Kal idhi e weche manie iye

Kal idhi kama ochanie weche mantie

Jasik Kristo En Ng’a?

Jasik Kristo En Ng’a?

Nitiere sinema moro ma nyocha olos miluongo ni Antichrist (Jasik Kristo).

Grup moro mong’ere mar jothum noloso thumbe moko kae to giluongogi ni Antichrist Superstar.

Jasomo moro miluongo ni Friedrich Nietzsche, ma ne odak e kind higni mag 1800 nyaka 1900, noluongo achiel kuom buge ma ne ondiko ni The Antichrist.

Ruodhi kod joloch ma ne odak bang’ tho mar joote ne joluongo joma ne kedo kodgi ni josik Kristo.

Ng’at moro ma rahuma miluongo ni Martin Luther, ma ne a e piny German noluongo pop mag Katholik ni jowasik Kristo.

NIKECH oseti gi wach mar “antikristo” kata “jasik Kristo” e gik mang’eny kaka e sinema kendo joloch bende osetiyo kode, mano miyo ji mang’eny penjore niya: Jasik Kristo en ng’a? Be ng’eyo tiend wachno nyalo konyowa e yo moro amora? Muma nyalo konyowa ng’eyo tiend jasik Kristo. Wachno yudore e Muma nyadibich.

IFWENYO JASIK KRISTO

Jaote Johana kende e jandik Muma ma ne otiyo gi wach mar “jasik Kristo.” Ere kaka ne olero tiend jasik Kristo? Ne ane weche ma ne ondiko e Johana mokwongo, nondiko niya: “Un nyithindo matindo, ma e sa mogik, kendo mana kaka usewinjo ni jasik Kristo biro, to kata mana gie sani nitie jowasik Kristo mang’eny ma osesieko, mano e momiyo wang’eyo ni koro en sa mogik. Ne gia kuomwa, to ne ok gichal kodwa . . . Jamiriambo en ng’a, ka ok mana jal ma kwer ni Yesu ok en Kristo? Jalo e ma en jasik Kristo, en e ng’at ma kwedo Nyasaye Wuonwa kod Wuode.”—1 Johana 2:18, 19, 22.

Jaote Johana nong’eyo ni jasik Kristo ochung’ ne ji duto ma puonjo miriambo e wi Yesu Kristo kod puonjne

Ang’o ma wanyalo puonjore kuom wechego? Johana ne owacho ni nitie “jowasik Kristo mang’eny,” mano nyiso ni jasik Kristo ok en ng’at achiel to en wach mitiyogo kiwuoyo kuom grup mar ji. Riwruoge kata ji ma lando miriambo, ma kwedo ni Yesu ok e Kristo kata Mesia, kata ma temo guenyo adiera mantie e wi winjruok mantie e kind Nyasaye kod Wuode Yesu Kristo, e ma iluongo ni jasik Kristo. Jogo bende wacho ni gin e Kristo kendo ni gin e ma gitiyo e lo Kristo, kata kamano, “ne gia kuomwa” nikech ne giweyo luwo puonj mag Muma. E wi mano, nyaka bed ni joma kamago ne nitie ka ne Johana ondiko barupe “e sa mogik,” ma nyalo bedo ni en ndalo mogik mag joote.

Ang’o machielo ma Johana ne ondiko e wi jasik Kristo? Kowuoyo kuom jonabi mag miriambo, nochiwo siem kama: “Wach moro amora ma hulo ayanga ni Yesu Kristo ne obiro e ringruok, mano e wach moa kuom Nyasaye gadier. To wach moro amora ma nenore ni oa kuom much Nyasaye to ok ohul ayanga ni oyie kuom Yesu, mano ok en wach moa kuom Nyasaye. E wi mano, wachno en wach moa kuom jasik Kristo ma usewinjo ni ne dhi biro, to sani koro entiere e piny.” (1 Johana 4:2, 3) Kae to barua mar ariyo ma Johana ne ondiko ne onwoyo gima nosewacho chon kama: “Jowuond mang’eny osesieko e piny, ma ok nyis yie ni Yesu Kristo ne obiro e ringruok. Mano e jawuond kendo en jasik Kristo.” (2 Johana 7) Omiyo, Johana nong’eyo ni jasik Kristo ochung’ ne ji duto ma puonjo miriambo e wi Yesu Kristo kod puonjne.

