Be tuo osemiyo ngimani omedo bedo marach apoya? Ka en kamano, to kare ing’eyo ni tuo nyalo miyo pachi gi dendi obed mool ahinya kendo thiedho tuono nyalo kawo pesa mang’eny. Ang’o ma nyalo konyi nyagori gi tuono? Ere kaka inyalo konyo achiel kuom joodu kata osiepni ma nyagore gi tuo? Kata obedo ni Muma ok en buk ma wuoyo e wi weche thieth, en gi puonj mabeyo ma nyalo konyi nano e yo maber ahinya sama ituo.

Paro moko ma nyalo konyi nyagori gi tuo

•   Many thieth kuom laktar

   Gima Muma wacho: “Jo mangima ok dwar laktar, to jo matuo e ma dwaro.”​—Mathayo 9:12.

   Puonj mwayudo e ndikono: Ka dwarore, many thieth kuom lakteche molony.

   Tem ane timo kama: Many kit thieth maber minyalo yudo. Seche moko nyalo dwarore ni imany paro kuom ng’at machielo. (Ngeche 14:15) Wuo gi lakteche e yo moriere e wi tuo ma chandi. Tem mondo iwinj maler gik ma ginyisi kendo nyisgi gik ma chandi mondo okonygi ng’eyo maber tuo ma in-go. (Ngeche 15:22) Puonjri weche mathoth e wi tuo ma tuoyi moriwo nyaka yore minyalo thiedhigo. King’eyo maler tuo ma tuoyi kod kit thieth minyalo yudo, mano nyalo konyi mondo inyagri maber gi tuono kendo itim yiero mabeyo.

•   Rit ngimani e yo maber

   Gima Muma wacho: “Tiego del konyo.”​—1 Timotheo 4:8.

   Puonj mwayudo e ndikono: Inyalo rito ngimani maber sama itimo gik ma konyi kaka tiego dendi pile ka pile.

   Tem ane timo kama: Bed gi chenro mar tiego dendi pile ka pile, cham chiemo ma gero dendi, kendo inind moromo. Kata obedo ni samoro itemo mondo itim lokruoge nikech tuo moro ma in-go, jo molony e weche mag thiedho dend dhano wacho ni kitimo kinda mondo irit dendi e yo maber, ibiro yudo ber mathoth. Kata kamano, ne ni kit tiego del moro amora miyiero timo ok bi hinyo ngimani kata chocho kit thieth ma sani idhigo nyime.

•   Many kony kuom jomamoko

   Gima Muma wacho: “Osiep madier nyiso hera ndalo duto kendo en owadu ma ne onyuol mondo okonyi chieng’ chandruok.”​—Ngeche 17:17.

   Puonj mwayudo e ndikono: Osiepegi nyalo konyi nano e kinde matek.

   Tem ane timo kama: Wuo gi osiepni migeno ma inyalo yawone chunyi. Timo kamano nyalo konyi mondo inyagri maber gi chandruoge ma tuo ma in-go keloni kendo ibed mamor. Samoro osiepeni kata joodu nyalo dwaro konyi e yore mamoko, kata kamano, nyalo bedo ni ok ging’eyo kaka ginyalo konyi. Omiyo, nyisgi maler yo maber ma ginyalo konyigo. Kik igen ni gibiro timoni gik mang’eny ahinya kendo go erokamano ne kony moro amora ma gimiyi. Gie sechego bende, kata obedo ni osiepeni ma chunygi ber nyalo dwaro konyi, samoro nyalo dwarore ni iket chike moko mondo kik gikal tong’. Kuom ranyisi, inyalo keto tong’ e wi kinde ma ginyalo limie kod thuolo ma gibiro kawo sama gilimi.

•   Bed gi paro mowinjore

   Gima Muma wacho: “Chuny mamor chalo gi yath maber, to chuny monyosore tieko teko ng’ato.”​—Ngeche 17:22.

   Puonj mwayudo e ndikono: Bedo gi paro mowinjore kod geno nyalo konyi mondo ibed gi chuny mokuwe sama inyagori gi chandruoge ma tuo keloni.

   Tem ane timo kama: Sama itemo mondo ing’i gi chal manyien ma koro intiere, tem mondo iket pachi kuom gik ma inyalo timo to ok kuom gik mohewo tekoni. Kik ipimri gi jomamoko kendo kik iket pachi kuom chal ma ne intie ka ne tuo pok ogoyi. (Jo-Galatia 6:4) Bed gi chenro ma inyalo chopo ma nyalo konyi keto pachi kuom geno maber mar kinde mabiro. (Ngeche 24:10) Kony jomamoko ka chal mari oyieni timo kamano. Mor ma ibiro yudo ka ikonyo jomamoko biro konyi mondo kik iket pachi kuom chal matek ma intie.​—Tich Joote 20:35.

Be Nyasaye biro konyi nyagori gi tuo?

 Muma wacho ni Jehova Nyasaye nyalo konyo ng’ato mondo onyagre gi tuo. Kata obedo ni ok wanyal geno ni ibiro changwa e yor hono, Nyasaye nyalo konyo joge e yore ma luwogi:

 Kuwe. Jehova nyalo chiwo “kuwe mar Nyasaye ma loyo ng’eyo duto.” (Jo-Filipi 4:6, 7) Kuwe ma kamano nyalo konyo ng’ato mondo kik obed gi parruok mokalo tong’. Nyasaye chiwoga kuwe ma kamano ne joma lame kendo ma nyise gik moko duto ma chandogi.​—1 Petro 5:7.

 Rieko. Jehova nyalo miyowa rieko ma nyalo konyowa timo yiero makare. (Jakobo 1:5) Ng’ato nyalo yudo rieko ma kamano sama osomo kendo otiyo gi puonj manie Muma.

 Geno ma jiwowa mar kinde mabiro. Jehova singonwa kinde ma “onge japiny ma nowachi niya: ‘Atuo.’” (Isaya 33:24) Genono konyo ji mang’eny mondo gibed gi paro mowinjore kata sama tuo moro marach chandogi.​—Jeremia 29:11, 12.