Jo-Galatia 4:1-31

  • Koro ok un wasumbni, to un nyithind Nyasaye (1-7)

  • Kaka Paulo dewo Jo-Galatia (8-20)

  • Hagar kod Sara: singruoge ariyo (21-31)

    • Jerusalem ma malo ni thuolo, en minwa (26)

4  Koro gima awacho en ni sama jal ma biro yudo mwandu wuon-gi kaka pok pod en nyathi matin, ochal gi misumba kata obedo ni en e wuon gik moko duto,  to obedo e bwo rit mar joma taye kod joma ochung’ ne mwandu mag wuon-gi, nyaka chop kinde ma wuon-gi noseyangone motelo.  Kamano bende, kane wan nyithindo, wan bende ne wan wasumbni mag gik ma chiko yore kod paro mag pinyni.  Kata kamano, ka kinde ma noket nochopo chuth, Nyasaye nooro Wuode, ma dhako nonyuolo kendo nobedo e bwo chik,  mondo eka ogony joma ni e bwo chik kong’iewogi, mondo mi wan bende oketwa wabed nyithind Nyasaye.  Koro nikech un nyithind Nyasaye, oseoro roho mar Wuode ei chunywa kendo rohono kok niya: “Aba,* Wuonwa!”  Omiyo, koro ok in misumba, to in nyathi Nyasaye, to ka in nyathine, Nyasaye miyo ibedo bende ng’at mabiro yudo pok mare.  Kata kamano, e kinde ma ok nung’eyo Nyasaye, ne un wasumbni mag gik ma kuom adier ok gin nyiseche.  To koro nikech useng’eyo Nyasaye, kata inyalo wach ni, Nyasaye oseng’eyou, obet nade ni udok e gik ma nyap kendo manono ma gin gik ma chiko yore kod paro mag pinyni, ka udwaro tiyonegi kaka wasumbni kendo? 10  Uketo chunyu ahinya e rito odiechienge moyiedh, gi dweye, gi ndalo, kod higni. 11  Aluor ni dipo ka tich matek ma asetimo nikech un obedo kayiem. 12  Owetena, ahombou ni ubed kaka an, nimar an bende ne achal kaka un. Onge ketho ma ne utimona. 13  To ung’eyo ni tuo moro mar ringruok e ma ne omiya thuolo mokwongo mar yalonu wach maber. 14  To kata obedo ni tuonano ne okelonu chandruok, ne ok uchaya kata ne ok ujara; to ne urwaka kaka malaika mar Nyasaye, kaka Kristo Yesu. 15  Kare ere mor ma ne un-go chonno? Nimar an gadier ni ka da nyalore, dikoro usegolo wengeu mi uchomonagi. 16  Omiyo, dibed ni aselokora jasiku nikech awachonu adier? 17  Gitimo kinda ahinya ni mondo giloku, to ok nikech gin gi dwaro moro maber; gidwaro mana ketou mabor koda mondo ubed gi gombo mar luwogi. 18  Kata kamano, kinde duto en gima ber ka ng’ato luwore kodu gi kinda nikech odwaronu ber, ok mana e kinde ma antiere kodu to kinde duto. 19  Un nyithinda matindo, muoch kaya kendo nikech un nyaka chop ubed gi kido mar Kristo kuomu. 20  Daher ni mad ne abedie kodu gie sani, mondo awuo kodu e yo mopogore, nikech wachu omako dhoga. 21  Nyisauru ane, un mudwaro bedo e bwo chik, be uwinjo gima Chik wacho? 22  Kuom ranyisi, iwacho ei Ndiko ni, Ibrahim ne nigi yawuowi ariyo, moro nonyuolo gi jatichne ma nyako to machielo gi dhako man thuolo; 23  kata kamano, wuowi ma jatichne ma nyako nonyuolo, ne onyuol e yo mapile, to machielono dhako man thuolono e ma ne onyuolo kokalo kuom singo mar Nyasaye. 24  Wechegi inyalo tigo kaka ngero; nimar mon-go ochung’ ne singruoge ariyo, achiel en moa e Got Sinai to onyuolo nyithindo ma bedo e bwo tuech, kendo en Hagar. 25  Koro Hagar ochung’ ne Sinai, ma en got moro e piny Arabia, to ochal gi Jerusalem ma nitiere sani, nimar en e bwo tuech kanyachiel gi nyithinde. 26  To Jerusalem man malo ni thuolo, kendo en minwa. 27  Nimar ondik niya: “Bed moil in dhako ma migumba ma ok nyuol; ting’ dwondi malo gi ilo, in dhako ma muoch ok ka; nikech nyithind dhako mowe ng’eny ahinya moloyo mag dhako ma nigi chwore.” 28  Owetena, wan koro wan nyithind singo mana kaka Isaka ne en. 29  To mana kaka e kindeno, jal ma ne onyuol e yo mapile nochako sando jal ma ne onyuol kokalo kuom roho, to kamano bende e kaka timore gie sani. 30  Ndiko to wacho ang’o? Owacho niya: “Riemb jatich ma nyako kod wuode, nimar wuod jatich ma nyakono ok bi yudo pok ngang’ kanyachiel gi wuod dhako man thuolo.” 31  Omiyo, owetena, ok wan nyithind jatich ma nyako, to wan mag dhako man thuolo.

Weche Moler Piny

En dho Aram (Suria) ma tiende en ni “A Wuora!”