Kal idhi e weche manie iye

Kal idhi kama ochanie weche mantie

 WACH MADUONG’ MA GASET WUOYOE | YESU NE OWAROWA KUOM ANG’O?

Kaka Tho mar Yesu kod Chierne Nyalo Konyi

Kaka Tho mar Yesu kod Chierne Nyalo Konyi

“Yie kuom Ruoth Yesu to ibiro resi.”—Tich Joote 16:31.

Mago ne gi weche ma jaote Paulo kod Sila nowacho ka ne giwuoyo gi jarit jela e taon mar Filipi man Makedonia. Wechego tiendgi ang’o? Mondo wang’e gimomiyo nyaka ng’ato oket yie kuom Yesu mondo orese kuom tho, nyaka wakwong wang’e gimomiyo watho. We wanon ane gima Muma puonjo.

Ne ok ochue dhano mondo otho

“Jehova Nyasaye nokawo dhano, nokete e puodho mar Eden mondo olose kendo orite. Mi Jehova Nyasaye nochiko dhano kowacho niya, Kuom olemb yedhe duto inyalo chamo achama: to olemb yath makelo ng’eyo ber gi rach, kik icham: nikech e ndalo michamogo, tho to initho.”—Chakruok 2:15-17.

Nyasaye noketo Adam ma ne en dhano mokwongo e puodho mar Eden. Mano ne en Paradiso e pinyka ma nopong’ gi le mopogore opogore, kod yien. Ne nitie yien ma nyago olemo ma Adam ne nyalo chamo. Kata kamano, Jehova Nyasaye ne onyiso Adam maler ni nitie yath moro ma ne ok onego ocham olembe, to ka ochamo ne odhi tho.

Be Adam ne owinjo tiend chikno? Adam ne ong’eyo gima tho en nikech ne oseneno ka le tho. Kapo ni Nyasaye ne ochueyo Adam kong’eyo ni obiro tho bang’e, kare ne onge tiende miye chikno. Adam ne ong’eyo ni ka owinjo chik Nyasaye kendo ok ochamo olemb yadhno ne odhi dak nyaka chieng’, tiende ni ne ok odhi tho.

Jomoko wacho ni yadhno ne ochung’ ne tim nindruok, kata kamano mano ok nyal bedo adier. Adiera en ni, Jehova ne dwaro ni Adam gi Hawa ‘onyuolre kendo gimedre’ mondo ‘gipong’ piny kendo gibed gi loch kuome.’ (Chakruok 1:28) Ne okwergi chamo olemb yath masie. Jehova noluongo yadhno ni “yath makelo ng’eyo ber gi rach,” nikech yadhno nochung’ ne ratiro ma Jehova nigo mar nyiso dhano gik mabeyo kod maricho. Ka dine Adam ok ochamo olemb yadhno, dine onyiso ni owinjo Nyasaye kendo ni obolore ne Jachuech ma nosemiye gik mogundho kamano.

 Adam ne otho nikech ne ok owinjo Nyasaye

‘Kendo Nyasaye nowacho ni Adam niya: “Nikech isechamo yadhno ma nakweri, kuom luch wang’i inicham kuon, nyaka idogi e lowo; nikech kanyo e ma nogolie. Nikech in buru, kendo inidogi ni bur.”’—Chakruok 3:17, 19.

Adam nochamo olemb yath ma nokwere. Mano ne en tim ma Nyasaye ok nokawo mayot. Ne en ng’anjo maduong’ ahinya kendo achaya ne gik moko duto mabeyo ma Jehova nosetimone. Ka ne Adam ochamo olemono, nonyiso ni ok odwar luwo Jehova, to nodhi luwo yorene owuon ma onge ng’at ma chike. Yo ma Adam noyierono osekelo ne dhano chandruoge madongo.

Adam ne otho bang’e mana kaka Jehova nowacho. Nyasaye nochueyo Adam “gi buru mar lowo” kendo noyudo osenyiso Adam ni ne odhi ‘dok e lowo.’ Ka ne Adam otho, ne ok odhi nyime dak ka koro en chuech machielo, kendo ne ok odhi e polo. Ka notho, nobedo ma onge ngima mana kaka buru mar lowo ma nochueyego.—Chakruok 2:7; Eklesiastes 9:5, 10.

Watho nikech wan koth Adam

“Kaka richo nodonjo e piny kokalo kuom ng’ato achiel, kendo tho nobiro kokalo kuom richo, tho nolandore kuom ji duto nikech giduto ne gisetimo richo.”—Jo-Rumi 5:12.

Richo ma ne Adam otimo mar tamruok luwo chik Nyasaye, ne okelo chandruoge. Adam ne olalo geno ma ne en-go mar dak nyaka chieng’ e ngima maber, to ok mar dak mana kuom higni 70 kata 80 kende. E wi mano, ka Adam notimo richo ne olalo ngimane makare chuth kendo mano nomiyo kothe duto obedo morem.

