A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 ṬHEN 9

Israelte’n Lal Neih An Ngên

Israelte’n Lal Neih An Ngên

Israel lal hmasa ber, Saula chuan Pathian Jehova thu a âwih lo. Pathianin chatuan lalram atâna thu a thlunpui Davida chuan lalna a chang ta

SAMSONA thih hnu chuan, Samuela chu Israel rama zâwlnei leh rorêltu a ni a. Israelte chuan a hnênah hnam dangte anga lal neih an duh thu an hrilh châmchi a. Pathian Jehova tân an thil ngen chu thil huatthlala tak mah ni se, Samuela chu an ngenna tihhlawhtlinsak tûrin a hrilh a. Pathianin mi inngaitlâwm tak Saula chu lal atân a thlang ta a ni. Mahse, a hnuah chuan Lal Saula chu a lo chapovin, thu a âwih ta lo va. Pathian Jehova chuan lal chu a hnâwl a, Samuela chu mi dang, tleirâwl Davida chu lal atâna ruat tûrin a hrilh a ni. Amaherawhchu, Davida a lal hmain kum tam tak a liam ang.

Davida chuan Saula sipaia ṭang a ute chu a va tlawh a; chutih lai chuan tleirâwl mai a la nih a rinawm hle. Sipai zawng zawngte chuan hmêlma sipai pakhat, anmahni leh an Pathian cho rengtu mi hrawl tak Goliatha chu an hlau hle a ni. Davida chu a thinur hle a, a mala inbeihpui tûra mi hrawl sâwmna chu a pawm ta a. Chu tleirâwl chu virvawm pakhat leh lung tê tlêm azâwng kengin, a beih tûr feet kua laia sâng mi hrawl chu hmachhawn tûrin a kal chhuak ta a ni. Goliatha’n a lo nuihzat chuan, Davida chuan Pathian Jehova hminga bei tûr a nih miau avângin mi hrawl aia a inthuam ṭhat zâwk thu a hrilh ta! Davida chuan lung tê pakhat chauhvin Goliatha chu a that ta a, mi hrawl ngûnhnâm ngei chuan a lu chu a tan ta a. Philistia sipaite chu thla phang takin an tlânchhe ta a ni.

Atîr chuan Saula chuan Davida huaisenna chu a ngaisâng hle a, a sipaite chungah a dah a. Mahse a hnuah chuan Davida hlawhtlinna chu nasa takin a thîk ta a ni. Davida chu a nunna chhan tûra a tlân chhiat a ngai ta a, kum tam tak chhûng râl tlân angin a awm a ni. Chuti chung pawhin, Lal Saula chu Pathian Jehova ruat a ni tih a ngaihtuah tlat avângin, Davida chu amah thah tumtu lal lakah chuan a rinawm reng a. A tâwpah Saula chu indonaah a thi a. Chu mi hnu lawkah chuan Pathian Jehova tiam ang ngeiin Davida chu lal a lo ni ta a ni.

“A ram lalṭhutthlêng chu kumkhua atân ka tinghet ang.” 2 Samuela 7:13

Lal a han nih chuan Davida chuan Pathian Jehova biak in sak châkna nasa tak a nei a. Amaherawhchu, Pathian Jehova chuan a thlahte zînga pakhatin a sa ang tih Davida chu a hrilh a ni. Chu a thlah chu a fapa Solomona a ni a. Mahse, Pathian chuan Davida hnênah: Lal dangte ang lo takin a thlahte chu an lal chho zêl dâwn, tih thuthlun phûrawm tak thlunpuiin mal a sâwm a. Chu chuan a tâwpah chuan Eden huana Pathian thutiam Chhan Chhuaktu, a nih loh leh Thlah chu a rawn hring ang. Chu chu Messia a lo ni ang; a awmzia chu Pathian ruat “Hriak Thiha” tihna a ni a. Pathian Jehova chuan Messia chu chatuan daih tûr sawrkâr, a nih loh leh Lalram-a Rorêltu a ni ang tih a tiam a ni.

Chûng thutiamte chunga a lâwm êm avângin, Davida chuan biak in sak nâna mamawh bungrua leh rangkachak leh tangkaruate chu a chhêk khâwm thûr mai a. Thlarauva thâwk khum fakna hla tam tak pawh a phuah bawk. A thih dâwn hnaih lamah, Davida chuan: “LALPA thlarau chuan keimah mi hmangin a sawi a: a thu chu ka leiah a awm,” tiin a sawi a ni.—2 Samuela 23:2.

1 leh 2 Samuela; 1 Chronicles; Isaia 9:7; Matthaia 21:9; Luka 1:32; Johana 7:42 a ṭanchhan.