Nyithindi nyalo puonjore hero Nyasaye mana ka gin gadier ni Nyasaye nitie kendo ni Nyasaye oherogi. Mondo giher Nyasaye, onego ging’eye. (1 Johana 4:8) Kuom ranyisi, onego ging’e wechegi: Ang’o momiyo Nyasaye nochueyo dhano? Ang’o momiyo Nyasaye oweyo dhano mondo ochandre? Ang’o ma Nyasaye biro timo ne dhano e kinde mabiro?—Som Jo-Filipi 1:9.

Mondo ikony nyithindi oher Nyasaye, onego itim gik ma nyiso ni ihero Nyasaye. Ka gineno ni ihero Nyasaye, ginyalo luwo ranyisi mari.—Som Rapar mar Chik 6:5-7; Ngeche 22:6.

Wach Nyasaye nigi teko. (Jo-Hibrania 4:12) Omiyo, kony nyithindi ong’e puonj michakogo ng’eyo Muma. Yesu notiyo gi penjo, nochiko ite, kendo nolero tiend weche manie Wach Nyasaye, mondo eka ochop e chuny ji. Mondo ichop e chuny nyithindi, inyalo tiyo gi yore ma Yesu ne otiyogo e puonjo ji.—Som Luka 24:15-19, 27, 32.

E wi mano, sigendni manie Muma ma nyiso kaka Nyasaye notimo ne ji nyalo konyo nyithindi ong’e Nyasaye kendo gihere. Buge minyalo tiyogo e puonjo nyithindi yudore e Websait mar www.jw.org/Luo.—Som 2 Timotheo 3:16.