Daniela chuan Pathian Ram leh Messia lo lan tûr chungchâng a hrilh lâwk. Babulon a tlâwm

RINAWMNA chhuanawm tak lantîrtu ṭhalai Daniela chu Jerusalem tihchhiat a nih hmain Babulon sala hruai a ni a. Amah leh Judai ram aṭanga sala hruai mi dangte hnênah a mantute chuan zalênna engemaw chen an pe a ni. Babulon-a hun rei tak a awm chhûngin, Daniela chuan Pathian malsâwmna nasa tak a dawng a, sakeibaknei pûka thihna a pumpelh bâkah, nakin hun awm dân tûr hriattîrtu inlârnate thlengin a hmu hial a. Daniela thu hrilh lâwk pawimawh ber chuan Messia leh A rorêlna chungchâng a thlûr bing a ni.

Daniela chuan Messia lo lan hun tûr a hria. Pathian mite’n Messia, a nih loh leh “hriakthiha, lal” an beisei theih hun tûr chu Daniela hnêna hrilhhriat a ni a: chu chu Jerusalem tung ding leh sa ṭha tûra thupêk chhuah aṭanga kum hapta 69-ah a ni. Hapta pângngaiah chuan ni sarih a awm a; kum haptaah chuan kum sarih a awm a ni. Chu thupêk chu Daniela hun a liam hnu hun rei tak, B.C.E. 455-ah tihchhuah a ni a. Chuta ṭanga inṭanin, kum 483-a rei “hapa” 69 chu, C.E. 29-ah a tâwp a ni. A dawta thuziakah hian, chu mi kuma thilthleng chu kan hmu ang. Daniela chuan Messia chu sual thawi nâna “tihbo,” a nih loh leh tihhlum a nih tûr thu a hmu lâwk bawk a ni.—Daniela 9:24-26.

Messia chu vânah Lalber a ni ang. Inlârnaa vân ropui tak a hmuhnaah, Daniela chuan “mihring fapa ang” tia sawi Messia chuan Pathian Jehova lalṭhutthlêng ngei a pan lai chu a hmu a. Pathian Jehova chuan a hnênah chuan “rorêlna te, ropuina te, ram te” a pe a ni. Chu Lalram chuan chatuan a daih ang. Daniela chuan Messia Lalram chungchânga chanchin phûrawm tak mai—Lalber chuan a rorêlna chu “Chungnungbera mi thianghlimte” tia kohte a ṭâwmpui dâwn tih—a dawng bawk a ni.—Daniela 7:13, 14, 27.

Lalram chuan he khawvêl sawrkârte hi a tiboral vek ang. Pathian chuan Daniela hnênah Babulon lal Nebukadnezzara ti mangangtu mumang pakhat hrilhfiah theihna a pe a. Lalber chuan milim hrawl tak a lû rangkachak, a âwm leh a bânte tangkarua, a pum leh a malpuite dâr, a kête thîr, leh a kephah thîr leh bellei inpawlh chu a hmu a. Tlâng aṭanga lo lum lung chuan keh awlsam ber a kehphahah chuan a va delh a, thli lenbo theih khawpin a tikehsawm vek a ni. Daniela chuan milim lû rangkachakin Babulon a entîr tih aṭanga sawi ṭanin, chu milim bung hrang hrangte chuan khawvêla thuneitu lalramte indawt dân a entîr tih a hrilhfiah a. Ani chuan he khawvel suaksual chunga thuneitu lalram hnuhnûng ber a lal laiin, Pathian Ram a lo thleng dâwn tih a hmu lâwk a ni. Chu chuan he khawvêl sawrkâr zawng zawngte a tikehsawm vek ang a. Tichuan, kumkhuain ro a rêl ang.—Daniela, bung 2.

Babulon tlûk chhiat lai hmu pha tûr khawpin Daniela chu a dam rei a. Zâwlneite sawi lâwk ang ngeiin, Lal Kura chuan khawpui chu a la ta a. A hnu rei lo têah chuan, Judate chu an sal tânna ata atâwp atâwpah chhuah zalên an ni ta hrâm a—chu chu sawi lâwk anga kum 70 chhûng an in leh lo tihram a nih hnu chiahah a lo thleng a ni. Ram awptu rinawmte, puithiamte, leh zâwlneite kaihhruaina hnuaiah, Judate chuan atâwpah Jerusalem chu sa ṭhain Pathian Jehova biak in chu an tung ding leh ta a. Mahse, chu kum 483 a tâwp hunah eng thil nge lo thleng ang?

Daniela bu a ṭanchhan.