2 Johana 1:1-13

  • Mos (1-3)

  • Wuothuru e adiera (4-6)

  • Beduru motang’ gi joma wuondou (7-11)

    • Kik umosgi (10, 11)

  • Chenro mar limbe kod mos (12, 13)

1  An jaduong’ ma hike ng’eny, andiko ne dhako moyier* kendo ne nyithinde ma ahero gadier, to ok mana an kenda e ma aherogi, to bende jogo duto moseng’eyo adiera,  nikech adiera siko e iwa kendo obiro bedo kodwa nyaka chieng’.  Wabiro bedo gi ng’wono mogundho, gi kech, kod kuwe moa kuom Nyasaye Wuonwa, kendo moa kuom Yesu Kristo, Wuod Wuonwa, kanyachiel gi adiera kod hera.  Amor gilala nikech aseyudo ka moko kuom nyithindi wuotho ei adiera, mana kaka ne wayudo chik moa kuom Nyasaye Wuonwa.  Omiyo, koro asayi, in dhako, ni waherre ng’ato gi ng’ato. (Ok andikni e wi chik moro manyien, to en mano musebedogo nyaka a chakruok.)  To ma eri e tiend hera, ni wadhi nyime wuotho ka luwore gi chikene. Mano e chik, mana kaka usewinjo nyaka a chakruok, ni onego udhi nyime wuotho e hera.  Nimar jowuond mang’eny osesieko e piny, ma ok nyis yie ni Yesu Kristo ne obiro e ringruok. Mano e jawuond kendo en jasik Kristo.  Beduru motang’ mondo kik ulal gik ma wasenyago kuom tijwa matek, to mondo uyud pok mopong’ chuth.  Ng’ato ka ng’ato ma kalo puonj mar Kristo kendo ok osik e puonjno, jalo ok ni e winjruok achiel gi Nyasaye. Ng’at ma siko e puonjno en e ng’at manie winjruok achiel gi Nyasaye Wuonwa kendo gi Wuode. 10  Ka ng’ato ang’ata obiro iru to ok okel puonjni, kik urwake e uteu kata kik umose. 11  Nikech ng’at ma mose riwore kode e timbene maricho. 12  Kata obedo ni an gi weche mang’eny monego andiknu, ok adwar timo kamano e otas gi wino, to ageno biro iru mondo awuo kodu wang’ gi wang’, mondo mor maru obed mopong’ chuth. 13  Nyithind nyameru ma oyier ooroni mos.

Weche Moler Piny

Nyalo bedo ni “dhako moyier” ochung’ ne dhako moro achiel kata kanyakla moro mar Jokristo e ndalo joote.