Kal idhi e weche manie iye

Kal idhi kama ochanie weche mantie

Be Onego Wawuo gi Yesu e Lamo?

Be Onego Wawuo gi Yesu e Lamo?

JATIM nonro moro nyocha owuoyo gi rowere mokalo 800 mowuok e dinde mopogore opogore, kopenjogi kabe giyie ni Yesu nyalo dwoko lamo. Rowere mokalo 480 nowacho ni gin gadier ni Yesu dwokoga lamo. Kata kamano, achiel kuom rowerego norucho kama ondikie nying Yesu kae to ondike ni “Nyasaye.”

Iparo nade? Onego wawuo gi Yesu e lamo koso Nyasaye? * Mondo wayud dwoko, we wanonie kaka Yesu nopuonjo jolupne kaka onego gilem.

YESU NOPUONJOWA NI WAWUO GI NG’A E LAMO?

Yesu nopuonjowa kendo nonyisowa ng’ama onego wawuogo e lamo.

Yesu noketonwa ranyisi maber mondo waluw kane owuoyo e lamo gi Wuon mare manie polo

GIMA YESU NOPUONJO: Ka ne achiel kuom jopuonjrene openje ni, “Ruoth, puonjwae kaka dwalem,” Yesu nodwoko niya: “Ka ulemo, wachuru niya: ‘Wuonwa.’” (Luka 11:1, 2) E wi mago, e twak mong’ere ma Yesu nogolo e got, nojiwo jowinjone mondo olem. Nowacho kama: “Lam Wuonu.” Bende, nojiwogi konyisogi kama: “Wuonu ong’eyo gik muchando kata ka pok ukwaye.” (Mathayo 6:6, 8) E otieno mogik ka en e piny kae kaka dhano, Yesu nonyiso jolupne niya: “Kukwayo Wuora gimoro amora, obiro miyougo e nyinga.” (Johana 16:23) Omiyo, Yesu nopuonjowa mondo walam Wuon mare kendo Wuonwa ma en Jehova Nyasaye.—Johana 20:17.

RANYISI MA NOKETO: Kaluwore gi kaka Yesu nopuonjo jomoko mondo olem, en owuon nolemo kama: “Apaki e nyim ji duto Wuora, Ruodh polo gi piny.” (Luka 10:21) Kinde moro, “Yesu noting’o wang’e malo e polo mowacho kama: ‘Wuora, agoyoni erokamano nikech isewinja.’” (Johana 11:41) Kendo kane ochiegni tho, Yesu nolemo kama: “Wuora, much ngimana aketo e lweti.” (Luka 23:46) Kane owuoyo e lamo gi Wuon mare manie polo, ma en “Ruodh polo gi piny,” Yesu noketonwa ranyisi maber mondo waluw. (Mathayo 11:25; 26:41, 42; 1 Johana 2:6) Be mano e kaka jopuonjre Yesu notimo?

JOKRISTO MOKWONGO NE WUOYOGA GI NG’A E LAMO?

Ndalo manok bang’ Yesu dok e polo, jopuonjrene noyudo sand kod akwede mowuok kuom jowasikgi. (Tich Joote 4:18) En adier ni ne gilemo ka gikwayo kony, kata kamano ne gikwayo ng’a? “Ne giting’o dwondgi ne Nyasaye ka gin e achiel,” ka gikwaye mondo odhi nyime konyogi ‘kokalo kuom Yesu jatichne maler.’ (Tich Joote 4:24, 30) Omiyo, jopuonjre bende noluwo ranyisi ma ne Yesu oketonegi e wach lamo. Ne giwuoyo gi Nyasaye e lamo, to ok Yesu.

Higni mang’eny bang’e, jaote Paulo nonyiso kaka en kaachiel kod jowetene ne gilemoga. Kane ondiko ne Jokristo wetene, nowacho kama: “Wagoyo erokamano ne Nyasaye ma Wuon Ruodhwa Yesu Kristo sama walamonu.” (Jo-Kolosai 1:3) Paulo nondiko ne Jokristo wetene ni ‘kinde duto ne ogoyo erokamano kuom gik moko duto ne Nyasachwa kendo Wuonwa, e  nying Ruodhwa Yesu Kristo.’ (Jo-Efeso 5:20) Kaluwore gi wechegi, waneno ni Paulo ne ojiwo jomamoko mondo owuo e lamo gi ‘Nyasache kendo Wuon mare kuom gik moko duto,’ to notimo kamano e nying Yesu.—Jo-Kolosai 3:17.

Wanyalo nyiso ni wahero Yesu sama walemo kaluwore gi kaka nopuonjo, mana kaka Jokristo mokwongo notimo. (Johana 14:15) Sama wawuoyo gi Wuonwa manie polo e lamo, ma e ng’at monego wawuogo e lamo, wabiro bedo gadier chuth kuom weche manie Zaburi 116:1, 2 ma wacho niya: “Ahero Jehova nikech osewinjo dwonda . . . Naluong nyinge ka pod angima.” *

^ par. 3 Kaluwore gi Muma, Yesu ok romre gi Nyasaye. Mondo iyud weche momedore, ne sula mar 4 e buk miluongo ni Ang’o ma Muma Puonjo Kuom Adier? mogo gi Joneno mag Jehova.

^ par. 11 Mondo Nyasaye owinj lamowa, nyaka watem mondo wadag kaluwore gi dwache. Mondo iyud weche momedore, ne sula mar 17 e buk miluongo ni Ang’o ma Muma Puonjo Kuom Adier?