Dwoko ma Muma chiwo

 Muma wacho maler ni Yesu ne ok okendo, kata obedo ni Muma ok wuo achiel kachiel e wi ngimane mar kend. a Par ane weche ma luwogi.

1.   Kuonde mang’eny e Muma, iwuoyo e wi joodgi Yesu kod mon moko ma ne wuotho kode e tije mar yalo kendo nochung’ kode ka ne isande, kata kamano, onge kamoro amora ma nowach ni ne okendo. (Mathayo 12:46, 47; Mariko 3:31, 32; 15:40; Luka 8:2, 3, 19, 20; Johana 19:25) Gimomiyo Muma ok wuo e wi wachni en nikech Yesu ne ok okendo.

2.   Kowuoyo e wi yiero ma ng’ato nyalo timo owuon mar weyo donjo e kend mondo otim momedore e tij Nyasaye, Yesu nowacho ne jopuonjrene kama: “Ng’at ma nyalo rwako wachno mondo otim kamano.” (Mathayo 19:10-12) Ne oketo ranyisi maber ne jogo ma noyiero weyo donjo e kend mondo giti ne Nyasaye e yo momedore.​—Johana 13:15; 1 Jo-Korintho 7:32-38.

3.   Ka pok Yesu otho, ne otimo chenro ma ne dhi miyo orit min-gi. (Johana 19:25-27) Ka dine bed ni Yesu ne okendo kata ni ne en-gi nyithindo, dine oketo chenro mondo gin bende giyud arita maber.

4.   Muma wuoyo kuom Yesu kaka ranyisi maber ne wiye udi, kata kamano, ok owuo kuome ka gima ne en gi dhako. Kar mano, Muma wacho kama: “Un chwo, dhiuru nyime hero mondeu, mana kaka Kristo bende nohero kanyakla mi nochiworene.” (Jo-Efeso 5:25) Ka dine bed ni Yesu nokendo ka en e pinyka, donge dine obedo maber ka oti gi ranyisi mare kaka wi ot e ndikono?

Be Yesu ne nigi nyithindgi mamoko?

 Ee, Yesu ne nigi nyithindgi mamoko madirom auchiel. Mago noriwo owetene ma gin Jakobo, Josef, Simon, kaachiel gi Judas kod samoro nyiminene mamoko ariyo. (Mathayo13:54-56; Mariko 6:3) Mago bende ne gin nyithind Maria kod Josef. (Mathayo 1:25) Muma wacho ni Yesu ne en wuod Maria makayo, to mano nyiso ni Maria ne nigi nyithindo mamoko.​—Luka 2:7.

Paro ma ok kare ma ji nigo e wi owete Yesu

 Mondo gisir paro mar ni Maria ne osiko ka en nyako ma silili e ngimane te, jomoko osetemo loko tiend wach motigo ni “owete.” Kuom ranyisi, jomoko wacho ni owete Yesu ne gin nyithind Josef ma ne onyuolo gi dhako machielo ka po nokendo Maria. Kata kamano, Muma wacho ni Yesu noyudo ratiro mar bedo jaloch mana kaka nosingne Daudi. (2 Samuel 7:12, 13; Luka 1:32) Omiyo ka de bed ni Josef ne nigi nyithindo ma yawuoyi madongo ne Yesu, dine gin ema gibedo gi ratiro mar bedo joloch.

 Be dibed ni wach motigo ni “owete” ne nyiso ni jogo ne gin jopuonjre Yesu kata jolupne ma ne nyiso yie kuome? Wachni ok luwre gi gima Muma wacho nikech Ndiko wacho ni nitie kinde moro ma “owetene ne ok nyis yie kuome.” (Johana 7:5) Muma nyiso pogruok mantiere e kind owete Yesu masie kod jopuonjrene.​—Johana 2:12.

 Jomoko bende paroga ni samoro owete Yesu ne gin owetene ma bathe. Kata kamano, Ndiko mag Dho-Grik nyiso pogruok mantiere e kind ‘owete,’ ‘wede,’ kod ‘owete ma bathe.’ (Luka 21:16; Jo-Kolosai 4:10) Josomo mang’eny ma nono Muma oyie ni owete Yesu gi nyiminene ne gin nyithindgi ma sie. Kuom ranyisi, buk miluongo ni The Expositor’s Bible Commentary wacho kama: “Yo maber mar winjo tiend wach motigo ni ‘owete’ . . . en ni wachno itiyogo kiwuoyo kuom nyithind Maria kod Josef, to mano nyiso ni ne gin owete Yesu ma Maria ema nonyuolo.” b