Dwoko ma Muma chiwo

 Wach mokor en ote kata fweny moa kuom Nyasaye. Muma wacho ni jonabi “ne wacho weche moa kuom Nyasaye kaluwore gi kaka roho maler ne tayogi.” (2 Petro 1:20, 21) Omiyo, janabi en ng’at ma yudo ote koa kuom Nyasaye, kae to okowo oteno ne jomamoko.​—Tich Joote 3:18.

Ere kaka jonabi ne yudo ote koa kuom Nyasaye?

 Nyasaye notiyo gi yore mopogore opogore e chiwo otene ne jonabine:

•   Weche mosendiki. Muma wuoyo kuom kamoro achiel ma Nyasaye notiyoe gi yorni. Mano en kinde ma nomiyo Musa Chike Apar ma nosendiko chuth.​—Wuok 31:18.

•   Malaike nowuoyo kodgi achiel kachiel. Kuom ranyisi, Nyasaye nooro malaika mondo onyis Musa ote ma nonego okow ne Farao ma ne locho Misri. (Wuok 3:2-4, 10) Ka ne dwarore ni jonabi oti gi weche moko sie, Nyasaye ne chiko malaike mondo ginyis jonabi gik monego gindik, mana kaka notimore ne Musa ka nonyise niya: “Ndik wechegi piny, nikech wechegi e ma atimogo singruok kodi kaachiel gi Jo-Israel.”​—Wuok 34:27. a

•   Fweny. Nitie sama janabi ne yudoga fweny koneno kendo ka pache ler. (Isaya 1:1; Habakuk 1:1) Nitie fweny moko ma ne chalo mana ka gima gitimore adier, kendo joma ne nenogi ne paro ni gin e fwenygo. (Luka 9:28-36; Fweny 1:10-17) Kinde moko, fweny ne biro ne ng’ato ka ool, kata kotimo gima chielo. (Tich Joote 10:10, 11; 22:17-21) Nyasaye bende ne nyalo kowo ote ne jonabine e yor lek ka ginindo.​—Daniel 7:1; Tich Joote 16:9, 10.

•   Noket weche e pachgi. Nyasaye notayo pach jonabine mondo gichiw ote ma nomiyogi. Mano e tiend wechegi: “Ndiko duto okudh gi much Nyasaye.” (2 Timotheo 3:16) Nyasaye notiyo gi roho maler, kata tekone, mondo “okudh” wechene e pach jotichne. Ote nowuok kuom Nyasaye, kata kamano, jonabi e ma ne yiero weche ma ne gidhi tiyogo e kowe.​—2 Samuel 23:1, 2.

Be kinde duto wach mokor wuoyoga mana kuom gik ma biro timore e kinde mabiro?

 Ooyo, weche mokor e Muma ok wuoga mana kuom kinde mabiro. Kata kamano, thoth ote moa kuom Nyasaye wuoyoga kuom kinde mabiro, kata ka po ni ok gitimo kamano achiel kachiel. Kuom ranyisi, jonabi machon mag Nyasaye ne siko siemo Jo-Israel ni giwe timbegi maricho. Siemgo ne wuoyo kuom gueth ma Jo-Israel ne dhi yudo ka giwinjo wach, kod masiche ma ne dhi yudogi ka gitamore winjo wach. (Jeremia 25:4-6) Gikone, gima notimore noluwore gi yiero ma Jo-Israel notimo.​—Rapar mar Chik 30:19, 20.

Ranyisi mag weche mokor ma ok wuo kuom kinde mabiro

•   Nitie kinde ma Jo-Israel nokwayo Nyasaye mondo okonygi, to Nyasaye nooronegi janabine mondo onyisgi ni ne ok okonyogi nikech ne gitamore luwo chikene.​—Jong’ad Bura 6:6-10.

•   Ka ne Yesu wuoyo gi Nya-Samaria moro, Yesu nowacho gik ma dhakono nosetimo ma Nyasaye kende e ma ne nyalo elone. Dhakono noluongo Yesu ni janabi kata obedo ni onge gima Yesu nosekorone e wi kinde mabiro.​—Johana 4:17-19.

•   Ka ne iyalo Yesu, jowasike noumo wang’e kae to gigoye ka ginyise niya: “Kor ane wach! En ng’a mogoyi?” Ne ok gikwa Yesu ni okornegi gik ma ne dhi timore e kinde mabiro, to ne gidwaro ni Yesu oti gi teko mar Nyasaye e fwenyo ng’at ma ne goye.​—Luka 22:63, 64.