Kal idhi e weche manie iye

Kal idhi kama ochanie weche mantie

 NGIMAWA KAKA JOKRISTO

Lendo e Alwora Miwachoe Dhok Mopogore Opogore

Lendo e Alwora Miwachoe Dhok Mopogore Opogore

Kinde mang’eny, ji rwakoga wach Pinyruoth ahinya ka olandnegi wachno e dhoggi giwegi. To nyaka bed ni mano emomiyo chieng’ Pentekost e higa 33 B.K., Jehova nochano mondo ‘Jo-Yahudi moluoro Nyasaye, ma noa e ogendni duto manie bwo polo’ owinj wach maber ‘e dhok ma ne onyuolgigo,’ kata obedo ni ne ging’eyo dhok mamoko kaka Hibrania kata Grik. (Tic 2:5, 8) E kindegi, kanyakla mayudore e gwenge miwachoe dhok mopogore opogore bedoga gi alwora mag lendo mokiewo. Ere kaka jolendo manie kanyaklago nyalo tiyo kanyachiel mondo gichiw neno ne ji duto ka konchiel be gitemo mondo kik ginwore e udi ma jomoko oselende ma gichwany weg udi?

  • Ng’aduru rieko (Nge 15:22): Jorit tij lendo mag kanyakla manie alworago onego ong’ad paro kanyachiel mondo giket chenro maber mar lendo. Kapo ni kanyakla ma wacho dhok mamoko nigi alwora matin mar lendo, ginyalo dwaro ni kik ulend e ute manie alworagi. Kata kamano, ka kanyaklago ok nyal tieko alworagi duto nikech ute moko ni maboyo, ginyalo kwayo kanyaklau olend e ute duto manie alworagigo, kae to unyisgi joma uyudo morwako wach mondo gimed konyogi. (od 93 ¶37) Kata, ginyalo kwayo kanyaklau mondo onyisgi kapo ni uyudo joma wacho dhok ma kanyaklagi tiyogo unyalo miyogi adres mar wuon odno mondo gimanye. (km 7/12 5, sanduku) Keturu e paro ni nitie udi moko ma ji wachoe dhok mokalo achiel. Onego uluw chike mag pinyu ma tayo kaka onego oti gi weche mag ng’ato (data protection laws).

  • Tiuru kanyachiel (Ef 4:16): Luwuru kaka jarit tij lendo ma kanyaklau owacho. Dibed ni ipuonjori Muma gi ng’at madwaro ni opuonje gi dhok mopogore gi ma utiyogo e kanyaklau? Japuonjreno nyalo timo dongruok mapiyo ka odhi e kanyakla kata grup miwachoe dhokno.

  • Ikri (Nge 15:28; 16:1): Ka wuon ot wacho dhok mopogore, tem ahinya mondo ilendne. Inyalo timo ikruok mondo ing’e dhok ma ji nyalo wacho e alworau, kendo inyalo download Muma kod vidio mayudore e dhokgo. Bende, inyalo tiyo gi JW Language app mondo ipuonjri kaka inyalo moso ji kitiyo gi dhokgo.