Be iparo ni weche biro bedo maber e kinde mabiro? Ji mang’eny geno ni weche biro dhi maber kata obedo ni wadak e piny mopong’ gi chandruoge madongo. Kata kamano, kiwacho awacha adier, be weche biro dhi maber e kinde mabiro? Ee, kamano! Muma miyowa geno madier mar kinde mabiro.

•  En geno mane ma Muma chiwo?

•  Be onego wagen singo ma Muma chiwo?

•  Ere kaka singo ma Muma chiwo biro chopo?

•  Gik ma Muma singogo biro chopo karang’o?

•  Ere kaka geno ma Muma chiwo nyalo konyi e kindegi?

 En geno mane ma Muma chiwo?

 Muma nyiso maler ni dhano kalo e chandruoge mathoth. Kata kamano, osingonwa ni chandruogego ok bi siko nyaka chieng’. Ne ane ranyisi ma luwogi.

•   Chandruok: Kuonde dak

   Gima Muma wacho: “Gibiro gero ute kendo ginidagie.”​—Isaya 65:21.

   Kaka singono biro chopo e kinde mabiro: Ng’ato ka ng’ato biro dak e ode owuon.

•   Chandruok: Bedo ma onge tich kod dhier

   Gima Muma wacho: “Joga moyier nobed mamor gi tich lwetegi.”​—Isaya 65:22.

   Kaka singono biro chopo e kinde mabiro: Ji duto biro bedo mamor gi tije ma gitimo.

•   Chandruok: Bura ma ok kare

   Gima Muma wacho: “Jotelo nong’ad bura makare.”​—Isaya 32:1.

   Kaka singono biro chopo e kinde mabiro: Ok bi tim ne ji gik ma ok owinjore mana nikech rangi mar pien dendgi, nikech gidhier, kata nikech ji ochayogi. Ibiro tim ne ng’ato ka ng’ato gik makare.

•   Chandruok: Nok mar chiemo

   Gima Muma wacho: “Cham nobed mang’eny e piny; cham nochieg nyaka e wi gode.”​—Zaburi 72:16.

   Kaka singono biro chopo e kinde mabiro: Ji duto biro bedo gi chiemo mabeyo kendo mang’eny. Onge ng’at ma biro tho nikech kech kata nikech ok oyud chiemo ma gero del.

•   Chandruok: Timbe gero kod mahundu

   Gima Muma wacho: “Ng’ato ka ng’ato nobed e tiend yadhe mar mzabibu kod mar ng’ope, onge ng’at ma biro bwogogi.”​—Mika 4:4.

   Kaka singono biro chopo e kinde mabiro: Ibiro gol jomaricho duto kendo ji biro dak ma onge luoro. Bende, “jo makare nobed weg piny.”​—Zaburi 37:10, 29.

•   Chandruok: Lwenje

   Gima Muma wacho: “Oganda ok noting’ ligangla ne oganda machielo, ok ginichak gipuonjre lweny kendo.”​—Isaya 2:4.

   Kaka singono biro chopo e kinde mabiro: Kuwe biro pong’o piny duto. (Zaburi 72:7) Onge ng’at ma biro kuyo kata ywak nikech watne kata osiepne otho e lweny, kendo onge ng’at ma biro dhi dak kamachielo nikech lweny omuoch kama odakie.

•   Chandruok: Tuoche kod midekre

   Gima Muma wacho: “Onge japiny ma nowachi niya: “Atuo.’”​—Isaya 33:24.

   Kaka singono biro chopo e kinde mabiro: Onge ng’at ma biro chandore nikech tuoche kod ng’ol. (Isaya 35:5, 6) Muma bende singo ni “tho ok nobedie kendo.”​—Fweny 21:4.

•   Chandruok: Ketho alwora

   Gima Muma wacho: “Thim kod piny motwo nobed mamor, ee, thim nobed mamor kendo nothiew ka safron.”​—Isaya 35:1.

