Jo-Rumi 4:1-25

  • Ikwano ni Ibrahim en ng’at makare kokalo kuom yie (1-12)

    • Ibrahim en wuon ji duto ma nigi yie (11)

  • Singo mar Nyasaye chopo kokalo kuom yie (13-25)

4  Ka en kamano, kare ang’o ma dwawach ni Ibrahim ma en kwarwa e ringruok noyudo?  Kuom ranyisi, ka dine bed ni ne okwan Ibrahim kaka ng’at makare nikech gik ma notimo, mano dine omiyo opakore, to ok e wang’ Nyasaye.  Nimar wach manie Ndiko wacho ang’o? Ni “Ibrahim noketo yie kuom Jehova mi mano nomiyo okwane ni en ng’at makare.”  To kuom ng’at mosetiyo, chudo mimiye ok en nikech inyise ng’wono, to en gima owinjore ochule.  To mopogore gi mano, ng’at ma ok gen kuom gik ma en owuon otimo, to oketo yie kuom Jal ma miyo ikwano joma richo kaka joma kare, yie mar ng’atno miyo ikwane kaka ng’at makare.  Mana kaka Daudi bende wacho kuom mor mar ng’at ma Nyasaye kwano kaka ng’at makare, to ok nikech timbe ng’atno owuon, kowacho niya:  “Joma mor gin joma timbegi ma ok kare osewenegi kendo ma richogi oseum;  ng’at mamor en jalo ma Jehova ok bi kwano richone kuome ngang’.”  Be koro mano nyiso ni joma oseter nyangu kende e ma yudo mor ma kamano, koso joma pok oter nyangu bende? Nimar wasewacho niya: “Yie mar Ibrahim nomiyo okwane ni en ng’at makare.” 10  Kare en karang’o ma ne okwanee ng’at makare? Ne en kosetere nyangu koso ka podi? Ne ok en bang’e, to ne en ka pok ne otere nyangu. 11  To kane otere nyangu kaka Nyasaye nochiko, mano nobedo ranyisi ma nyiso ni en ng’at makare nikech yie ma ne en-go ka pok ne otere nyangu, mondo eka obed wuon ji duto ma nigi yie to ok otergi nyangu, eka mondo okwan-gi kaka joma kare; 12  bende, mondo obed wuon joma oter nyangu, to ok mana mar joma itero nyangu kende, to bende wuon joma kuom adier wuotho ka giluwo yie ma Ibrahim wuonwa ne nigo ka pok ne otere nyangu. 13  Nimar chik ok e ma ne omiyo Ibrahim kata kothe onwang’o singo mondo Ibrahim oyud piny kaka pok mare, to ne en nikech bedone ng’at makare kokalo kuom yie. 14  Nimar ka joma makore gi chik e ma bedo joma biro yudo pok, yie bedo kayiem nono kendo singo ma ne ochiw bedo gima koro ok ti. 15  Kuom adier, Chik kelo mirimb Nyasaye, to kama onge chik, kanyo bende onge ketho moro amora. 16  Mano e momiyo kokalo kuom yie, singono chopo ne koth Ibrahim duto nikech ng’wono mogundho mar Nyasaye, ok mana ne joma makore gi Chik kende, to bende ne joma makore gi yie ma Ibrahim nonyiso, ma e jal ma e wuonwa waduto. 17  (Mani en mana kaka ondik niya: “Aseketi ibed wuon ogendni mang’eny.”) Mano ne otimore e wang’ Nyasaye ma Ibrahim noketo yie kuome, kendo en e ma omiyo joma otho bedo mangima, kendo owuoyo kuom gik ma onge ka gima gigo nitiere. 18  Kata ka ne onge gima ne nyalo miyo obed gi geno, pod geno nomiyo obedo gi yie ni ne odhi bedo wuon ogendni mang’eny ka luwore gi wach ma ne osewach niya: “Kamano e kaka kothi nobed.” 19  Kendo kata obedo ni ok nodoko ma yomyom e yie, nokwano dende owuon kaka mar ng’at mosetho (nimar ne en jahigni 100 kama), kendo nong’eyo bende ni Sara ne en migumba. 20  To nikech singo mar Nyasaye, ok noketo kiawa kobedo ma onge yie; to yie ma ne en-go nomiyo obedo motegno komiyo Nyasaye duong’, 21  kendo ne en gadier chuth ni gima Nyasaye nosesingo, Nyasaye ne nigi nyalo bende mar chopo gino. 22  Kuom mano, “ne okwane ni en ng’at makare.” 23  Kata kamano, ok en kende e ma ne ondik kuome kiwacho ni, “ne okwane ni en ng’at makare,” 24  to bende nikech wan ma ne idhi kwanwa kaka joma kare, nimar wayie kuom Jal ma nochiero Yesu Ruodhwa a kuom joma otho. 25  Ne otho nikech kethowa kendo ne ochiere mondo eka okwanwa kaka joma kare.

Weche Moler Piny