2 Timotheo 3:1-17

  • Kinde matek ahinya e ndalo mag giko (1-7)

  • Luwo ranyisi mar Paulo (8-13)

  • “Sik kuom weche misepuonjori” (14-17)

    • Ndiko duto okudh gi much Nyasaye (16)

3  To ng’e wachni, ni kinde matek ahinya nobedie e ndalo mag giko.  Nimar ji nobed joma oherore giwegi, joma ohero pesa, joma pakore, jong’ayi, jo achaya, joma ok winj jonyuolgi, joma ok go erokamano, joma ok makre chuth gi jomamoko,  joma onge hera,* joma ok oikore loso winjruok moro amora, joketh nying ji, joma onge ritruok, joma ger, joma ok ohero gik mabeyo,  jo andhoga, joma wigi tek, joma opong’ gi sunga, joma ohero mor mag piny kar hero Nyasaye,  joma nenore gi oko ni gin joma oluoro Nyasaye to gitamore yie mondo tekone ochik ngimagi; to in pogri ia kuom joma kamago.  Nimar kuom jogi e ma wuokie joma tiyo gi riekni mag wuond ka gidonjo e udi mondo giwuond mon ma yomyom ma richo turo, kendo ma gombo mopogore opogore chiko,  ka kinde duto gisiko gipuonjore to e ma pod ok gibed gi ng’eyo malong’o e wi adiera.  Koro mana kaka Janes kod Jambre nokwedo Musa, jogo bende dhi nyime kwedo adiera. Joma kamago gin joma pachgi osekethore chuth, ka gibedo joma Nyasaye ok oyiego nikech ok giwuoth e yie.  To onge dongruok ma gibiro medo timo, nimar fupgi biro ng’ere maler ne ji duto mana kaka fup ji ariyogo nobedo. 10  In to iseluwori machiegni gi puonjna, gi kit ngimana, gi dwarona, gi yiena, gi horuokna, gi herana, gi sinanina, 11  gi sandna, kod chandruokna kaka ma ne oyuda e Antiokia gi Ikonio kod Listra. Ne anano e bwo sandgo mi Ruodhwa ne oresa kuom gigo duto. 12  Kuom adier, ji duto ma dwaro dak e ngima ma nyiso ni gichiwore chuth ne Nyasaye ka gin e winjruok achiel gi Kristo Yesu, bende ibiro sand. 13  To joma richo gi joma pando kitgi ka giwuondorego biro medo bedo maricho moloyo, ka gimiyo ji lal to gin bende ilalogi. 14  In to sik kuom weche misepuonjori kendo ma ne okonyi yie kuomgi chuth, king’eyo ni gin ng’a gini ma ne ipuonjori kuomgi. 15  Bende, ng’e ni chakre kane in nyathi matin ahinya, isebedo king’eyo ndiko maler ma nyalo miyo ibed mariek mondo iyud warruok kokalo kuom yie kuom Kristo Yesu. 16  Ndiko duto okudh gi much Nyasaye kendo gikonyo kuom puonjo ji, kuom siemo ji, kuom rieyo gik moko, kendo kuom kwero ji ka luwore gi gik makare, 17  mondo ng’at Nyasaye obed moromo chuth, moikore maber ne tije mabeyo duto.

Weche Moler Piny

Ma en hera ma bedo e kind wede, kata ma dhano onego obedgo e kindgi.