   Kaka singono biro chopo e kinde mabiro: Piny biro bedo paradiso ma jaber ma dhano biro dakie, mana kaka Nyasaye nochano ka nochueyo piny.​—Chakruok 2:15; Isaya 45:18.

 Be onego wagen singo ma Muma chiwo?

 En adier ni samoro nyalo bedoni matek geno singogo. Kata kamano, wajiwi ni imed nono adimba gima Muma wacho e wi kinde mabiro. Nikech ang’o? Singo ma Muma chiwo opogore ahinya gi singo ma dhano nyalo chiwo. Singo mag Muma owuok kuom Nyasaye. Ne ane gimomiyo gipogore ahinya gi singo mag dhano:

•   Nyasaye ok nyal riambo. Muma wacho ni Nyasaye “ok nyal riambo.” (Tito 1:2) E wi mano, Nyasaye kende e ma nigi nyalo mar wacho gik ma biro timore e kinde mabiro. (Isaya 46:10) Muma oting’o ranyisi mang’eny ma nyiso kaka gik ma Nyasaye okoro chopoga ma ok gibare. Mondo iyud weche momedore, ne vidio ma wiye wacho ni Ang’o Momiyo Wanyalo Bedo Gadier ni Muma Owuok Kuom Nyasaye?

•   Nyasaye nigi teko mar golo chandruogewa duto. Muma wacho ni Nyasaye nigi teko mar “timo gimoro amora mohero.” (Zaburi 135:5, 6) Tiende ni, onge gima nyalo tamo Nyasaye chopo gik mosingo. E wi mano, Nyasaye dwaro konyowa nikech oherowa.​—Johana 3:16.

 Kata kamano, samoro inyalo penjori kama, ‘Ka kuom adier Nyasaye dwaro konyowa kendo en gi nyalo mar timo kamano, ang’o momiyo pod wachandore kama?’ Mondo iyud dwoko mar penjono, ne vidio ma wiye wacho ni Ang’o Momiyo Nyasaye Oweyo Chandruok Mondo Obedie?

 Ere kaka singo ma Muma chiwo biro chopo?

 Nyasaye biro tiyo gi Pinyruodhe, ma en sirkal manie polo e chopo singoge. Oseketo Yesu Kristo mondo obed Ruodh Pinyruodhno, kendo osemiye teko mar rito piny kod joma odak e piny. Ka ne Yesu nie piny, nochango jotuo, nopidho joma ne ni kech, nokueyo yamo mager kod apaka, kendo nochiero nyaka jomotho. (Mariko 4:39; 6:41-44; Luka 4:40; Johana 11:43, 44) Kuom mano, nonyiso motelo gik mobiro timo kaka Ruoth mar Pinyruodh Nyasaye.

 Ne vidio ma wiye wacho ni Pinyruodh Nyasaye En Ang’o? mondo ine gueth momedore ma Pinyruodh Nyasaye biro keloni.

 Gik ma Muma singogo biro chopo karang’o?

 Gibiro chopo e kinde mokayo machiegni! Ang’o momiyo wanyalo bedo gadier gi wachno? Muma nokoro gik ma ne dhi timore ma ne dhi nyiso ni Pinyruodh Nyasaye chiegni chako locho e wi piny. (Luka 21:10, 11) Gik ma Muma nokorogo timore e kindewagi.

 Mondo ipuonjri weche momedore, som sula ma wiye wacho ni “Pinyruodh Nyasaye Biro Locho e Wi Piny Karang’o?”

 Ere kaka geno ma Muma chiwo nyalo konyi e kindegi?

 Jandik Muma moro nopimo geno ma Muma chiwo gi “nanga mar meli mosiro ngimawa.” (Jo-Hibrania 6:19) Mana kaka nanga nyalo konyo meli chung’ kar tiende sama apaka mager otugore e nam, geno ma Muma chiwo nyalo konyowa nyagore maber sama waromo gi chandruoge e kindegi. Genowa nyalo konyowa kuwe mos, bedo mamor, kendo konyowa bedo gi paro ma long’o sama weche tek.​—1 Jo-Thesalonika 5:8.