isua’n: “I ram lo thleng rawh se. I duhzâwng vâna an tih angin leia mi’n ti rawh se,” tiin, chu sawrkâr ṭha famkim chu dîl tûrin min zirtîr a. (Matthaia 6:10) Bible chuan chu vân lam Lalramin “hêng [tûn laia ding mêk] ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi lâwk a ni.—Daniela 2:44.

14 Tûna kan sawi tâkte ṭanchhanin, hêng zawhnate hi inzâwt ang che: ‘Eng sakhuain nge an zirtîrnaah Bible ṭanchhan tlat a, Pathian hming mite hnêna hriattîr? Eng pâwlin nge Pathian duhzâwng hmangaihna lantîr a, Isuaa rinna lantîr bawk a, mihringte beisei tûr awmchhun chu Pathian Ram chauh a ni tih puang chhuak? Eng pâwl hi nge khawvêla mi ni lo? He khawvêla sakhua zawng zawng zîngah hian, eng sakhuain nge chûng thil phût zawng zawngte chu tlin?’ tiin. Chutianga zâwmtu chu Jehova Thuhretute an ni tih thilthlengte chuan chiang takin a târ lang a ni.—Isaia 43:10-12.

ENG NGE I TIH ANG?

15 Pathian tilâwm tûr chuan amah rin ringawt chu a tâwk lo. Bible chuan ramhuaite meuh pawhin Pathian a awm tih an rin thu a sawi si a. (Jakoba 2:19) Mahse, anni chuan Pathian duhzâwng an ti lo va, Pathian pawm an ni hek lo. Pathian pawm ni tûr chuan, amah a awm tih kan rin mai a tâwk lo; a duhzâwng kan tih a ngai bawk a ni. Tin, sakhaw dik lo ata inla hrangin, sakhaw dik chu kan vuan tûr a ni bawk.

 16 Tirhkoh Paula chuan sakhaw dik lo biaknaah kan inhnamhnawih tûr a ni lo tih min hrilh a. Hetiang hian a ziak a ni: “‘“An zîng ata lo chhuak ula, ahrangin awm rawh u, thil bawlhhlawh rêng rêng pawh dek suh u,” Lalpan a ti,’ chutichuan, ‘Ka lâwm ang che u,’” tiin. (2 Korinth 6:17; Isaia 52:11) Chuvângin, Kristian dikte chuan sakhaw dik lo nêna inzawmna rêng rêng an nei lo.

17 Sakhaw dik lo zawng zawng chu “Babulon Khaw Ropui” pêng vek a nihzia Bible chuan a târ lang a. * (Thu Puan 17:5) Chu hming chuan Nova hun laia Tuilêt a thlen hnua sakhaw dik lo rawn inṭanna hmun, hmân lai Babulon khua chu min hriatchhuahtîr a ni. Tûn laia sakhaw dik lo zirtîrna leh thil chîn tlânglâwnte zînga tam takte hi hmân lai Babulon aṭanga inṭan a ni. Entîr nân, Babulon mite chuan Pathian pakhata mi pathum awm (trinity) an bia a. Tûn laiah pawh sakhaw tam takte thurin bul ber chu Trinity a ni. Mahse, Bible chuan Pathian dik pakhat chauh, Jehova a awm thu leh Isua Krista chu a Fapa a nih thu min zirtîr thung. (Johana 17:3) Babulon-ho chuan mihringte hian an thih hnua la dam zui zêl thlarau thi thei lo an nei tih an ring a, chu chuan hremhmuna hrehawm a tawrh theih an ring bawk. Tûn laiah pawh, miin hremhmun meia hrehawm tuar thei thlarau thi thei lo an nei tih sakhaw tam tak chuan a zirtîr a ni.

18 Hmân lai Babulon-ho biakna chu khawvêl pum puia a darh chhuah vek avângin, tûn lai Babulon Khaw Ropui chu khawvêl puma sakhaw dik lo inzawmkhâwm anga sawi theih a ni a. Tin, Pathian chuan chu sakhaw dik lo inzawmkhâwm chu a tâwp thut dâwn tih a sawi lâwk a ni. (Thu Puan 18:8) Chuvângin, Babulon Khaw Ropui nêna inzawmna  rêng rêng neih loh a pawimawhzia chu i hmu thiam em? Pathian Jehova chuan hun a la awm laia “a chhûng ata chhuak” thuai tûrin a duh che a ni.—Thu Puan 18:4.

A mite ruala Jehova rawng i bâwl chuan, i hloh zawng zawng aia tam i chhar ngei ang

19 Sakhaw dik lo thil chînte bânsan i tum avângin, ṭhenkhat chuan an kâwm duh lo mai thei che a. Mahse, a mite ruala Jehova rawng i bâwl chuan, i hloh zawng zawng aia tam i chhar ngei ang. Isua zui an duh avânga thil dang kalsantu zirtîr hmasate ang khân, thlarau lam unau tam tak i nei ang. Nangmah hmangaih tak taktu che Kristian dik maktaduai têlte awmna khawvêl pum huap chhûngkaw hung tak zînga mi i lo ni bawk ang. Chu bâkah, “hun lo la thleng tûra” chatuana nun beiseina ropui tak chu i nei bawk ang. (Marka 10:28-30) Engtik hunah emaw chuan, tûna i rinna avânga nangmah kalsantute chuan Bible zirtîrna chu chîkin, anni pawh Jehova betu an rawn ni ve mai thei asin.

20 Bible chuan Pathianin he khawvêl suaksual hi a rawn titâwp thuai dâwn a, a Lalram awpna hnuaia remna khawvêl tharin a rawn thlâk dâwn tih min zirtîr a ni. (2 Petera 3:9, 13) Chu khawvêl chu a va ropui dâwn êm! Chu felna khawvêl tharah chuan sakhua pakhat chauh leh biakna dik pakhat chauh chu a awm tawh ang. Chuvângin, tûn aṭanga biakna dika lût thei tûra a ṭûl ang anga hma lâk chu a finthlâk hle lo vang maw?

^ par. 17 Babulon Khaw Ropuiin khawvêla sakhaw dik lo inzawmkhâwm ai a awh chhan hriat chian lehzual nân, phêk 220-21-naa Thu Belhna chu en rawh.