Fweny 6:1-17

  • Nyarombo yawo kido auchiel mokwongo (1-17)

    • Jal ma dhi ka locho e faras ma rachar (1, 2)

    • Jal moidho faras ma kwar ka mach golo kuwe e piny (3, 4)

    • Jal moidho faras ma rateng’ kelo kech (5, 6)

    • Jal moidho faras ma kite obokore iluongo ni Tho (7, 8)

    • E bwo kendo mar misango nitie joma ne oneg (9-11)

    • Yiengni maduong’ mar piny (12-17)

6  Kendo ka Nyarombo nogonyo achiel kuom kido abiriyogo, ne aneno mi ne awinjo achiel kuom chuech mangima ang’wen-go ka wacho gi dwol ma chalo gi mar mor polo niya: “Bi!”  Eka ne ang’iyo mi ne aneno faras ma rachar, to jal ma ne oidhe ne nigi atung’; kendo ne omiye osimbo, eka nowuok mi odhi kolocho, kendo mondo otiek lochone.  Ka nogonyo kido mar ariyo, ne awinjo chuech mangima mar ariyo ka wacho niya: “Bi!”  Ne aneno faras machielo ka biro, kendo ne okwar ka mach, to jal ma ne oidhe ne omi teko mar golo kuwe oa e piny mondo ji onegre e kindgi, kendo ne omiye ligangla moro maduong’.  Ka nogonyo kido mar adek, ne awinjo chuech mangima mar adek ka wacho niya, “Bi!” Kendo ne ang’iyo mi ne aneno faras ma rateng’, to jal ma ne oidhe ne nigi ratinde ariyo mag pimo e lwete.  Ne awinjo gimoro ma chal gi dwol mowuok e kind chuech mangima ang’wen-go ka wacho niya: “Kilo mar ngano nengone en dinari* achiel, kendo kilo adek mag shairi nengone en dinari achiel; to kik iketh mor zeituni kata divai.”  Ka nogonyo kido mar ang’wen, ne awinjo dwond chuech mangima mar ang’wen ka wacho niya: “Bi!”  Kendo ne ang’iyo mi ne aneno faras moro ma kite ne chal ka gima obokore, to nying jal ma ne oidhe ne en Tho. Kendo Liel* ne luwe machiegni. To ne omiye teko e wi bath piny ma romo achiel kuom ang’wen mondo onek kotiyo gi ligangla mabor, gi nok mar chiemo, gi tuo ma kelo tho, kod ondiegi mag piny.  Ka nogonyo kido mar abich, ne aneno e bwo kendo mar misango chunje* mag joma ne oneg nikech wach Nyasaye kendo nikech neno ma ne gisechiwo. 10  Ne gikok gi dwol maduong’ ka giwacho niya: “Ruoth Mamalo Chutho, jal maler kendo madier, en nyaka karang’o ma pod ibiro rito ka ok ing’ad bura ne joma odak e piny kendo chulo kuor nikech rembwa?” 11  Eka moro ka moro kuomgi ne omi kandho ma rachar; kendo ne owachnegi ni girit matin mondi nyaka kwanno mar wasumbni wetegi kod mar owetegi ma ji ne chiegni nego mana kaka gin bende ne oneggi, ochop mi pong’ chuth. 12  Kendo sama nogonyo kido mar auchiel, ne aneno yiengni maduong’ mar piny ka timore; eka wang’-chieng’ nobedo ma rateng’ kaka law gunia molos gi yier,* kendo dwe mangima nobedo kaka remo, 13  to sulwe mag polo ne olwar nyaka e piny, mana kaka sama yamo mager yiengo yadh ng’owo kendo lwaro olembege ma pok ochiek. 14  Eka polo nowuok kama entie mana kaka bug adola ma koro idolo, kendo gode duto gi chulni duto ne ogol mi gia kuonde ma ne gintie. 15  Eka ruodhi mag piny, kod jotelo ma nigi kombe madongo, gi jotend-jolweny, kod jomwandu, gi joma roteke, gi wasumbni duto, kod ng’ato ka ng’ato man thuolo ne opondo e rogni kendo e lwendni mag gode. 16  To ne gisiko ka giwacho ne godego gi lwendni niya: “Podhuru kuomwa mondo upandwa kik wane lela wang’ Jal mobet e kom-lojno kendo kik wayud mirimb Nyarombo, 17  nikech chieng’ maduong’ mar mirimbgi osechopo, to en ng’a ma nyalo chomore gi chieng’no?”

Weche Moler Piny

Ne Glosari.
Tiende ni, “Hades” ma tiende en kar joma otho. Ne Glosari.
Tiende ni, “remb jogo.”
Nyalo bedo ni ne gin yie diek.