Min Zirtîr bu leh Bible Zirtîrna bu hi a inang a. Kan zirtîrna hmanraw bâwma kan neih hêng hmanraw pahnihah hian thutak inang a chuang a, a târ lan dân pawh a inang bawk. Mahse, Min Zirtîr buah chuan hriat thiam awlsam tak thuziak leh chhût dân awlsam takte hman a ni a. He lehkhabu hi Bible Zirtîrna bu hriat thiam harsa tite tâna buatsaih a ni. He Min Zirtîr bu-ah hian thu belhna aiah a chhûng thuziaka awm ṭawngkam ṭhenkhat leh ngaih dânte hrilhfiahna ṭha tak a awm a. A bungte chuan hmêlhriattîrna zawhnate leh ennawnna bâwm a nei lo. Chu ai chuan, a chhûng thute chu hrilhfiahtu Bible thutakte khaikhâwmna nên tih tâwp a ni. Min Zirtîr bu chu thla khat chhûnga sem chhuah tûr zîngah tel lo mah se, Bible Zirtîrna bu ang bawkin eng hunah pawh sem theih a ni. Bible zirna kan kaihhruai hunah Min Zirtîr bua hmêlhmang danglam takte hi engtin nge kan hman theih?

KHAIKHAWMNA: Bible zirna kan kaihhruai huna kan tih dân tlângpui chu Bible Zirtîrna bua paragraph-te chhiar a, a hnua zawhna zawh a ni a, chu chu mi tam zâwk tân a ṭha tlângpui a ni. Mahse, zirpui chuan kan ṭawng hman chu a hre thiam lovin, a chhiar thiam vak lo pawh a ni thei. Chutiang a nih chuan Min Zirtîr lehkhabu chu i hmang duh mai thei. Tichuan, a bung chhûnga khaikhâwmna chu zirna atân i hmang thei a, zirpui chu a chhûng thute chu mahnia chhiar tûrin i fuih thei bawk ang. Bible thutak tinte chu zirna neih laiin minute 15 vêla rei zir theih a ni ṭhîn. Khaikhâwmnaah chuan a chhûng thute chipchiar taka telh a nih loh avângin zirtîrtu chuan zirpui mamawhte chu rilrua dah rengin ṭha takin a inbuatsaih tûr a ni. Zirtîrtu chuan a chhûng thu aṭanga zirna a kaihhruai chuan, khaikhâwmna chu ennawnna angin a hmang thei ang.

ENDNOTE: Endnote-a ṭawngkam ṭhenkhat leh ngaih dânte indawt dân chu a chhûng thuah târ lan a ni a. Zirtîrtu chuan zirna neih laiin Min Zirtîr lehkhabua endnote-te a sawpui dâwn leh dâwn loh chu thu tlûkna a siam thei a ni.