A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Ka Bible Thawnthu Lehkhabu

 THAWNTHU 77

An Kûn Dâwn Lo

An Kûn Dâwn Lo

HENG tlangval pathumte chanchin i hriat i la hrereng em? Aw, an tana tha lo ei duh lotu Daniela thiante kha an ni. Babulon-mite chuan Shadraka, Meshaka leh Abednegoa an vuah a. Mahse tunah han en teh. Engvanginnge mi dang ang bawka he milem lian pui hnenah hian an kun ve loh? I hmu chhuak ang u.

Amah Jehova ngeiin a ziak Thusawm an vuah dante kha i la hrereng em? Chumia pakhat chu: ‘Keimah chauh lo chu pathian dang engmah i be tur a ni lo,’ tih hi a ni. Heta tlangvalte hian, thil tih awlsam a ni lo chungin, chu dan chu an zawm a ni.

Babulon lalber Nebukadnezzara chuan he milim a siam hi chawimawi turin mi pawimawh tam tak a ko va. Mi zawng zawng hnenah: ‘Tawtawrawtte, tingtangte leh tumrikna hmanraw dangte ri in hriat hunah, kuna he rangkachak milim hi be tur in ni. Tupawh kuna be lo apiang chu rawhtuina mei alh saah paih luh nghal a ni ang,’ tiin a sawi zo hlim hlawl a ni a.

Nebukadnezzaran Shadraka, Meshaka leh Abednegoa te an kun lo tih a hriatin a thinrim em em a. A hnenah a hruaitir a. Kunna tur remchang dang a pe a. Mahse tlangvalte chuan Jehova an ring a. ‘A rawng kan bawl kan Pathian chuan min chhandam thei a. Mahse min chhandam loh pawhin, i rangkachak milim hnenah kan kun lo vang,’ tiin Nebukadnezzara chu an hrilh a.

Chu chu a hriatin Nebukadnezzara chu a thinrim lehzual a. A kiang hnaiah rawhtuina mei a awm a: ‘Rawhtuina mei kha a hma aia a let sariha sa zawkin tisa rawh u!’ tiin thu a pe a. Tichuan a sipai ruala chak berte chu Shadraka, Meshaka leh Abednegoa te chu a phuartir a, rawhtuinaah a paih luhtir a. Rawhtuina chu a sa khawp a, mi chakte chu meialhin a tihlum a. Mahse an paih luh mi pathumte chu engtinnge an awm?

Lalber chuan rawhtuina chu a en a, a hlau ta em em a. ‘Mi pathum phuarin rawhtuina meialh saah kan paih lut a ni lawm ni?’ tiin a zawt a.

‘Aw, kan paih luh kha,’ tiin chhiahhlawhten an chhang a.

‘Mahse meia kal vel mi pali ka hmu. Phuar an ni lo va, meiin anmahni a tina lo. Tin palina chu pathian angin a Jang,’ a ti a. Lalber chu rawhtuina kawngka hnaiah a kal a, ‘Shadrak! Meshak! Abednego! nangni Pathian Chungnungbera chhiahhlawhte u, lo chhuak rawh u,’ tiin a au chhuak a.

An lo chhuah chuan, tihnat an nih lohzia mi tinin an hmu thei a. Tin lalber chuan: ‘Shadraka, Meshaka leh Abednegoa te Pathian chu fakin awm rawh se! Anmahni Pathian chauh lo chu eng pathian mah biaa an kun dawn loh vangin a vantirhkoh a tir a, anmahni a chhandam ta,’ a ti a.

Hei hi Jehova laka rinawmnaa kan entawn tur tha a a ni.

Exodus 20:3; Daniela 3:1-30.