A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 THAWNTHU 107

Stephena Chu Lunga Den A Ni

Stephena Chu Lunga Den A Ni

HETA mipa thingthi hi Stephena a ni. Isua zirtir mi rinawm a ni a. Mahse tuna a chunga thleng hi en teh! Heng mite hian lung lian pui puiin amah an deng a. Engvanginnge he thil rapthlak hi ti khawpa Stephena an huat? I en ang u.

Thil mak tak ti turin Pathianin Stephena a tanpui a. Heng mite hian chu chu an duh lo va, tichuan mite thutak a zirtir chungchangah an inhnial a. Mahse Pathianin Stephena chu finna nasa tak a pe a, Stephena chuan heng mite hian thil dik lo an zirtir a ni tih a lantir a. Chu chuan a tithinur lehzual a. Tichuan an man a, a chungthua dawt sawi turin mipui an ko va.

Puithiam lalin Stephena a zawt a: ‘Reng thilte hi a dik em?’ tiin. Bible-a mi thusawi tha tak hmangin Stephenan a chhang a. A sawi tawpah, hmanah mi tha loten Pathian zawlneite an huatzia a hrilh a. Tin: ‘Chung mite ang chiah chu in ni. Pathian chhiahhlawh Isua in tihlum a, Pathian dante lah in zawm lo,’ a ti a. Chu chuan sakhaw hruaitute thin a tirim em em a! Thinrimin an ha an thial a. Stephena chu a dak a: ‘En teh u! Vanah Pathian dinglama Isua ding ka hmu,’ a ti a. Chu veleh heng mite hian an beng an hup a, Stephena an pan a. An man a, khawpui pawnah an hnuk chhuak a.

Chutah chuan kawrte an phelh a, tlangval Saula hnenah a kawl turin an pe a. Saula i hmu em? Tichuan mi thenkhatin Stephena chu lungin an deng ta a. Stephena a thingthi a, i hmuh ang hian, Pathian hnenah a tawngtai a: ‘Jehova, he thil tha lo vang hian anmahni hrem suh ang che,’ a ti a. An zinga thenkhat chu sakhaw hruaitute tihder an ni tih a hria a. Chumi zawhah chuan Stephena chu a thi ta a.

Miin i chunga thil tha lo an tihin, tihnat let i tum nge anmahni tina turin Pathian i ngen em? Chu chu Isua emaw Stephena emawin an tih chu a ni lo. An chunga ngil nei lotute chungah pawh ngil an nei a. Entawn tur an siam chu i entawn ang u.

Tirhkohte 6:8-15; 7:1-60.