Tich Joote 4:1-37
4 Sa ma ji ariyogo pod ne wuoyo gi oganda, jodolo, gi jatend-jorit hekalu, kod Jo-Sadukai+ nobiro irgi.
2 Mirima nomakogi nikech jootego ne puonjo oganda ka giwacho ayanga ni Yesu ne osechier.+
3 Omiyo, ne gimakogi mi gitueyogi+ nyaka kinyne nikech piny nosebedo odhiambo.
4 Kata kamano, thoth jo ma nowinjogi nobedo gi yie, kendo kwan-gi nomedore moromo chwo 5,000 kama.+
5 Kinyne, jotendgi gi jodonggi kod jondiko nochokore Jerusalem,
6 kaachiel gi Anas+ jatend-jodolo, gi Kayafa,+ gi Johana, gi Aleksander, kod ji duto ma ne gin wede jatend-jodolo.
7 Ne gichungo Petro gi Johana e diergi mi gichako penjogi niya: “Utimo gigi gi teko mane, kata kuom nying ng’a?”
8 Eka Petro nowachonegi kama kopong’ gi roho maler:+
“Un jotend oganda kod jodongo,
9 ka sani unonowa nikech watimo gima ber ne ng’at ma puth,+ kendo udwaro ng’eyo ng’at mochango jali.
10 Ng’ereu uduto kaachiel gi Jo-Israel duto ni jali ochung’ e nyimu kae ka osechango nikech nying Yesu Kristo Ja-Nazareth+ ma ne unego e yath+ to Nyasaye ne ochiero.+
11 En e ‘kidi ma un jogedo ne ukawo ka gima nono, to koro osebedo kidi moriwo kor ot.’+
12 E wi mano, onge warruok kuom ng’at machielo, nimar onge nying machielo+ e bwo polo mosechiw ne ji mondo wayudie warruok.”+
13 Koro ka ne gineno chir ma Petro gi Johana ne wuoyogo, kendo ng’eyo ni ne gin ji ajia ma ok osomo,*+ ne gihum. Eka ne gifwenyo ni kare yande ne gin-ga gi Yesu.+
14 Onge gima ne ginyalo wacho+ nikech ne gineno ng’at ma ne osechangno kochung’ kodgi.+
15 Omiyo, ne gichikogi mondo giwuog oko mar od romo mar Sanhedrin, mi ne giriwo paro
16 ka giwacho niya: “Watim jogi nade?+ Nikech kuom adier, gisetimo hono kendo honono nenore ayanga ne ji duto modak Jerusalem,+ kendo ok wanyal kwero mano.
17 To mondo wachno kik med landore e kind oganda, wasiemgiuru kendo wakwergi mondo kik gidhi nyime wuoyo gi ng’ato kuom nyingno.”+
18 Bang’ mano, ne giluongogi mi gichikogi ni kik giwach gimoro kata puonjo ka gitiyo gi nying Yesu.
19 To Petro gi Johana nodwokogi kama: “Ka en gima kare e wang’ Nyasaye ni mondo wawinju kar winjo Nyasaye, mano ng’aduru uwegi.
20 To wan, ok wanyal weyo wuoyo e wi gik ma waseneno kendo ma wasewinjo.”+
21 Koro ka ne gisemedo siemogi, ne gigonyogi nikech ne ok giyudo gimoro ma ne nyalo miyo gikumgi, to bende nikech oganda,+ nimar oganda duto ne miyo Nyasaye duong’ kuom gima ne osetimoreno.
22 Ng’at ma ne ochang e yor honono ne en jahigni 40 gi wiye.
23 Ka ne osegonygi, ne gidok ir jowetegi mi gihulo weche ma jotend-jodolo kod jodongo nowachonegi.
24 Bang’ winjo wechego, giduto ne giting’o dwondgi malo kanyachiel ne Nyasaye ka giwacho niya:
“Wuon Loch Duto, in e Jal ma nochueyo polo, gi piny, gi nam, kod gik moko duto manie igi,+
25 kendo kokalo kuomi, roho maler nowacho gi dho kwarwa Daudi+ jatichni niya: ‘Ang’o momiyo ogendni nobedo gi koko kendo ji noparo weche manono?
26 Ruodhi mag piny ne oikore kedo gi Jehova* kendo jotelo nochokore kaka gimoro achiel mondo giked kode gi ng’ate mowir.’*+
27 To adier, Herode gi Pontio Pilato+ kaachiel gi ogendni kod Jo-Israel nochokore e dalawani mondo giked gi Yesu jatichni maler ma ne iwiro,+
28 mondo gitim gima lweti kod dwaroni ne oseng’ado motelo ni biro timore.+
29 To koro Jehova,* winj siem ma gisiemowago, kendo imi jotichni nyalo mar dhi nyime hulo wachni gi chir duto,
30 ka irieyo lweti mondo ichang ji, kendo itiyo gi Yesu jatichni+ maler e timo honni kod tije madongo.”+
31 To ka ne gisesayo e lamo, kama ne oyudo gichokoreeno ne oyiengni mi giduto ne gipong’ gi roho maler,+ kendo ne gihulo wach Nyasaye gi chir.+
32 E wi mano, oganda mang’ongo ma noyie ne nigi chuny achiel kod paro achiel, kendo onge kata ng’ato kuomgi ma ne wacho ni gik ma ne en-go ne gin mage owuon, to ne giriwo gik moko duto ma ne gikonyorego.+
33 Kendo joote nomedo chiwo neno gi teko maduong’ e wi chier mar Ruoth Yesu,+ kendo ng’wono mogundho mar Nyasaye ne ni kuomgi giduto.
34 Adier, onge ng’ato kuomgi ma nochando gimoro,+ nimar ji duto ma ne nigi puothe kata ute ne usogi, kendo ne gikelo yutogo,
35 kae to ne giketogi e tiend joote.+ Eka ne ipogogi ne ng’ato ka ng’ato kaluwore gi kaka ne ochando.+
36 Omiyo, Josef ma bende joote ne luongo ni Barnaba+ (ma kolok to tiende en, “Wuod Hoch”), ma ne en Ja-Lawi ma japiny Saipras,
37 ne nigi puodho moro. Ne ouse mokelo pesago ne joote.+
Weche Moler Piny
^ Tiende ni, ne ok gisomo e skunde mag Jo-Hibrania mipuonjoe weche din; to ok ni ne ok gidhi e skul.
^ Som Apendiks A5.
^ Kata, “Kristone.”
^ Som Apendiks A5.
