A chhûng thu-ah lût rawh

Secondary menu-ah lût rawh

Jehova Thuhretute

Mizo

Engtin Nge Bible I Thlîr?

Engtin Nge Bible I Thlîr?

Bible chu . . .

  • tihchingpen tawh niin i hria em?

  • thawnthu phuahchawp niin i hria em?

  • Pathian Thu niin i hria em?

 BIBLE SAWI DAN CHUAN

“Pathian Lehkha Thu zawng zawng hi Pathian thâwk khuma pêk a ni.”—2 Timothea 3:16, O.V. Reference.

I ṬANGKAIPUI THEIH DAN

Nuna zawhna pawimawh leh lian takte chhânna lungawithlâk tak i hmu thei.—Thufingte 2:1-5.

I nî tin nun atâna kaihhruaina rin tlâk a ni thei.—Sâm 119:105.

Nakin hun atâna beiseina dik tak i nei thei.—Rom 15:4.

 BIBLE SAWI CHU KAN RING THEI EM?

Thei e, a lo berah pawh chhan pathum avângin:

  • Mak taka a chhûng thu a inremna. Bible chu kum 1,600 aia rei chhûnga mi 40 vêl ziah a ni a. A ziaktute a tam zâwk chu hmuh pawh an inhmu ngai lo. Chutichung pawhin, a bu pumin a inrem vek a, thupui pakhat a nei a ni!

  • Thilthleng chanchin dik. Hmân lai thilthleng chanchin ziaktute chuan an mite tlâwmna chu an thupbo ṭhîn a. Chu mi nêna inkalh takin, Bible ziaktute chuan mi mal ang leh a hnam anga an tlin lohnate chu thup lovin, a nih ang angin an ziak a ni.—2 Chronicles 36:15, 16; Sâm 51:1-4.

  • Hrilh lâwkna rin tlâk. Bible chuan thutiam Messia chu Judai ram khawtê pakhat, Bethlehem-ah a piang dâwn tih kum 700 aia tamah a sawi lâwk a. (Mika 5:2) Khawiah nge Isua chu a lo pian tâk? Chu Bethlehem khua ngeiah chuan a piang a ni!—Matthaia 2:1-6.

Bible hrilh lâwkna tam tak dangte chu a tê ber thlengin a thleng famkim a ni. Mahse, chu chu Pathian Thu aṭanga kan beisei tûr rêng a ni lâwm ni?—2 Petera 1:21.

 NGAIHTUAH TUR

Engtin nge Pathian Thu chuan i nun a tihṭhat theih?

Hêng Bible chângte hian a chhâng a ni: ISAIA 48:17, 18 leh 2 TIMOTHEA 3:16, 17.