Fweny 14:1-20

  • Nyarombo kod ji 144,000 (1-5)

  • Weche moa kuom malaike adek (6-12)

    • Malaika ma huyo e kor polo gi wach maber (6, 7)

  • Joma mor gin joma tho ka gin e winjruok achiel gi Kristo (13)

  • Keyo ariyo mag piny (14-20)

14  Eka ne ang’iyo mi ne aneno Nyarombo kochung’ e Got Sayun, kendo ne en gi ji 144,000 ma nyinge gi nying Wuon mare ondik e lela wang’gi.  Ne awinjo dwol moko ka wuok e polo ma chal gi mor mar pige mang’eny, kendo ma chal gi mor maduong’ mar polo; to dwol ma ne awinjogo ne chalo gi mag jower ma wer ka giluwore gi gige thum ma gigoyo.  Kendo ne giwero wer moro ma ne nenore ni en wer manyien e nyim kom-lojno, kendo e nyim chuech mangima ang’wen-go kod jodongogo, to onge ng’ato ang’ata ma ne nyalo puonjore wendno malong’o, mak mana ji 144,000, ma oseng’iew koa e piny.  Magi e joma ne ok ochidore gi mon; kuom adier, gin joma silili. Gin e joma siko ka luwo Nyarombo kamoro amora ma odhiyoe. Ne ong’iew jogi ka gia kuom oganda dhano mondo gibed kaka nyak mokwongo ne Nyasaye kendo ne Nyarombo,  kendo onge miriambo moro amora ma ne oyud e dhogi; gionge gi mbala moro amora.  Eka ne aneno malaika machielo ka huyo e kor polo ka en gi wach maber ma nyaka chieng’ molando ne joma odak e piny, ne ogendni duto, gi dhoudi duto, gi dhok duto, kod ji mopogore opogore duto.  Ne owacho gi dwol maduong’ niya: “Luoruru Nyasaye kendo umiye duong’, nikech sane mar ng’ado bura osechopo, omiyo, koro lamuru Jalno ma nochueyo polo, gi piny, gi nam, kod sokni mag pi.”  Malaika machielo mar ariyo ne oluwo ka wacho niya: “Ero, osepodho! Babilon Maduong’ osepodho, ma en dhako ma ne miyo ogendni duto madho divai mar owruok gi gombone mar terruok!”*  Malaika machielo mar adek ne oluwogi kowacho gi dwol maduong’ niya: “Kapo ni ng’ato ang’ata olamo ondiegno kod kido mare, mi oket ne ng’atno alama e lela wang’e, kata e lwete, 10  ng’atno bende biro madho divai mar mirimb Nyasaye ma iolo e okombe mar mirimbe ka ok oruw gi gimoro, kendo ibiro sande gi mach kod salfa* e nyim wang’ malaike maler kendo e nyim Nyarombo. 11  Kendo iro mar sand margi dum malo mochwere nyaka chieng’, kendo onge yueyo odiechieng’ gi otieno ne joma lamo ondiegno kod kido mare, kendo joma iketonegi alama mar nyinge. 12  Mano e momiyo biro dwarore ni joma lergo obed gi sinani, gin ma gimakore gi chike Nyasaye kendo ma gimakore gi yie mar Yesu.” 13  Eka ne awinjo dwol moro mowuok e polo ka wacho niya, “Ndik kama: Joma mor gin joma tho ka gin e winjruok achiel gi Ruodhwa chakre sani ka dhi nyime. Ee, roho wacho ni mondo giyue kuom tijgi matek, nimar gik ma ne gitimo luwo bang’gi moriere.” 14  Eka ne ang’iyo mi ne aneno bor polo ma rachar, kendo ng’at ma nobet e bor polono ne chalo gi wuod dhano kosidho osimbo mar dhahabu e wiye, kendo ne en gi pand keyo mabith e lwete. 15  Malaika machielo nochopo koa e hekalu,* koluongo jal mobet e bor polono gi dwol maduong’ niya: “Kaw pandi mondo ichak keyo, nimar sa osechopo mar keyo, nikech cham mag piny osechiek chuth.” 16  Eka jal ma nobet e bor polono nochako tiyo gi pandeno kuom piny, mi ne oka piny. 17  To pod malaika machielo nobiro koa e hekalu* manie polo, kendo en bende ne en gi pand keyo. 18  To pod malaika machielo nobiro koa e kendo mar misango to ne en gi teko e wi mach. Eka noluongo jal ma ne nigi pand keyo mabithno gi dwol maduong’ kowachone niya: “Ti gi pandi mabith mar keyono e kayo saga mag mzabibu mag piny, nimar olemb mzabibune osechiek.” 19  Malaikano notiyo gi pandeno kuom piny mi ne okayo mzabibu mag piny, kendo ne owitogi kama duong’ mibiyoe divai mar mirimb Nyasaye. 20  Ne onyon mzabibugo kama ibiyoe divai oko mar dala, kendo remo ne owuok kama ibiyoe divaino ka idho malo mochopo nyaka e dho farese, kendo ne okwako kama borne dirom kilomita 296.

Weche Moler Piny

Wach molok kae ni “terruok,” e dho Grik en porneia, ma tiende en kit nindruok duto ma ok kare.
Ma en kit poda moro ma mako mach mapiyo ahinya, kendo sama oliel ogolo tik mager kendo marach.
Tiende ni, Kama Ler Moloyo e hekalu.
Tiende ni, Kama Ler Moloyo e hekalu.