Waduto wan nyikwa Adam. Kokalo kuom Adam, ne onyuolwa gi ringruok morem ma nigi richo ma miyo bang’e watho. Paulo nolero maler lit ma wakaloe. Ne ondiko kama: “An to an mar ringruok, kendo an jal ma richo oseng’iewo. Yaye, mano kaka an ng’at ma chandore! En ng’a ma biro resa kuom ringruok ma tera e tho ma kamani?” Kae to Paulo dwoko penjono kama: “Agoyo erokamano ne Nyasaye kokalo kuom Yesu Kristo Ruodhwa!”—Jo-Rumi 7:14, 24, 25.

 Yesu nochiwo ngimane mondo wadag nyaka chieng’

“Wuonwa oseoro Wuode mondo obed Jawar mar piny.”—1 Johana 4:14.

Jehova Nyasaye ne otimo chenro mar warowa kuom richo kendo gonyowa a e tho ma onge geno mar chier. Notimo mano nade? Ne ooro Wuode mohero oa e polo mondo obi onyuole e piny kae ka en gi ngima makare chuth kaka mane Adam olalo. Mopogore gi Adam, Yesu “ne ok otimo richo moro amora.” (1 Petro 2:22) Nikech ne oonge gi richo, ne ok onyal bedo e bwo kum mar tho omiyo ne onyalo dak kaka dhano makare nyaka chieng’.

Kar mano Jehova ne oyie mondo wasik Yesu oneg Wuode. Bang’ ndalo adek, Jehova ne ochiere ka koro en gi del mar polo nikech ne odhi dok e polo. Ka ne Yesu odok e polo, ne omiyo Nyasaye misango mar ngimane makare ma ne ogolo mondo odwok ngima makare ma Adam ne olalo. Jehova ne oyie gi misangono mondo jogo duto ma keto yie kuom Yesu oyud ngima mochwere.—Jo-Rumi 3:23, 24; 1 Johana 2:2.

Omiyo, Yesu ne odwoko gima Adam ne olalo. Ne osande monege mondo wayud ngima mochwere. Muma wacho kama: “Yesu . . . ne oyudo lit mar tho mondo kokalo kuom ng’wono mogundho mar Nyasaye, obil tho ne ji duto.”—Jo-Hibrania 2:9.

Chenroni puonjowa mathoth e wi Jehova. Chikene makare chuth ne omiyo dhano morem ok nyal reso ngimagi gin giwegi. Kata kamano, nikech en jahera kendo ong’won, mano ne omiyo ochopo chikene makare kata obedo ni mano ne ochuno ni ochiw Wuode mondo ores dhano.—Jo-Rumi 5:6-8.

Yesu ne ochier a kuom joma otho, jomotho bende ibiro chier

“Kristo osechier oa kuom joma otho, en e nyak mokwongo kuom joma osenindo e tho. Nimar ka tho nobiro kokalo kuom ng’ato achiel, joma otho bende ibiro chier kokalo kuom ng’ato achiel. Nimar mana kaka kuom Adam dhano duto tho, e kaka bende kuom Kristo dhano duto biro bedo mangima.”—1 Jo-Korintho 15:20-22.

En adier ni Yesu ne odak e piny ma bang’e ne otho, kata kamano, gin ang’o ma nyiso ni ne ochiere a kuom jomotho? Achiel kuom gik ma nyiso gadier ni Yesu ne ochier en ni ne ofwenyore ne ji mang’eny e kinde kod kuonde mopogore opogore. Nitie chieng’ moro ma nofwenyore ne ji mokalo 500. Jaote Paulo ne owuoyo kuom wachno e barupe ma nondiko ne Jo-Korintho, kowacho ni moko kuomgi pod ne ngima, omiyo, ne ginyalo chiwo neno kuom weche ma ne gineno kendo ma ne giwinjo e wi Yesu.—1 Jo-Korintho 15:3-8.

Bende, weche ma Paulo nondiko ni Kristo en “nyak mokwongo” mar joma osechier nyiso ni nitie joma ne idhi chier bang’e. Yesu owuon nowacho ni ndalo biro ma “ji duto manie liete nowinj dwonde mi giniwuog oko.”—Johana 5:28, 29.

 Nyaka waket yie kuom Yesu mondo wadag nyaka chieng’

“Nimar Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.” —Johana 3:16.

Bug Chakruok e Muma nyisowa kaka tho nodonjo e piny kendo kaka Paradiso nolal. Bug Fweny to nyisowa ndalo ma ibiro tiek tho kendo kaka Nyasaye biro dwoko Paradiso e pinyka. E kindeno, ji biro dak e ngima maber nyaka chieng’. Bug Fweny 21:4 wacho kama: “Tho ok nobedie kendo.” Mondo wabed gadier kuom wachno, kwan matindo 5 wacho kama: “Wechegi gin migeno kendo madier.” Onge gima Jehova osingo ma nyalo tame timo.

Be in gadier chuth ni ‘wechego gin migeno kendo madier’? Ka en kamano, dhi nyime puonjori e wi Yesu Kristo kendo iket yie kuome. Kitimo kamano, Jehova biro yie kodi. Obiro guedhi e kindegi, kendo e wi mano, ibiro yudo thuolo mar dak e Paradiso e pinyka kama “tho ok nobedie kendo, kata kuyo, kata nduru, kata rem ok nobedie kendo.”