KUM tam tak a rai a. Nova fapate chuan fate tam tak an nei a. Tin an fate chu an lo puitling a, fate tam lehzual an nei a. Leilungah mi tam tak an awm thuai a.

Chung mite zinga pakhat chu Nova tuchhuan Nimroda an tih chu a ni. Mite leh ramsate pel a tihlum thintu mi tha lo a ni. Mi dangte awp turin Nimroda chuan lelberah a insiam bawk a. Pathianin Nimroda chu a duh lo.

Chutih lai chuan mi zawng zawngin tawng pakhat an hmang a. Anmahni a awp theih nan Nimroda chuan awm khawmtir vek a duh a. Enge a tih i hria em? Khawpui leh a chhunga insang lian pui sa turin mipui chu a hrilh a. Milemah hian leirawhchan an siam lai en teh.

Pathian Jehovan chu insak chu a lawm lo. Pathian chuan mite chu pem chhuaka leilung zawng zawnga cheng turin a duh a. Mahse mite chuan: ‘Hawh u! khawpui leh insang, a chhip van tawng khawpa sang i sa ang u. Tichuan kan hming a thang ang!’ an ti a. Mite chuan chawimawina chu anmahni tan an duh a ni, Pathian tan ni lovin.

Chuvangin Pathianin mipui insang sak chu a tawptir a. A tihdan i hria em? Mite chu tawng pakhat aia tama thawk leh khata tawng hranga tawngtirin. Insatute chu an inhrethiam tawh lo va. Hei hi an khawpui Babel emaw Babulon emaw, a awmzia “Buaina“ tia vuah a nihna chhan chu a ni.

Babel atangin mite chu an pem tan ta a. Tawng thuhmun hmang hote chu hmun danga cheng za turin an kal tan ta a.

Genesis 10:1, 8-10; 11:1-9.