Fweny 17:1-18

  • Bura moseng’ad ne “Babilon Maduong’” (1-18)

    • Dhako ma ndhaga obet e wi ondiek ma kwar ma rieny (1-3)

    • Ondiek ‘ma ne nitie, to oonge, to pod enobi koa e abiso’ (8)

    • Tunge apar biro kedo gi Nyarombo (12-14)

    • Tunge apar sin gi dhako ma ndhaga (16, 17)

17  Achiel kuom malaike abiriyo ma ne nigi bakunde abiriyogo nobiro mi owachona niya: “Bi ane, adwaro nyisi bura moseng’ad ne dhako ma ndhaga* maduong’no, mobet e wi pige mang’eny,  ma ruodhi mag piny ne terorego, kendo joma odak e piny ne omer gi divai mar terruokne.”*  Eka ne oting’a motera nyaka e thim ka an e bwo teko mar roho maler. Mi ne aneno dhako moro kobet e wi ondiek ma kwar ma rieny ma ne opong’ gi nying mag chayo Nyasaye, kendo ma ne nigi wiye abiriyo gi tunge apar.  Dhakono ne orwakore gi nanga ma rangine rajamna kod ma kwar ma rieny, kendo ne obidhore gi dhahabu gi kite ma nengogi tek kod kite mag lulu, to e lwete ne en gi okombe mar dhahabu ma nopong’ gi gik modwanyore kod gik mochido mag terruokne.  E lela wang’e ne ondikie nying moro ma kore ok ong’ere, niya: “Babilon Maduong’, min joma ndhaga* kendo min gik modwanyore mag piny.”  Kendo ne aneno ka dhakono omer gi remb joma ler kendo gi remb joneno mag Yesu. To kane anene, ne awuoro ahinya.  Omiyo, malaikano nopenja kama: “Ang’o momiyo iwuoro ahinya kamano? Adwaro nyisi wach mopondo e wi dhakono kod ondiek moting’eno, ma nigi wiye abiriyo kod tunge apargo:  Ondiek ma ia nenono ne nitie, to koro oonge, to pod ochiegni biro koa e abiso,* kae to obiro dhi nyaka e kethruokne. Eka joma odak e piny—ma nyinggi pok ondik e bug* ngima nyaka a chakruok mar piny—biro wuoro ka gineno kaka ondiegno ne nitie, to koro oonge, to pod obiro betie.  “Mano en gima dwaro paro ma nigi rieko: Wiye abiriyogo gin gode abiriyo ma dhakono obet e wigi. 10  Kendo nitiere ruodhi abiriyo: Abich osepodho, achiel nitie, kendo machielo pok ochopo; to ka ochopo, obiro betie kuom kinde manok. 11  To ondiek ma ne nitie to kendo ongeno, en bende e ma en ruoth mar aboro, kata kamano, obiro betie kowuok kuom abiriyogo, eka obiro dhi nyaka e kethruokne. 12  “Tunge apar ma ia nenogo gin ruodhi apar ma pok oyudo pinyruoth, kata kamano, giyudo teko mar locho kaka ruodhi kuom sa achiel kanyachiel gi ondiegno. 13  Gin gi paro achiel, kuom mano, gimiyo ondiegno tekogi kod nyalogi mar locho. 14  Gibiro kedo gi Nyarombo, kata kamano, nikech Nyarombono en Jaloch manie wi joloch kendo Ruoth manie wi ruodhi, obiro loyogi. To joma ni kode ma ne oluong, kendo ma ne oyier, mosechung’ motegno, bende biro locho.” 15  Ne owachona kama: “Pige ma ia neno ma dhako ma ndhagano* obetie gin ji mopogore opogore duto, gi ji mang’eny, gi ogendni, kod dhok duto. 16  To tunge apar ma ia nenogo kod ondiegno biro sin gi dhako ma ndhagano,* kendo ginikethe mi giweye duk, eka ginicham ringrene kendo gibiro wang’e gi mach mi gitieke chuth. 17  Nimar Nyasaye noketo ei chunygi mondo gitim ka luwore gi pache, ee, mondo gitim pachgi achielno, ka gimiyo ondiegno loch mar pinyruodhgi, nyaka chop kama weche ma Nyasaye osewacho timre. 18  To dhako ma ia nenono en dala maduong’ ma nigi pinyruoth manie wi ruodhi mag piny.”

Weche Moler Piny

Tiende ni, dhako ma tiyo tij terruok mondo oyudgo pesa.
Wach molok kae ni ‘terruok,’ e dho Grik en porneia, ma tiende en kit nindruok duto ma ok kare.
Tiende ni, joma tiyo tij terruok mondo giyudgo pesa.
Ne Glosari.
Buge ma kamago ne gin midolo e kede, to ne ilosogi gi pien kata gi gik mamoko.
Tiende ni, dhako ma tiyo tij terruok mondo oyudgo pesa.
Tiende ni, dhako ma tiyo tij terruok mondo oyudgo pesa.