A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 THAWNTHU 79

Daniela Chu Sakeibaknei Pûkah

Daniela Chu Sakeibaknei Pûkah

AW, AW! Danielan buaina ngahin a lang. Mahse sakeibakneite chuan amah an tina lo! Engvanginnge i hria em? Tuinnge Daniela chu hetah heng sakeibaknei zawng zawng nen hian dah? I hmu chhuak ang u.

Tunah chuan Babulon lalber chu a hming Daria a ni tawh a. Daniela chu a fing a, ngil a neih vangin Daniela a duh em em a. Daria chuan Daniela chu roreltu hotu ni turin a thlang a. Chu chuan lalrama mi dangte chu a thiktir a, chuvangin hei hi an ti ta a ni.

Daria hnenah an kal a: ‘Aw lalber, ni 30 chhungin i hnenah chauh lo chuan mihring emaw pathian emaw hnenah tumah an tawngtai tur a ni lo tih dan i siam tur a ni tih kan remti tlang a, Aw lalber. Tupawhin a zawm loh chuan, sakeibakneite hnenah paih luh tur a ni,’ an ti a. Chung mite chuan chu dan chu eng vangin nge siam an duh tih Darian a hre lo. Mahse thain a hria a, tichuan dan chu ziakin a dah ta a.

Dan chungchang chu Danielan a hriatin, inah a haw a, a tih thin ang bawkin a tawngtai a. Danielan Jehova hnena a tawngtai a bang lovang tih mi tha lote chuan an hria a. Daniela tihbona tura an remruat chu hlawhtling dawna a Jan vangin an hlim hle a.

Chung miten chu dan an duhna chhan Lalber Darian a hriatin, a lungngai em em a. Mahse dan chu a thlak thei si lo va, chuvangin sakeibaknei puka Daniela paih luh thu a pe tur a ni. Mahse lalber chuan Daniela chu: ‘A rawng i bawl i Pathianin a chhandam che ka beisei e,’ tiin a hrilh a.

Daria chu a mangang khawpa, chumi zan chuan a muhil thei lo va. A tuk zingah chuan sakeibaknei pukah a tlan a. Sawta saw amah i hmu thei a. ‘Pathian nung chhiahhlawh Daniel! A rawng i bawl Pathianin sakeibaknei lakah a chhandam thei che em?’ tiin a au chhuak a.

‘Pathianin a vantirhkoh a tir a, min tihnat loh nan sakeibaknei kate a tichip a,’ tiin Danielan a chhang a.

Lalber chu a lawm em em a. Puk ata Daniela khai chhuak turin thu a pe a. Tin Daniela tihbo tumtu mi tha lote chu sakeibaknei pukah a paih a. Puk chhuat an thlen hmain sakeibakneiten an man a, an ruhte an tikeh sawm vek a.

Tin Lalber Daria chuan a rama mipui zawng zawng hnenah: ‘Mi tinin Daniela Pathian an zah tur a ni tih thu ka pe e. Thilmak ropui tak a ti a. Sakeibaknei ei loh turin Daniela a chhandam,’ tiin lehkha a thawn a.

Daniela 6:1-28.