A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 THAWNTHU 82

Mordekaia Leh Estheri

Mordekaia Leh Estheri

JERUSALEM-a Ezra kal hma kum tlem teah kir leh ila. Mordekaia leh Estheri chu Persia rama Israel-mi pawimawh ber an ni. Estheri chu lalnu a ni a, tin a pa unau Mordekaia chu thuneihnaah lalber dawttu a ni. Hei hi engtinnge a lo nih i en ang u.

Estheri chu a la tet em em laiin a nu leh pa an thi a, tichuan Mordekaian a chawm lian a. Persia lalber Ahasueran Shushan khawpuiah lal in a nei a, Mordekaia chu a chhiahhlawhte zinga pakhat a ni a. Ni khat chu lalber nupui Vashti chuan a thu a awih lo va, tichuan lalber chuan lalnu ni turin nupui thar a thlang a. A thlan hmeichhia chu i hria em? Aw, nula hmeltha Estheri a ni.

He miten kuna chibai an buk mi chapo hi i hria em? Hei hi Hamana a ni. Persia-ah mi pawimawh em em a ni. Hamana chuan heta thua i hmuh Mordekaia pawh hi a hmaa kun ve turin a duh a. Mahse Mordekaia chu a kun dawn lo. Chutiang mi tha lo hmaa kun chu dikin a hre lo. Chu chuan Hamana a tithinrim em em a. Chuvangin hetiang hian a ti a.

Hamana chuan Israel-mite chungchang dawtthu lalber a hrilh a. ‘I dan zawm lotu mi tha loho an ni. Tihhlum tur an ni,’ tiin. Ahasuera chuan a nupui Estheri chu Israel-mi a nih a hre lo va. Tichuan Hamana thu a ngaihthla a, eng niah emaw Israel-mite zawng zawng tihhlum tur tih dan a siam ta a.

Mordekaian dan chungchang chu a hriatin a mangang em em a. Estheri hnenah thu a chah a: ‘Lalber hnenah min chhandam turin ngen rawh,’ tiin. Sawm i nih loh chuan lalber hnena kala va hmuh chu Persia-ah dan a ni lo va. Mahse sawm lohvin Estheri chu a lut a. Lalber chuan a rangkachak tiang a lamah a lek a, chu chu tihhlum loh tur tihna a ni. Estherin lalber leh Hamana chu ruai ropui takah a sawm a. Chutah chuan lalber chuan Estherin a lakah duhsakna enge a duh a zawt a. Estheri chuan a tukah ruai danga amah leh Hamana an lo kal chuan a hrilh ang tih a sawi a.

Chu ruaiah chuan Estherin lalber chu a hrilh a: ‘Keimah leh ka mite tihhlum tur kan ni,’ tiin. Lalber thin a ur a. ‘Tunge chutiang thil chu ti ngam?’ tiin a zawt a.

Chu pa, hmelma chu he Hamana mi tha lova hi a ni!’ Estherin a ti a.

Tunah lalber chu a thinrim tak tak a. Hamana tihhlum tur thu a pe a. A hnuah lalber chuan Mordekaia chu thuneihnaah amah dawttuah a siam a. Mordekaia chuan Israel-mite chu an tihhlumna tur niah chuan an nunna tura an beih ve phalna dan a siamtir a. Tunah Mordekaia chu chutianga mi pawimawh a nih avang chuan, mi tam takin Israel-mite an tanpui a, an hmelmate laka chhandam an ni ta a.

Bible-ah Estheri bu.