1 Jo-Korintho 12:1-31

  • Mich ma roho chiwo (1-11)

  • Ringruok achiel, fuonni mang’eny (12-31)

12  Koro owetena, kuom wach mich ma roho chiwo, ok daher ni mondo ubed kukia.  Ung’eyo ni kane un jo ogendni,* ne iwuondou mondo ulam sanamu ma ok nyal wuoyo, ka uluwogi kamoro amora ma ne giterue.  Koro daher ni ung’e ni onge ng’ato ma ka wuoyo kokalo kuom roho mar Nyasaye, onyalo wacho kama: “Okuong’ Yesu!” kendo onge ng’at ma nyalo wacho niya: “Yesu en Ruodhwa!” mak mana kokalo kuom roho maler.  Koro nitie mich mopogore opogore, to roho en achiel;  kendo nitie migepe mopogore opogore mag konyo ji, to e ma Ruodhwa pod en achiel;  kendo nitie tije mopogore opogore, to Nyasaye achiel e ma pod timogi giduto ei ng’ato ka ng’ato.  To roho nenore kuom ng’ato ka ng’ato mondo ber obedie.  Nikech ng’ato achiel imiyo weche mag rieko kokalo kuom roho, to machielo imiyo weche mag ng’eyo kokalo kuom roho achielno,  kendo ng’at machielo imiyo yie kokalo kuom roho achielno, to machielo imiyo mich mag chango ji kokalo kuom roho achielno, 10  to pod ng’at machielo imiyo teko mar timo tije madongo, kendo machielo mar koro wach, to machielo fwenyo weche moa kuom much Nyasaye, to machielo dhum gi dhok mopogore opogore, kendo machielo loko tiend dhok mopogore opogore. 11  To tijego duto itimo kokalo mana kuom roho achielno, kopogo ne ng’ato ka ng’ato mana kaka odwaro. 12  Nimar mana kaka ringruok en achiel to en gi fuonni mang’eny, kendo kata obedo ni fuonni duto mag ringruogno ng’eny, gin ringruok achiel, kamano bende e kaka Kristo en. 13  Nikech kokalo kuom roho achiel, waduto ne obatiswa mi wabedo ringruok achiel, bed ni wan Jo-Yahudi kata Jo-Grik, bed ni wan wasumbni kata wan thuolo, kendo waduto ne wayudo roho achielno. 14  Nimar kuom adier, ringruok ok bed mana gi fuoni achiel, to ging’eny. 15  Ka dipo ni tielo nyalo wacho ni, “Nikech ok an lwedo, ok an fuoni mar ringruok,” mano ok mone bedo fuoni mar ringruok. 16  To ka dipo ni it nyalo wacho ni, “Nikech ok an wang’, ok an fuoni mar ringruok,” mano ok mone bedo fuoni mar ringruok. 17  Ka dine bed ni ringruok duto en wang’, kare nyalo mar winjo dine obedo kanye? To ka dine bed ni ringruok duto en mar winjo, kare nyalo mar ng’uecho dine obedo kanye? 18  Kata kamano, Nyasaye oseketo moro ka moro kuom fuonni mag ringruok mana kaka nohero. 19  Ka dine bed ni giduto gin fuoni achiel, ringruok dobedo kanye? 20  To koro kata obedo ni gin fuonni mang’eny, pod gin ringruok achiel. 21  Wang’ ok diwach ne lwedo ni, “Aonge kodi gi tich,” kata wich bende ok nyal wacho ne tielo ni, “Aonge kodi gi tich.” 22  To mopogore gi mano, fuonni mag ringruok ma nenore ni nyap, gin ma dwarore, 23  kendo fuonni mag ringruok ma waparo ni ok nigi duong’ ahinya, wamiyogi duong’ moloyo, kendo fuonni ma nenore ni ok long’o ahinya, imiyogi luor moloyo, 24  fuonni ma nenore ni long’o, ok gichando gimoro. Kata kamano, Nyasaye oseloso ringruok kamano, komiyo fuoni ma nenore ni orem oyud duong’ moloyo, 25  mondo kik bedie pogruok e ringruok, to fuonnine onego odewre moro gi nyawadgi. 26  Ka fuoni achiel winjo lit, mamokogo duto winjo lit kanyachiel kode; bende ka fuoni achiel imiyo duong’, mamokogo duto yudo mor kanyachiel kode. 27  Koro un ringruok mar Kristo, kendo ng’ato ka ng’ato kuomu en fuoni mar ringruogno. 28  Kendo Nyasaye osemiyo jomoko migepe ei kanyakla: mokwongo, joote; mar ariyo, jonabi; mar adek, jopuonj; eka tije madongo; kae to mich mag chango ji; kod timo tije ma konyo ji; kod nyalo mag tayo weche; kod dhum gi dhok mopogore opogore. 29  Ok ni ji duto gin joote, koso? Ok ni ji duto gin jonabi, koso? Ok ni ji duto gin jopuonj, koso? Bende, ok ni ji duto timo tije madongo, koso? 30  Ok ni ji duto nigi mich mag chango ji, koso? Ok ni ji duto dhum gi dhok mopogore opogore, koso? Ok ni ji duto loko dhok, koso? 31  To sikuru kutimo matek mondo uyud mich madongo moloyo. Koro abiro nyisou yo maberie moloyo duto.

Weche Moler Piny

Tiende ni, joma ok ni e yie.