Jo-Galatia 3:1-29

  • Timbe mag Chik kod timbe mag yie (1-14)

    • Ng’at makare nobed mangima kuom yie (11)

  • Singo ma ne omi Ibrahim ok en kuom Chik (15-18)

    • Kristo en koth Ibrahim (16)

  • Kaka Chik nobetie kod gimomiyo nobetie (19-25)

  • Nyithind Nyasaye kokalo kuom yie (26-29)

    • Koth Ibrahim gin mag Kristo (29)

3  Yaye un Jo-Galatia ma pachu ok ni kare! En ng’a mosewuondou marach kama, un ma oselernu ayanga wach Yesu Kristo ma ne ogur e yath?  Adwaro ng’eyo wach achielni kuomu: Be ne uyudo roho maler kokalo kuom timbeu mag luwo chik, koso ne en nikech yie ma ne un-go kuom weche ma ne uwinjo?  Kare pachu ok ni kare mana kama? Kane uchako, ne uwuotho ka roho maler tayou, ang’o momiyo koro utieko e yor ringruok?  Be ne ukalo e sand mang’eny kamano mana kayiem nono? An gadier ni ne ok en kayiem.  Kuom mano, be jal ma miyou roho kendo ma timo tije madongo e kindu timogi nikech timbeu mag luwo chik koso nikech ne uyie kuom weche ma ne uwinjo?  Mana kaka Ibrahim “noketo yie kuom Jehova, mi mano nomiyo okwane kaka ng’at makare.”  Kuom adier, ung’eyo ni joma makore gi yie e ma gin nyithind Ibrahim.  Koro nikech Ndiko noneno chon ni kokalo kuom yie Nyasaye ne dhi kwano ji moa e ogendni kaka joma kare, mi nolando ne Ibrahim motelo wach maber niya: “Ogendni duto ibiro guedh kokalo kuomi.”  Omiyo, joma makore gi yie iguedho kanyachiel gi Ibrahim jal ma ne nigi yie. 10  Jogo duto mogeno kuom timbe mag chik ni e bwo kuong’, nikech ondik kama: “Ng’ato ang’ata ma ok sik e weche duto mondik e bug* Chik kuom timogi, en ng’at mokuong’.” 11  E wi mano, nenore maler ni kokalo kuom chik, onge ng’at mikwano kaka ng’at makare e wang’ Nyasaye nimar “ng’at makare nobed mangima kokalo kuom yie.” 12  Koro Chik ok dwar ni ng’ato obed gi yie. Kar mano, “ng’ato ang’ata ma timogi nobed mangima kokalo kuomgi.” 13  Kristo nong’iewowa mi nogonyowa a e kuong’ mar Chik ka nobedo ng’at mokuong’ e lowa, nikech ondik niya: “Ng’ato ang’ata mong’aw e yath, en ng’at mokuong’.” 14  Mano ne en ni mondo gueth ma ne osing ne Ibrahim ochop ne ogendni mamoko bende kokalo kuom Kristo Yesu, eka kokalo kuom yiewa, wayud roho maler ma ne osing. 15  Owetena, awuoyo ka atiyo gi ranyisi mar gima jatimore e ngima dhano: Ka nitie singruok ma ji osewinjoree, kata ka dhano e ma otimo kamano, onge ng’at ma kethe kata ma medoe wach moro. 16  Koro singo ne ochiw ne Ibrahim kendo ne kothe. Singono ok wach ni, “kendo ne kothene,” ka gima ging’eny. To owuoyo mana kuom achiel ni, “kendo ne kothi,” ma en Kristo. 17  E wi mano, awacho kama: Chik ma nobetie higni 430 bang’e, ok keth singruok ma Nyasaye nosetimo motelo, kendo ok oruch gima ne osingno. 18  Nimar kapo ni pok ma Nyasaye chiwo iyudo kokalo kuom chik, mano miyo koro ok otenore kuom singo; to Nyasaye osemiyo Ibrahim pokno e yo mang’won, kokalo kuom singo. 19  To kare Chik en mar ang’o? Ne omede mondo richo onenre ayanga nyaka bang’ ka kodhi ma ne osingno osechopo; kendo Chikno ne ochiw kokalo kuom malaike ka gitiyo gi lwet jagach. 20  Koro jagach ok bedie ne ng’ato achiel, to Nyasaye en ng’at achiel. 21  Be mano nyiso ni Chik kwedo singo mag Nyasaye? Ooyo ngang’! Nimar ka dipo ni chik ne nyalo miyo ji ngima, adier dikoro inyalo kwan ng’ato kaka ng’at makare kokalo kuom chik. 22  To Ndiko noketo gik moko duto e bwo tuech mar richo, mondo singo ma bedoe nikech yie kuom Yesu Kristo ochop ne joma nyiso yie. 23  Kata kamano, ka yie pok nochopo, chik e ma ne ritowa, koketowa e bwo tuech, ka wakiyo yie ma nonego oel. 24  Omiyo, Chik ne obedonwa kaka jarit* ma tayowa nyaka ir Kristo, mondo eka okwanwa kaka joma kare kokalo kuom yie. 25  To nikech sani yie osechopo, koro ok wan e bwo jaritno. 26  Adier, uduto un nyithind Nyasaye kokalo kuom yie e Kristo Yesu. 27  Nimar uduto ma nobatisu e Kristo, userwakoru gi kido kaka mag Kristo. 28  Kuom mano, onge pogruok e kind Ja-Yahudi gi Ja-Grik, bende e kind misumba gi ng’at man thuolo, kata e kind ng’at ma dichwo gi ng’at ma dhako, nimar uduto un achiel e winjruok gi Kristo Yesu. 29  E wi mano, ka un mag Kristo, to adier un koth Ibrahim kendo un joma biro yudo pok ma ne osing.

Weche Moler Piny

Buge ma kamago ne gin midolo e kede, to ne ilosogi gi pien kata gi gik mamoko.
E dho Grik tiend wach molok ni “jarit,” en ng’at ma tije ne en tayo kata rito nyithindo kuom gik ma nyalo hinyogi.