 “JONABI MAG MIRIAMBO” KOD “JAKETH-CHIK”

Yesu ne osiemo jolupne ni jonabi mag miriambo ne dhi biro “ka girwako lep rombe to e igi gin ondiegi mawuor ma ngemo”

Higni mang’eny kapok Johana ne ondiko e wi jowuondgo, Yesu Kristo nosiemo jolupne kama: “Tang’uru gi jonabi mag miriambo, ma biro iru ka girwako lep rombe to e igi gin ondiegi mawuor ma ngemo.” (Mathayo 7:15) Jaote Paulo bende nosiemo Jokristo ma ne ni Thesalonika niya: “Kik uwe mondo ng’ato omi ulal e yo moro amora, nimar mano [tiende ni odiechieng Jehova] ok bi betie nyaka ng’anjo ne lamo madier bi mondi, kendo bang’ ka osefweny jalo ma en jaketh-chik, tiende ni wuod kethruok.”—2 Jo-Thesalonika 2:3.

Wechego nyiso ni e kinde Jokristo mokwongo jonabi mag miriambo kaachiel gi Jokristo mong’anjo moweyo adiera, nosechako nyoso yie mar joma nie kanyakla mar Jokristo. Jogo duto ma lando miriambo e wi Yesu Kristo kod puonjne e ma Johana ne luongo ni “jasik Kristo.” Paulo ne onyiso kaka Jehova neno jogo ka ne oluongogi ni “wuod kethruok.”

TANG’ GI WECHE MAG JOSIK KRISTO MA KINDEGI

To nade e ndalowagi? Pod nitie riwruoge kod ji ma kwedo Kristo kod puonjge, kendo mago e josik Kristo. Gilando miriambo goyiem mondo gigueny ji kik ng’e adiera e wi Wuonwa Jehova, kod Wuode Yesu Kristo. Omiyo, dwarore ahinya ni watang’ gi wuond ma kamago. We wanon ane ranyisi ariyo.

Kuom higni mang’eny, kanise mathoth osejiwo puonj mar Nyasaye en didek, ka giwacho ni Wuoro gi Wuode romre. Omiyo, jasik Kristo pando adiera e wi Jehova Nyasaye kod Yesu Kristo. Mano osemiyo ji mang’eny ok luw tim Yesu Kristo, kendo ok ginyal sudo machiegni gi Nyasaye, kaka Muma jiwogi mondo gitim.—1 Jo-Korintho 11:1; Jakobo 4:8.

Kanise bende osejiwo ji tiyo gi Mumbe ma joloko ogoloe nying Nyasaye ma en Jehova. Gitimo mano kata obedo ni nying Nyasaye yudore nyadi 7,000 e dhok ma ne okwong ndikgo Muma. Ang’o mosetimore nikech mano? Mano osemiyo ji mang’eny ok ong’eyo Nyasaye madier.

Kata kamano, nitie joma chunygi nikare ma oseng’eyo nying Nyasaye ma en Jehova, kendo gisudo machiegni kode. Mano e gima ne otimore ne Richard, ma pod paro mbaka ma ne ogoyo gi Joneno mag Jehova moko ariyo. Richard wacho niya: “Ne gisomona e Muma ni nying Nyasaye en Jehova. Ne ahum nono ka ne afwenyo ni Nyasaye nigi nying, gima ne pok awinjoga.” Chakre chieng’no, ne ochako tiyo gi chike manie Muma mondo omor Jehova. Omedo wacho kama: “Ng’eyo nying Nyasaye osekonya bedo gi winjruok maber kode.”

Kuom higni mogwaro, josik Kristo osebedo ka wuondo ji mang’eny ahinya. Kata kamano, wach Nyasaye ma en Muma, nyalo konyowa ng’eyo adiera e wi jasik Kristo, kendo ketowa thuolo kuom puonj mag miriambo mag jasik Kristo.—Johana 17:17.