A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Ka Bible Thawnthu Lehkhabu

 THAWNTHU 103

Pindan Kalh Chhûngah

Pindan Kalh Chhûngah

PETERA leh Johanan Isua taksa awmna thlan an kalsan hnuah, Mari chu amaha hnutchhiah a ni a. A tap a. Milem hnuhnung bera kan hmuh tawh ang khan, a kun a, thlan chhung a bih a. Chutah chuan vantirhkoh pahnih a hmu a! ‘Engvanginnge i tah?’ tiin an zawt a.

Mari chuan: ‘Ka Lalpa an la bo tawh a, khawiahnge an dah ka hre lo,’ tiin a chhang a. Tin Mari a lehhawia, mi pakhat a hmu a. Chu mi chuan: ‘I zawn chu tunge ni?’ tiin amah a zawt a.

Mari chuan chu mi chu huanpu a niin, Isua taksa a la niin a ring a. Chuvangin: ‘I la bo a nih chuan khawiahnge i dah min hrilh rawh,’ a ti a. Mahse taktakah chuan, chu mi chu Isua a ni. Marin a hriat lob taksa a pu a ni. Mahse a hminga a han koh chuan, Mari chuan Isua a ni tih a hria a. A tlan a zirtirte a hrilh a: ‘Lalpa ka hmu ta!’ tiin.

A hnuah chhunah, zirtir pahnih Emmau khuaa kea an kal laiin mi pakhatin a rawn fin a. Isua tihhlum a nih tawh vangin zirtirte chu an ngui em em a. Mahse an kal pahin, chu mi chuan an awm tinuam deuhtu Bible-a mi thil tam tak a hrilhfiah a. A tawpah, chaw ei tura an chawlhin, chu mi chu Isua a ni tih zirtirte chuan an hre ta a. Tin Isua chu a lang leh ta lo va. Chung zirtir pahnihte chu a chanchin tirhkohte hrilh turin Jerusalem thlengin rang takin an kir a.

Chumi chhung chuan Petera hnenah pawh Isua a lang a. Chu chu an hriatin mi dangte thin a thawng a. Tin chung zirtir pahnihte chu Jerusalem-ah an kal a, tirhkohte an hmu chhuak a. Kawnga an hnena Isua a lan dan chu an hrilh a. Chumi chu an sawi lai mekin, thil mak tak lo awm i hria em?

Milem hi en teh. Kawngka kalh a ni chungin pindanah Isua a lo lang a. Zirtirte hlimzia mai chu! Chu chu ni hlimawm a ni lawm ni? A zuitute hnena tun thlenga Isua lo lan zat i chhiar thei em? Vawi nga niin i chhiar em?

Isua lo lan laiin an hnenah tirhkoh Thoma a awm lo va.Chuvangin zirtirte chuan: ‘Lalpa kan hmu tawh,’ tiin amah an hrilh a. Mahse Thoma chuan amah ngeiin lsua a hmuh hma loh chuan a awih lovang a ti a. Aw le, ni riat hnuah zirtirte chu pindan kalh chhungah an awm leh a. He mi tum hi chuan an hnenah Thoma a awm a. Thawkkhatah, pindanah chuan Isua a lo lang a. Tunah chuan Thoman a awih ta.

Johana 20:11-29; Luka 24:13-43.