2 Petro 1:1-21

  • Mos (1)

  • Tim matek mondo luong mari obed madier (2-15)

    • Kido mamoko e wi bedo gi yie (5-9)

  • Wach mokor osebedo madier chuth (16-21)

1  An Simon Petro, misumba kendo jaote Yesu Kristo, andikonu un jogo moseyudo yie ma jaber ahinya kaka marwa, kokalo kuom tim makare mar Nyasachwa kod mar Jawarwa Yesu Kristo, ka awacho kama:  Ng’wono mogundho kod kuwe mondo omedrenu kokalo kuom ng’eyo malong’o ma un-go e wi Nyasaye kod Yesu Ruodhwa,  nimar teko mar Nyasaye osemiyowa gik moko duto ma konyowa dak e ngima ma nyiso ni wachiwore chuth ne Nyasaye, nikech wan gi ng’eyo malong’o e wi Jal ma noluongowa kokalo kuom duong’ kod tim maber.  Kokalo kuom gigo, osemiyowa singo mabeyo kendo madongo ahinya, mondo kuom duong’ kod tim maber, un bende ubed e kit Nyasaye. Kendo osemiyowa singogo nikech wasetony e gik manie piny ma ketho ji, ma gin gik ma gombo marach kelo.  Nikech wachno, timuru kinda duto mondo e wi yie maru, ubed gi tim maber, to e wi timu maber, ubed gi ng’eyo,  to e wi ng’eyo maru, ubed gi ritruok, to e wi ritruok maru, ubed gi sinani, to e wi sinani maru, ubed gi chiwruok chuth ne Nyasaye,  to e wi chiwruok maru chuth ne Nyasaye, ubed gi hera kaka hera manie kind owete, to e wi herau kaka hera manie kind owete, ubed gi hera.  Nikech ka kidogo obedo kuomu kendo gigundho kuomu chuth, gibiro geng’ou mondo kik ubed joma budho abudha nono kata ma onge nyak kuom wach ng’eyo malong’o ma usebedogo e wi Ruodhwa Yesu Kristo.  Nimar jal ma onge kidogo en muofu, ka odino wang’e kik ne ler,* kendo osebedo ng’at ma wiye wil ni ne osepwodhe mobedo maler koa e richone machon. 10  Kuom mano, owetena, meduru timo matek mondo une ni uchung’ motegno kaka joma Nyasaye ne oluongo kendo yiero adier, nimar ka udhi nyime timo gigo, ok unurem e yo moro amora ngang’. 11  To adier, e yo ma kamano ibiro miu gueth maduong’ mar donjo e Pinyruoth mochwere mar Ruodhwa kendo Jawarwa Yesu Kristo. 12  Nikech mano, kinde duto adwaro ni aparnu wechego kata obedo ni ung’eyogi kendo useguroru motegno e adiera man kuomu. 13  To tek mana ni pod an e del mar ringruokni,* akwano ni en gima kare mondo aparnu wechego ka achiewogo pachu, 14  ka ung’eyo mana kaka an bende, ni del ma an-goni ibiro gol oko machiegnini, mana kaka Ruodhwa Yesu Kristo ne olerona malong’o. 15  Kinde duto abiro timo kar nyalona mondo bang’ ka asea, ubi ubed gi nyalo mar paro wechegi un uwegi. 16  Ooyo, ne ok watiyo gi sigendni mag miriambo mochuogi gi riekni mag dhano kane wanyisou wach teko mar Ruodhwa Yesu Kristo kod wach kinde ma biro yudo ka entie,* to ne en nikech ne waneno duong’ ma en-go gi wang’wa. 17  Nikech nomiye luor kod duong’ koa kuom Nyasaye Wuonwa ka nonyise weche ma chal gi ma luwogi kokalo kuom duong’ miwuoro: “Ma Wuoda ma ahero, ma an awuon aseyiego.” 18  Ee, ne wawinjo wechego koa e polo sama ne wan kode e got maler. 19  Omiyo, wach mokor koro osebedonwa madier chuth, kendo utimo maber kuom keto pachu ahinya kuom wachno mana kaka duket wang’u kuom taya ma rieny kama nitiere mudho (nyaka chop piny ru kendo sulwe mokinyi orieny) ei chunyu. 20  Nimar useng’eyo wachni motelo, ni onge wach moro amora mokor ei Ndiko ma dhano e ma ne osiekogo gi pache owuon. 21  Nikech onge kinde moro amora ma wach mokor ne obiro nikech dwaro mar dhano, to ji ne wacho weche moa kuom Nyasaye ka luwore gi kaka roho maler ne tayogi.

Weche Moler Piny

Tiende ni, “ma neno mana gik man machiegni.”
Tiende sie en “tabenakel.”
Wach molok kae ni “entie,” en parosia e dho Grik. Ne Glosari.