Fweny 4:1-11

  • Fweny ma ne one ka Jehova nie polo (1-11)

    • Jehova obet e kom-loch mare (2)

    • Jodongo 24 mobet e kombe mag loch (4)

    • Chuech mangima ang’wen (6)

4  Bang’ mago, ne ang’iyo mi ne aneno dhoot moro moyawore e polo, kendo dwol mokwongo ma ne awinjo ne chal gi mar turmbeta, ka dwolno wuoyo koda ka wacho niya: “Bi ane malo kae, kendo abiro nyisi gik ma nyaka timre.”  Bang’ mano, gikanyono ne abedo e bwo teko mar roho, mi ne aneno kom-loch moro moket e polo, kendo ne nitie ng’at mobet e kom-lojno.  To Jal ma ne obetieno ne chalo gi kidi mar jaspa kod kidi mar sardias,* kendo ne nitie lihudu ma olworo kom-lojno koni gi koni, kendo lihuduno ne chalo gi kidi mar zumaridi.  Bende, ne nitie kombe 24 mag loch molworo kom-lojno koni gi koni, kendo ne aneno jodongo 24 morwakore gi nengni ma rochere kobet e kombe mag lochgo, to ne gisidho osimbo mag dhahabu e wiyegi.  Ne nitie mil polo gi dwol moko kod mor polo ma ne a e kom-lojno; kendo ne nitie teyni abiriyo mag mach ma liel e nyim kom-lojno, to mago gin roho abiriyo* mag Nyasaye.  E nyim kom-lojno, ne nitie gimoro ma chal gi nam mar kio ma rieny ka kidi mar kristol. E dier kama kom-lojno ne nitiere, ne nitie chuech mangima ang’wen mopong’ gi wenge e nyimgi kod ka ng’egi, kendo ne gilworo kom-lojno koni gi koni.  Chuech mangima mokwongo ne chal gi sibuor, to chuech mangima mar ariyo ne chal gi nyaruath, to chuech mangima mar adek ne nigi lela wang’ ma chal gi mar dhano, to chuech mangima mar ang’wen ne chal gi winyo miluongo ni ongo ma huyo.  Kendo moro ka moro kuom chuech mangima ang’wen-go ne nigi buombe auchiel; to kuomgi koni gi koni kod bwogi ne gipong’ gi wenge. To odiechieng’ gi otieno, gisiko ka giwacho kama: “Maler, maler, maler en Jehova Nyasaye, Manyalo Duto, ma ne nitie, kendo ma nitie, kendo ma biro.”  Sa asaya ma chuech mangimago chiwo duong’, gi luor, kod erokamano ne Jal mobet e kom-lojno, ma en Jal ma dak mochwere nyaka chieng’, 10  jodongo piero ariyo gang’wen-go podho piny e nyim Jal mobet e kom-lojno, kendo gilamo Jalno ma dak mochwere nyaka chieng’, kendo gibolo osimbegi e nyim kom-lojno ka giwacho niya: 11  “In Jehova Nyasachwa, in e ma iwinjori yudo duong’, gi luor, kod teko nikech ne ichueyo gik moko duto, kendo gigo ne obetie kendo ne ochuegi nikech dwachi.”

Weche Moler Piny

Tiende ni, “kidi moro makwar ma nengone tek.”
Tiende ni, “teko ma tiyo dibiriyo.”