Ee obiro timo kamano. Muma kaachiel gi gik ma timore e ngimawa nyiso ni Nyasaye dwokoga lamo. Muma wacho niya: “Enomi jogo ma luore gi ma gidwaro; nowinj ywakgi bende, mi noresgi.” (Zaburi 145:19) Kata kamano, yo milemogo e ma biro nyiso ka be Nyasaye biro dwoko lamoni kata ooyo.

Gik ma Nyasaye dwaro ni joma lame otim

• Onego walam Nyasaye kende, to ok Yesu, Maria, jotakatifu, malaike, kata sanamu. Jehova Nyasaye kende e ma “winjo kwayo mar ji.”​—Zaburi 65:2.

• Onego walem ka luwore gi dwaro mar Nyasaye kaka oler e Muma.​—1 Johana 5:14.

• Onego walem kokalo kuom nying Yesu, nikech mano nyiso ni wachiwo luor ne migawo momiye. Yesu nowacho niya: “Onge ng’at ma biro ir Wuora mak mana kokalo kuoma.”​—Johana 14:6.

• Onego wabed gi yie motegno ma onge kiawa sama walemo, kendo wanyalo kata kwayo ni omedwa yie.​—Mathayo 21:22; Luka 17:5.

• Onego wabolre kendo wabed gi chuny matir. Muma wacho ni: “Kata Jehova ni malo, to odewo joma muol.”​—Zaburi 138:6.

• Onego walem gi kinda. Yesu nowacho kama: “Sikuru ka ukwayo to ibiro miu.”​—Luka 11:9.

Gik ma ok ochuno sama ng’ato lemo

• Dhok ma ng’ato wacho kata piny moae. “Nyasaye ok buon ng’ato ang’ata, to ei oganda moro amora, ng’at moluore kendo ma timo gik makare, oyiego.”​—Tich Joote 10:34, 35.

• Kaka ng’ato ochung’ kata obet. Inyalo lemo kibet, kikulo wiyi, kigoyo chongi piny, kata kichung’.​—1 Weche mag Ndalo 17:16; Nehemia 8:6; Daniel 6:10; Mariko 11:25.

• Dwol ma ng’ato tiyogo. Nyasaye nyalo dwoko lamowa bed ni walemo matek kata walemo gi chunywa.​—Nehemia 2:1-6.

• Pek mag weche ma ng’ato nyise. Nyasaye jiwowa ni ‘waket parruokwa duto kuome, nikech odewowa.’​—1 Petro 5:7.