A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 THU BELHNA

Lalpa Zanriah—Pathian Chawimawitu Hun Serh Chu

Lalpa Zanriah—Pathian Chawimawitu Hun Serh Chu

KRISTIANTE chuan Krista thih Hriatrengna hun serh hmang ṭhîn tûra thupêk chu an dawng a. He hun serh hi “Lalpa zanriah” tia koh a ni. (1 Korinth 11:20) Chu chu engvângin nge thil pawimawh tak a nih? Chu hun serh chu engtik hunah leh eng anga hman tûr nge a nih?

Isua Krista chuan he hun serh hi C.E. 33, Judate Kalhlên Kût zânah a hmang ṭan a ni. Kalhlên Kût chu kum tin Juda thla Nisan ni 14-a neih ṭhin a ni a. Nisan thla chu March thla chawlhkâr hmasa ber hnu lama thla de ṭantîr hmuh theih hun aṭanga chhiar ṭan a ni a. Tichuan, Judate chuan ni 14 chhiar chhovin, chu mi nî, ni tlâk hnuah Kalhlên Kût chu an hmang ta ṭhîn a ni.

Isua chuan a zirtîrte nên Kalhlên Kût an hman hnuah Juda Iskariota chu chhuahtîrin, Lalpa Zanriah chu a hmanpui ṭan ta a. He zanriah hian Judate Kalhlên Kût ai chu a rawn awh ta a; chuvângin, kum khatah vawi khat chauh hman tûr a ni.

Chanchin Ṭha Matthaia ziak chuan heti hian a sawi a ni: “Isuan chhang a la a, mal a sâwmsak a, a phel a; tin, zirtîrte hnênah chuan a pe a, ‘La ula, ei rawh u; hei hi ka taksa a ni,’ a ti a. Tin, no a la a, lâwm thu a sawi a, an hnênah a pe a, ‘In zain in rawh u; hei hi ka thisen, sualte  ngaihdam nâna mi tam tak tâna chhuak tûr, thuthlunna chu a ni,” tiin.—Matthaia 26:26-28.

Isua’n chu chhang leh uain chu a taksa tak takah leh a thisen tak takah a chantîr niin mi ṭhenkhat chuan an ring a. Amaherawhchu, he chhang a sem lai hian Isua chu a la thi si lo. Isua tirhkohte chuan a taksa chu an ei tak takin, a thisen chu an in tak tak em? Hnai lo ve, chu chu hring ei nihna leh Pathian dân bawhchhiatna a ni dâwn si a. (Genesis 9:3, 4; Leviticus 17:10) Luka 22:20 sawi dânin, Isua chuan: “He no hi ka thisena thuthlung thar chu a ni, in aia chhuak tûra chu,” tiin a sawi a. Chu no chu ‘thuthlung tharah’ a chang tak tak em? Thuthlung chu intiamna a ni a, a khawiha han khawih theih thil a nih loh avângin, chu chu thil theih a ni lo vang.

Chuvângin, chhang leh uain chu entîr nei chhinchhiahna mai a ni. Chhang chuan Krista taksa ṭha famkim chu a entîr a. Isua chuan Kalhlên Kût hmannaa chhang bâng awm chu a hmang a ni. Chhang chu dawidim, a nih loh leh chawl tel miah lova siam a ni. (Exodus 12:8) Bible-ah chuan dawidim chuan sual a entîr a. Chuvângin, chhang chuan Isua hlan tûr taksa ṭha famkim, sualna rêng nei lo ai chu a awh a ni.—Matthaia 16:11, 12; 1 Korinth 5:6, 7; 1 Petera 2:22; 1 Johana 2:1, 2.

Uain sen chuan Isua thisen chu a entîr a. Chu thisen chuan thuthlung thar chu a nemnghet a ni. Isua chuan a thisen chu “sualte ngaihdam nâna” chhuak a nih thu a sawi a. Chutiang chuan mihringte chu Pathian mit hmuhah an lo thianghlim theiin, Jehova nên thuthlung thar an siam thei ta a ni. (Hebrai 9:14; 10:16, 17) He thuthlung, a nih loh leh intiamna avâng hian Kristian rinawm 1,44,000-te chu vânah an kal thei dâwn a. Chutah chuan, mihring zawng zawngte tâna malsâwmna thlen tûrin, lalte leh puithiamte angin rawng an bâwl dâwn a ni.—Genesis 22:18; Jeremia 31:31-33; 1 Petera 2:9; Thu Puan 5:9, 10; 14:1-3.

Tute’n nge Hriatrengna chhang chu ei ang a, uain chu in ang? Chu thuthlung thara thu thlunpuite—vân lam beiseina neitute chauhvin—chhang chu an eiin, uain chu an in tûr a ni. Pathian thlarau thianghlim chuan chûng mite chu vâna lalte ni tûra thlan an nihzia a hriat chiantîr a. (Rom 8:16) Anni chu Isua’n Lalram thu a thlunpui bawk a ni.—Luka 22:29.

 Lei Paradis-a chatuana nun beiseina neitute chuan eng angin nge Hriatrengna chu an hman ang? Isua thupêk chu zâwmin, Lalpa Zanriah hmanaah chuan ei a, intu ang ni lovin, zah taka lo thlîrtu angin an tel a ni. Kum tinin Nisan ni 14 ni tlâk hnuah, Jehova Thuhretute chuan Lalpa Zanriah chu an hmang ṭhîn. Khawvêl pumah hian vân lam nun beiseina neia inchhâlte chu mi tlêm tê mah ni se, he hun serh hi Kristian zawng zawngte tân thil hlu tak a ni a. Chu hun chu mi zawng zawngin Pathian Jehova leh Isua Krista lantîr hmangaihna chungnung bîk tak kan ngaihtuah ṭheuh theihna hun a ni.—Johana 3:16.