Kal idhi e weche manie iye

Namba mar 666 Ochung’ne Ang’o e Muma?

Namba mar 666 Ochung’ne Ang’o e Muma?

Dwoko ma Muma chiwo

Kaluwore gi buk mogik e Muma, 666 en namba kata nying momi ondiek mawuok e nam ma nigi wiye abiriyo kod tunge apar. (Fweny 13:​1, 17, 18) Ondiegno en kido mochung’ne loch marang’ongo mar siasa ma locho e piny ngima e wi “dhoudi duto, gi ji mopogore opogore duto, gi dhok duto, kod ogendni duto.” (Fweny 13:7) Nying momi ondiek ni 666 nyiso ni loje mag siasa orem e wang’ Nyasaye. E yo mane?

Ok en aena kwan. Nyinge ma Nyasaye nomiyo gik moko nigi tiendgi. Kuom ranyisi, tiend nying ma Nyasaye nomiyo Abram en ni “Wuoro Oyudo Duong’,” to Ibrahim, tiende en “Wuon Ogendni,” nikech nosingone Ibrahim ni obiro bedo “wuon ogendni.” (Chakruok 17:5) E yo machalo kamano, Nyasaye nomiyo ondiek nying mar 666 kaka kido ma fwenyo timbene.

Namba auchiel ochung’ne gima orem. E Muma, kinde mang’eny nembni ochung’ne gik moko. Namba abiriyo ochung’ne gima oromo chuth kata gima kare. Namba auchiel orem gi achiel mondo orom abiriyo, to mano ochung’ne gima orem e wang’ Nyasaye, kendo inyalo tude gi jowasik Nyasaye.​—1 Weche mag Ndalo 20:6; Daniel 3:1.

Nwoyo nambano didek mondo ojiw wach. Seche moko Muma jiwo wach moro kuom nwoye didek. (Fweny 4:8; 8:​13) Omiyo, namba 666 nyiso okang’ ma loje mag siasa oremgo e wang’ Nyasaye. Pinyruodh Nyasaye kende ema biro kelo kuwe mosiko e piny, nikech mano gima osetamo loje mag siasa.

Alama mar ondiek

Muma wacho ni ji biro yudo “alama mar ondiegno” nikech giluwe “ka gimor kode,” mondo gilame. (Fweny 13:​3, 4; 16:2) Gitimo kamano kuom miyo pinygi duong’, lamo kido mag pinygi, kata geno kuom teko mag jolwenjgi. The Encyclopedia of Religion wacho niya: “Pinje osebedo kaka gik ma ji lamo e kindegi.” *

Ere kaka ng’ato nyalo yudo alama mar ondiek e lwete ma korachwich kata e lela wang’e? (Fweny 13:16) Ka luwore gi chike ma ne omi Jo-Israel, Nyasaye nowachonegi niya: “Unutwegi ka ranyisi kuom luetu, kendo ginibednu ka rapar e kind wengeu.” (Rapar mar Chik 11:18) Mano ok nyis ni Jo-Israel nonego oket alama e lwetegi kata e pat wigi aching’, kar mano, Wach Nyasaye ema nonego ota timbegi kod pachgi. E yo ma kamano bende, alama mar ondiek en kido mifwenyogo jogo moyie ni loje mag siasa ota ngimagi, to ok ni igoro namba 666 kuomgi aching’. Joma nigi alama mar ondiek gin joma kwedo Nyasaye.​— Fweny 14:​9, 10; 19:19-​21.

^ par. 8 Ne bende buk miluogo ni Nationalism in a Global Era, ite mar 134, kod Nationalism and the Mind: Essays on Modern Culture, ite mar 94.