Ji duto gombo dak e piny ma nigi kuwe. Kuom higni alufe modhuro, joloch mag piny osetemo matek tieko ywaruoge manie piny mondo gikel kuwe. Samoro kindagino keloga lokruok moko kuom kinde, kata kamano, mano ok sikga nikech bang’ kinde machuok ywaruoge bedoega. Be pinyni biro bedo gi kuwe? Ee! Mondo wane kaka mano biro timore, we wane ane gima Yesu biro timo kod gik ma ne opuonjo.

Gima Yesu biro timo

 Muma wacho gima Yesu biro timo mondo okel kuwe e piny mangima.

•   “Ibiro [luong Yesu] ni . . . Ruodh Kuwe. Lochne biro medore ameda, kuwe mobiro kelo kolocho . . . nobed ma onge giko.” (Isaya 9:6, 7) Kaka Ruoth mar Pinyruodh Nyasaye, Yesu biro kelo kuwe ma nyaka chieng’ e piny.

•   “Obiro reso jachan ma ywakne, bende, obiro reso ng’at ma sandore ma onge ng’at ma dikonye.” (Zaburi 72:12-14) Yesu biro tiyo gi teko ma en-go mondo ong’ad bura e yo makare ka otieko lwenje duto, mahundu, kod chandruoge.

•   “Oganda ok noting’ ligangla ne oganda machielo, ok ginichak gipuonjre lweny kendo.” (Isaya 2:4) E bwo loch mar Yesu, ji duto biro puonjore bedo gi kuwe kar puonjore lweny.

 Mondo ing’e kaka Yesu biro kelo kuwe mosiko e piny kod kaka mano nyalo konyi, ne vidio ma machiek ma wiye wacho ni Pinyruodh Nyasaye En Ang’o?

Gima Yesu ne opuonjo

 Kata mana e kindegi, puonj mag Yesu pod konyo ji milionde mondo odag gi kuwe. E twak ma Yesu nogolo e wi got, nojiwo puonj ma konyowa dak gi kuwe gi jomamoko. Ne ane moko kuomgi.

•   “Jo mamor gin jolos kuwe.” (Mathayo 5:9) Yesu nojiwo jolupne mondo kik giyware gi ji, to kar mano, gibed joma ohero loso kuwe.

•   “Kwong idhi ilos kuwe gi owadu eka bang’e iduog ichiw michni.” (Mathayo 5:23, 24) Yesu ne ojiwo jolupne mondo gilos mapiyo chwanyruok ma nyalo bedo e kindgi. Nopuonjo bende ni mondo wabed gi winjruok maber gi Nyasaye, nyaka walos kuwe gi jowetewa.

•   “Weuru ng’ado ne ji bura mondo kik ong’adnu bura.” (Mathayo 7:1) Yesu nochiwo siem ni kik wang’ad ne ji bura e yo marach kata dwaro ni jomamoko otim gik ma wan wawegi ok watimga. Timo kamano nyalo kelo chwanyruok. Kar manyo ketho kuom jomoko, Yesu nopuonjo jolupne ni ‘gidhi nyime weyo’ ne jomamoko kethogi.​—Luka 6:37.

 Ji mang’eny e piny mangima tiyo gi puonj mag Yesu. Kata mana e alwora mopong’ gi timbe gero kod ywaruok, ji puonjore tieko ywaruok e yor muolo, ging’wono ne jowetegi, kendo gidhi nyime nyiso hera kata sama jomamoko ok timnegi gik mabeyo.

 Mondo ine kaka puonj mag Yesu osekonyo jomamoko mondo obed gi kuwe, som sula ma wiye wacho ni “Inyalo Bedo gi Kuwe e Piny Mopong’ gi Lwenje kod Ywaruok.”