Chwo gi mon mang’eny dakga kanyachiel kata ka pok gikendore. Moko kuomgi dakga kanyachiel ka pok gikendore mondo gine ka be kend margi biro dhi maber e kinde mabiro. Be en gima nyiso rieko dak kanyachiel ka pok ukendoru?

E sulani

•  Ang’o ma Muma wacho?

•  Be dak kanyachiel biro miyo iikri maber ne kend?

•  Be dak kanyachiel biro konyi kungo pesa?

•  Be dak kanyachiel biro konyi mondo kik idonj e kend gi ng’at ma ok owinjore kodi?

•  Be nitie yiero maber minyalo timo?

 Ang’o ma Muma wacho?

•   Muma kwero timbe mag nindruok e kind joma pok okendore. Kuom ranyisi, owacho kama: “[Wereuru] gi terruok.” (1 Jo-Thesalonika 4:3; 1 Jo-Korintho 6:18) Mano oriwo dichwo gi dhako modak kanyachiel, kata obedo ni gichano kendore e kinde mabiro. a Chike mag Muma konyoga ahinya e geng’o hinyruok ma joma odak kanyachiel nyalo yudo, moriwo nyaka mako ich oko mar kend.

•   Nyasaye e ma nochako chenro mar kend. Ka nochako chenrono, nowacho kama: “Dichwo nowe wuon-gi gi min-gi mi nomakre gi chiege, kendo ginibed ringruok achiel.” (Chakruok 2:24) Ka dichwo gi dhako otimo singruok e yo mowinjore, mano miyo giherore gadier kendo giketo mise motegno ne kend margi.

 Be dak kanyachiel biro miyo iikri maber ne kend?

 Jomoko wachoga ni ee. Giparo ni joma odak kanyachiel nyalo medo lony ma gin-go sama gikonyore e chopo ting’ maggi, kendo ni mano en thuolo mar nono kaka moro ka moro kuomgi timo gik moko. Kata kamano, singruok mar kend e ma miyoga joma okendore bedo gi mor.

 Be joma odak kanyachiel ka pok gikendore nyalo makore motegno e kinde ma weche beyo kod ma weche richo? Ok yot, nikech joma kamago pod temo pimo ka be kend margi biro siko kata ooyo, omiyo, ginyalo were ka po ni weche ok odhi maber. Mopogore gi mano, kend dhiga maber sama dichwo gi dhako tiyo kanyachiel e chopo ting’ ma ng’ato ka ng’ato nigo mondo gisik ka gimakore kata sama giromo gi chandruoge.

 Wach maduong’ en ma: Joma odak kanyachiel ka pok okendore timo ikruok ne weruok, to ok ne kend ma siko.

 Puonj mar Muma: “Gimoro amora ma ng’ato chuoyo, mano bende e ma noka.”​—Jo-Galatia 6:7.

 Be dak kanyachiel biro konyi kungo pesa?

 Jomoko wachoga ni ee. Nonro ma notim gi Pew Research Center, nonyiso ni e piny Amerka, ji ang’wen kuom apar ma nochako dak ka pok gikendore notimo kamano nikech weche mag pesa. Kata kamano, bang’ dak kanyachiel kuom kinde moro, thoth jogo nowacho ni achiel kuom gik madongo ma nomiyo ok ginyal kendore ne gin chandruoge mag pesa.

 Dak kanyachiel ka pok ukendoru bende nyalo kelo hinyruok moko, to moloyo ne mon. Kuom ranyisi, sama uweru gi ng’at ma nudakgo, thothne mine e ma dong’ga gi ting’ mar pidho nyithindo.

 Wach maduong’ en ma: Hinyruok kod pek ma joma odak kanyachiel ka pok gikendore yudoga ng’eny moloyo ber ma joma kamago nyalo paro ni giyudo.

 Puonj mar Muma: “An Jehova Nyasachi ma puonji mondo iyud ber.”​—Isaya 48:17.

 Be dak kanyachiel biro konyi mondo kik idonj e kend gi ng’at ma ok owinjore kodi?

 Jomoko wachoga ni ee. Bug Fighting for Your Marriage wacho kama: “Kinde mang’eny, joma odak kanyachiel ka pok okendore ok ong’eyo kaka ketho dak ma kamano nyaloga bedo matek.” Nikech ang’o? Moko kuom joma kamago nyalo fwenyo ni nitie gik madongo ma ok giwinjree. To nikech samoro nitie weche ma tueyogi kaka le ma gipidho, lon ma gichulo, kata samoro dhako osemako ich, koro chuno ni gidag adaga. b Bugno dhi nyime wacho kama: “Bedoga matek ne moko kuom joma osedak kanyachiel were nikech nitie gik ma ne gisetueree ma koro chunogi ni gikendre.”

 Wach maduong’ en ma: Dak kanyachiel nyalo miyo obedni matek ketho dak gi ng’at mudakgono, kata obedo ni samoro ok udak kod kuwe gi mor.

 Puonj mar Muma: “Ng’at mariek neno masira ka biro kendo opondo, ng’at ma riekone tin to dhi adhiya kendo ohinyore.”​—Ngeche 22:3.

 Be nitie yiero maber minyalo timo?

 Unyalo geng’o chandruoge ma yudoga joma dak kanyachiel ka pok gikendore, mi uket mise maber mar kend motegno kendo mopong’ gi hera. Ere kaka unyalo timo mano? Kuom luwo chike ma Muma oketo e weche kend. Kaw thuolo mondo inon ng’at midwaro donjogo e kend, ka pok uchako dak kanyachiel kaka dichwo gi dhako. Ber yiero ng’ato midonjogo e kend bang’ nono timbene kod puonj moyiego, to ok berne kende.

 Muma oting’o paro mabeyo ma nyalo konyi loso mise motegno ne kend ma nigi mor kod kuwe. c Kuom ranyisi, Muma nigi puonj ma nyalo konyi mondo . . .

•   imakri gi jaodi

•   ibed gi kido ma dwarore ne joma okendore

•   ing’ad osiep mar kisera kifwenyo ni ng’atno ok owinjore kodi

 Mondo iyud weche mamoko motudore gi wachni, ne “Kend kod Ngima mar Joot” e jw.org/luo.

 Puonj mar Muma: “Ndiko duto okudh gi much Nyasaye kendo gikonyo kuom puonjo ji.”​—2 Timotheo 3:16.