Kal idhi e weche manie iye

Kal idhi kama ochanie weche mantie

KAKA ITIYOGA GI CHIWO MA WAGOLO

Tudo Chokruok Maduong’ e TV kod Redio

Tudo Chokruok Maduong’ e TV kod Redio

AGOST 1, 2021

 Chokruogwa maduong’ mar higa 2020 ne en chokruok makende ahinya, nikech en e ma ne wahango make e vidio kae to wakete e intanet mondo ji onene. Kata kamano, e piny Malawi kod Mozambique, thoth owetewa gi nyiminewa noneno kata winjo chokruok maduong’ kata obedo ni ne gionge intanet. Mano nonyalore nade?

 Komiti mar Jocheno kod Komiti mar Puonjo manie bwo Bura Matayo nopwodho mondo onyis kendo owinj chokruogno kokalo kuom TV gi redio e piny Malawi kod Mozambique. Ang’o momiyo notim chenro makendeno? Malawi en achiel kuom pinje ma nengo intanet ni malo ahinya, omiyo Joneno mang’eny ma ni e pinyno ok nyal yudo intanet e yo mayot. Owadwa William Chumbi, manie Komiti mar Bad Ofis ma Malawi wacho kama: “Redio gi TV kende e yore ma owetewa gi nyiminewa ne nyalo yudogo chiemb chuny makendeni.” Owadwa Luka Sibeko ma bende nie Komiti mar Bad Ofis ma Malawi, medo kama: “Ka di ne bed ni ok wayudo chokruogni kokalo kuom TV gi redio, owete gi nyimine mang’eny manie alwora mar bad ofiswa di ne oa nono.” Piny Mozambique to nigi chandruok moro mopogore, owete manok ahinya e ma nigi masinde minyalo nyisgo vidio.

Kaka Notim Chenro

 Chop kinde mag chokruok maduong’, noyudo ka stesende moko mag TV gi redio nosechako nyiso chokruogewa mag kanyakla nikech tuo mar korona. * Owetewa nokwayo stesendego mondo gimiwa thuolo momedore mar neno chokruogno.

 E piny Malawi, owetewa noromo gi pek moro. Stesende mang’eny e pinyno ok oyie ne kastembegi bedo gi program ma kalo sa achiel. Giluor ni ka program rabora ahinya, to jowinjo biro jony. Kata kamano, owetewa noleronegi ni tich mwatimo en tich ma konyo oganda. Ne ginyisogi ni kata mana e kinde lockdown, pod watemo ahinya mondo waho ji gi wach maber mowuok e Muma ma konyogi bedo joma beyo kendo bedo gi ngima mar joot ma nigi mor. Ka ne giwinjo mano ne giyie gi kwayo mar owetego.

 E piny Malawi, stesen achiel mar TV kod stesen achiel mar redio nonyiso chokruogwa maduong’, to stesendego duto okwako piny Malawi te. Mano nyiso ni ji tara gi tara ne nyalo winjo chokruogwa maduong’no. E piny Mozambique, stesen achiel mar TV kod stesende 85 mag redio nonyiso chokruogwano.

 E pinjego duto, koriw pesa ma notigo e chulo stesende mag TV mondo onyis chokruok maduong’ ne en siling’ 2,822,700 * to ma notigo e stesende mag redio romo siling’ 2,000,000. Stesende matindo mag redio nochul pesa ma dirom siling’ 1,500 to stesende madongo ma kwako ka malach nochul siling’ 277,700.

 Owetewa notemo matek ahinya mondo giti maber gi chiwo ma owete gi nyimine golo. Kuom ranyisi, e piny Malawi, ne gikwayo mondo odwoknegi nengo piny. Stesende mang’eny noyie timo kamano, kendo achiel kuom stesendego nodwokonegi nengo piny gi pasent 30. Mano nokonyogi kungo pesa ma romo siling’ 171,100. E piny Mozambique stesende moko noyie dwokonwa nengo piny nikech ging’eyowaga kaka joma joratiro kendo ma chuloga pesa e wang’ sa.

Weche mag Goyo Erokamano

 Owete gi nyimine ma nowinjo kata neno program mar chokruok maduong’ e redio kod TV ne mor ahinya. Patrick ma en jaduong’-kanyakla ma a Malawi wacho kama: “Wagoyo ne Bura Matayo erokamano ahinya kuom dewowa ahinya e kinde mag koronani.” Isaac ma bende a Malawi wacho kama: “Waonge gi masinde ma nyasani minyalo tuggo vidio. Omiyo, wagoyo erokamano ahinya ne riwruok mar oganda Jehova kuom timonwa chenro mar winjo program mar chokruok maduong’ e redio. Mano nomiyo jooda duto owinjo chokruok maduong’. Chenrono nomiyo waneno maler ni kare Jehova ohero joge gadier.”

 Jalendo moro e piny Mozambique nodhi e chokruok maduong’ ma higa 2020, kendo mano e chokruok maduong’ ma nohango dhiye. Owacho kama: “Chenro mar neno chokruok maduong’ e TV noparona ni Jehova e Nyasaye ma nyalo duto. Tuo mar korona ne ok omone miyowa chiemb chuny e kinde mowinjore kendo mana ei oda ka. Ne aneno kaka jotich Jehova oherore adier. An gadier chuth ni ma e din madier.”

 Jaduong’-kanyakla ma nyinge Wyson wacho kama: “Daher goyo erokamano ne jatich mogen kendo mariek kuom ritowa maber ahinya e ndalo tuoni. Chenro ma ne gitimo mondo gimiwa chokruok maduong’ kokalo kuom redio gi TV osekonyo ji mang’eny ma a korwa koni ma onge gi nyalo mar neno chokruok maduong’ e intanet.”

 Komiti mar Jocheno kod Komiti mar Puonjo osetimo chenro mondo chokruok maduong’ mar higa 2021 bende one e TV kod redio e alwora moko. Wayudoga pesa kune mar nyiso chokruok maduong’ e yo machalo kamano? En kokalo kuom chiwo magu musirogo tij piny ngima ma thothne ugologa kokalo kuom yore moler e websait marwa mar donate.jw.org. Erourukamano ahinya.

^ Ka pok nochopo kinde chokruok maduong’ mar higa 2020, Komiti mar Jocheno nosepwodho mondo onyis chokruoge mag kanyakla e TV kod e redio e alwora moko nikech tuo mar korona. Chenrono osekonyo owete gi nyimine ma onge gi nyalo mar timo chokruoge gi kanyaklagi, kata ma ok nyal tiyo gi JW Stream nikech samoro gidak e gwenge ma onge intanet, kata tudruok gi simu ok yot. Kata kamano, chenrono ok oket ne joma nyalo donjo mayot e chokruoge mag kanyaklagi.

^ Kwan mag siling’ monyis e sulani gin siling’ ma Kenya.