1 Timotheo 6:1-21

  • Wasumbni mondo omi ruodhi maggi duong’ (1, 2)

  • Jopuonj mag miriambo kod hero pesa (3-10)

  • Puonj mimiyo ng’at Nyasaye (11-16)

  • Bedo jomwandu e timbe mabeyo (17-19)

  • Rit gima osemiyi (20, 21)

6  Joma gin wasumbni mondo odhi nyime kwano ruodhi maggi kaka joma owinjore yudo duong’ chuth, mondo kik ji owuo ngang’ e yor achaya e wi nying Nyasaye kod puonjne.  E wi mano, wasumbni ma tiyo ne ruodhi manie yie kik ocha ruodhigo mana nikech gin owete e yie. Kar mano, gitinegi ka gin gi chuny moikore moloyo nimar joma yudo kony kuom tijgi maber gin joma ni e yie kendo gin owete ma gihero. Sik ka ipuonjo ji wechegi kendo ka isayogi kuom wechegi.  Ka ng’ato puonjo puonj moro machielo kendo ok oyie gi puonj mangima moa kuom Ruodhwa Yesu Kristo, to bende ok oyie gi puonj ma nyiso chiwruok chuth ne Nyasaye,  ng’at ma kamano opong’ gi sunga kendo ok ong’eyo tiend gimoro. Ohero mana piem e mbaka kod mino weche. Gik ma kamago kelo ich-lit, dhawo, ketho nying, chich maricho,  kod ywaruok mosiko e wi gik ma tindotindo mijiwo gi joma pachgi orochore kendo ma koro ok ong’eyo adiera, ka giparo ni chiwruok chuth ne Nyasaye en yor yudo ohala.  Kuom adier, chiwruok chuth ne Nyasaye kod bedo joma gik ma wan-go romowa nigi ohala maduong’.  Nimar ne ok wabiro gi gimoro amora e piny, bende ok wanyal a gi gimoro.  Omiyo, ka wan gi chiemo kod lewni, mago mondo oromwa.  To joma kedo ahinya mondo gibed jomwandu lwarga e tem gi obadho kod gombo mang’eny manono kendo ma kelo hinyruok, ma nyumo ji e kethruok kendo ma tiekogi chuth. 10  Nikech hero pesa en achiel kuom chakruok mar gik moko duto ma kelo hinyruok, kendo kuom bedo gi hera ma kamano, jomoko osebayo yo mi giweyo yie kendo gisechwowore giwegi kuonde duto gi lit mang’eny. 11  To in, A ng’at Nyasaye, ring ia kuom gik ma kamago. To law tim makare, gi chiwruok chuth ne Nyasaye, gi yie, gi hera, gi sinani, kod muolo. 12  Ked e lweny malong’o mar yie, mak matek ngima ma nyaka chieng’ ma ne oluongie kendo ma ne ihulo wachne maber e nyim joneno mang’eny. 13  Achiki e nyim Nyasaye ma miyo gik moko duto siko ka gingima, kendo achiki e wang’ Kristo Yesu ma nochiwo neno e lela e nyim Pontio Pilato, 14  ni mondo iluw weche ma achikogo e yo malong’o chuth kendo ma onge bura nyaka chop kinde ma Ruodhwa Yesu Kristo biro fwenyoree. 15  Jal mamor kendo ma en kende e jateko biro nyiso wach fwenyruokno e ndalo sie moseket. En e Ruodh ruodhi kendo Jaloch mar joloch, 16  jal ma en kende e ma ok onyal tho, jal modak e ler ma ok nyal chopie, jal ma onge dhano moseneno kata ma nyalo nene. Duong’ kod teko mochwere mondo obedne. Amin. 17  Chik joma gin jomwandu e ndaloni ni kik gibed jong’ayi kendo ni mondo giket genogi kuom Nyasaye ma chiwonwa gik moko duto e yo mogundho mondo wamorgo, to kik giket geno kuom mwandu ma korgi ok ong’ere. 18  Nyisgi mondo gitim gik mabeyo, gibed jomwandu e timbe mabeyo, gibed jochiwo ka giikore pogo ne jomamoko gigegi, 19  nikech kuom timo kamano, gibedo joma osekano ne gin giwegi mise maber ne kinde ma biro mondo gimak matek ngimano ma en ngima madier. 20  Timotheo, rit gima osemiyi ma ok ichik iti ne weche manono ma njawo gik maler, kendo ibed mabor gi miriambo ma ji gwenyo to giluongo ni ng’eyo to chutho ok en ng’eyo. 21  Kuom nyisruok gi ng’eyo ma kamano, jomoko osebayo yo mi giweyo yie. Ng’wono mogundho mondo obed kodu.

Weche Moler Piny