A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 THAWNTHU 59

Davida Tlân Bona Tûr Chhan

Davida Tlân Bona Tûr Chhan

DAVIDAN Goliatha a tihhlum hnuah, Israel sipai rual hotu Abneran ani chu Saula hnenah a hruai a. Saulan Davida a lawm em em a. A sipai rual hotuah a siam a, lalber ina cheng turin a hruai a.

A hnuah, Philistia-mite dona atanga sipai rual an haw laiin: ‘Saulan sang tam tak a tihlum, Davidan sing tam tak,’ tiin hmeichhiaten hla an sa a. Chu chuan Saula aiin Davida chu chawimawi a hlawhtir zawk vangin Saula a thiktir a. Mahse Saula fapa Jonathana chuan a thik lo. Davida a hmangaih em em a, Davida pawhin Jonathana a hmangaih ve a. Chuvangin an pahnihin thian ni reng turin thu an tiam a.

Davida chu tingtang tum thiam deuh mai a ni a, a tum ri chu Saulan ngaihnawm a ti a. Mahse ni khat chu Saula thikthuchhiatna chuan thil rapthlak tak a tihtir a. Davidan tingtang a tum laiin Saulan a fei a la a: ‘Bangah Davida ka kilh bet ang,’ tiin a khawh a. Mahse Davidan a kiansan hman a, fei chuan a fuh lo va. A hnuah Saulan Davida chu a feiin a khawh thelh leh a. Chuvangin Davida chuan a fimkhur em em tur a ni tih a hre ta a.

Saula thutiam kha i la hrereng em? Goliatha tihlumtu hnenah a nupui atan a fanu a pe ang tih a sawi a. A tawpah Saula chuan Davida hnenah a fanu Mikali a nei thei, mahse hmelma Philistia-mite 100 a tihlum hmasa tur a ni tih a hrilh a. Han ngaihtuah teh! Taktakah chuan Philistia-miten Davida an tihhlum Saulan a beisei a ni. Mahse an tihlum lo va, chuvangin Saulan a fanu chu Davida nupui ni turin a pe ta a.

Ni khat chu Saulan Jonathana leh a chhiahhlawhte zawng zawng Davida tihhlum a duh tih a hrilh a. Mahse Jonathana chuan a pa hnenah: ‘Davida tina suh. I chungah thil dik lo engmah a ti ngai lo. Thil a tih tawh apiang i tana tangkai an ni zawk. Goliatha a thah lai khan thih a huam a, i hmuhin i lawm a,’ a ti a.

Saulan a fapa thu a ngaithla a, Davida tina lo turin thu a tiam a. Davida chu a hruai leh a, a hma ang bawkin Saula inah rawng a bawl leh a. Amaherawhchu, ni khat, Davidan tumrik a tum laiin Saulan a feiin a khawh leh a. Davidan a kiansan hman, fei chuan bang a fuh a! Chu chu a vawi thumna a ni! Davida chuan a tlan bo tur a ni tih tunah chuan a hre ta!

Chumi zan chuan Davida chu ama inah a haw a. Mahse Saulan amah tihlum turin mi thenkhat a tir a. Mikalin a pa tih tum chu a hria a. Chuvangin a pasal hnenah: ‘Zanina i kal bo loh chuan, naktukah chuan i thi tawh ang,’ a ti a. Chumi zan chuan Mikalin Davida chu tukverhah a chhuahtir a. Kum sarih chhung vel chu Saulan a hmuh theih loh nan Davida chu hmun dang dangah a biru sawn a.

1 Samuela 18:1-30; 19:1-18.